走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 6:1 | 對按呢大利烏王出令，人就去尋典冊的府庫就是佇巴比倫囥寶物的所在； |
|---|---|
| 6:2 | 佇亞馬他、瑪代省的宮內尋著一本， |
| 6:3 | 彼內面記載講：「古列王元年，古列王出令論佇耶路撒冷上帝的殿講，著起此間殿做獻祭的所在，下伊的地基堅固。殿高六十肘，闊六十肘， |
| 6:4 | 用大石三勻，新的柴一勻，經費著開王家的； |
| 6:5 | 閣上帝殿內金銀的器具，就是尼布甲尼撒對耶路撒冷的殿內提出來帶去巴比倫的，著閣還伊帶到耶路撒冷的殿，各照原位下佇上帝的殿。」 |
| 6:6 | 「今佇河外的總督達乃及示他波斯乃，及恁的同伴，就是踮佇河外的亞法薩迦人，恁著離開𪜶。 |
| 6:7 | 呣通阻止起上帝殿的工，出在猶大的總督及猶大的長老佇原位起上帝此間殿。 |
| 6:8 | 我閣降旨，恁著怎樣行佇猶大的長老幫助𪜶起此間上帝的殿，就是著對河外的餉稅中，抽出王的銀項，緊互許個人做經費，免得耽擱。 |
| 6:9 | 𪜶所著用的牛牨仔、綿羊牨、綿羊仔做燒祭獻互天頂的上帝，以及小麥、鹽、酒、油，攏照耶路撒冷的祭司所講的，逐日互伊，呣通失誤； |
| 6:10 | 通互𪜶獻芳芳的祭祀互天頂的上帝，閣為王及王許個子的活命來祈禱。 |
| 6:11 | 我閣降旨，若有人改換此個命令，就欲對伊的厝拆一支楹仔，來舉起彼人，吊伊佇彼頂面，互伊的厝為著按呢做廁池。 |
| 6:12 | 若有王及百姓起手改換此個命令，毀壞佇耶路撒冷此間上帝的殿，願安置伊的名佇遐的上帝滅無𪜶。我──大利烏出此個命令，著緊緊行伊。」 |
| 6:13 | 對按呢，河外的總督達乃及示他波斯乃，及𪜶的同伴，因為大利烏王所出的令，就緊緊行伊。 |
| 6:14 | 猶大的長老因為先知哈該及易多的孫撒迦利亞的先知話就起造，來亨通。𪜶遵趁以色列上帝的命令及古列、大利烏，及波斯王亞達設西的上諭，起造完工。 |
| 6:15 | 當大利烏王坐位第六年，亞達月初三日，此個殿就起好。 |
| 6:16 | 以色列人祭司及利未人，及其餘受掠倒來的人攏歡歡喜喜行奉獻上帝殿的禮。 |
| 6:17 | 行奉獻上帝殿的禮就獻牛牨一百隻，綿羊牨二百隻，綿羊仔四百隻，閣照以色列支派的數額獻山羊牨十二隻，為以色列眾人做贖罪祭； |
| 6:18 | 就派祭司照伊的班列，利未人照伊的次序服事踮佇耶路撒冷的上帝，是照摩西的冊所記的。 |
| 6:19 | 正月十四日，受掠倒來的百姓守𨃟過節。 |
| 6:20 | 祭司及利未人相同清氣家己，𪜶攏清氣。閣為著受掠倒來的人及𪜶的兄弟許個祭司，也為家己刣𨃟過節的羊仔。 |
| 6:21 | 對受掠倒來的以色列人及家己分別離開此所在外邦人的污穢、來歸倚𪜶、來尋耶和華──以色列的上帝的攏食伊， |
| 6:22 | 歡歡喜喜守除酵節七日久；因為耶和華互𪜶歡喜，閣互亞述王的心越轉向𪜶，來堅固𪜶的手，做上帝殿的工就是以色列的上帝。 |
