走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 3:1 | 到第七月，以色列人已經徛起𪜶許個城；彼時百姓親像一人，聚集佇耶路撒冷。 |
|---|---|
| 3:2 | 約薩達的子耶書亞及伊的兄弟許個祭司，及撒拉鐵的子所羅巴伯及伊的兄弟，攏起來起以色列上帝的壇，通獻燒祭佇彼頂面，照上帝的奴僕摩西律法的冊所記載的。 |
| 3:3 | 𪜶起壇佇本舊的位，因為驚許個國的百姓，閣佇彼頂面獻燒祭互耶和華，就是早起下昏的燒祭， |
| 3:4 | 也守搭寮仔節照所記載的，閣獻逐日的燒祭照𪜶的數額，照定著的例親像逐日所應該著的； |
| 3:5 | 然後獻照常的燒祭，及每月初一的祭以及耶和華分別做聖的節期的祭，閣獻逐人甘心歡喜獻的祭互耶和華。 |
| 3:6 | 對七月初一起，𪜶獻燒祭互耶和華。總是耶和華殿的地基猶未下。 |
| 3:7 | 𪜶閣用銀互石匠、木匠，用飲食的物、及油，互西頓人、推羅人，互𪜶將柏香樹對黎巴嫩運到海到約帕，是照波斯王古列所允准的。 |
| 3:8 | 𪜶到耶路撒冷上帝的殿遐。第二年二月，撒拉鐵的子所羅巴伯，約薩達的子耶書亞及其餘的兄弟，就是祭司、及利未人，及一切對受掠的中間倒來耶路撒冷的人，攏起手；派利未人，對二十歲以上，督工起耶和華的殿。 |
| 3:9 | 對按呢耶書亞及伊的子及兄弟，甲篾及伊的子猶大的子孫，及希拿達的子及𪜶的子，𪜶的兄弟利未人，攏起來，督理許個佇上帝的殿做工的人。 |
| 3:10 | 起厝師傅下耶和華殿的地基的時，祭司穿禮服抬號頭，亞薩的子孫利未人提鐃鈸，攏徛啲欲謳咾耶和華，照以色列王大衛所定著的例。 |
| 3:11 | 𪜶有的唱有的和，謳咾感謝耶和華講：因為伊是好，伊永遠施慈愛互以色列。𪜶謳咾耶和華的時，眾百姓大聲喝，因為耶和華殿的地基已經下啲。 |
| 3:12 | 總是有多多祭司、利未人、族中的老大，就是曾看見前的殿許個老人，今親目看見下此間殿的地基，就大聲啼哭，也多多人為著歡喜大聲喝， |
| 3:13 | 致到百姓𣍐會分別歡喜喝的聲及百姓啼哭的聲；因為百姓大聲喝的聲，互彼個聲聽到真遠。 |
