走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 2:1 | 唉啊！主受氣，互黑雲遮蓋錫安的查某子！伊將以色列的娞對天㧒落地；佇伊受氣的日亦無念著伊的腳踏椅。 |
|---|---|
| 2:2 | 主睭踏雅各一切徛起的所在，亦無憐憫。伊受氣捙倒猶大查某子的衛所，互伊倒到平地；伊凌辱此國及伊的貴族。 |
| 2:3 | 伊的受氣真烈，一盡斬斷以色列的角，佇對敵的面前勼伊的正手。伊親像四圍吞滅的火焰，將雅各燒燎去。 |
| 2:4 | 伊開弓親像對敵；伊徛啲抬起正手，親像仇讎，亦一盡剿滅目睭所歡喜者。佇錫安查某子的布棚傾出伊的大受氣，親像火一樣。 |
| 2:5 | 主變做親像對敵吞滅以色列，伊吞滅一切伊的宮殿，伊毀壞伊許個衛所；佇猶大查某子的中間加添多多悲傷及悲哀。 |
| 2:6 | 伊出力拆毀伊的籬笆，親像花園，伊毀壞伊聚會的所在。所定著的節期及安息日佇錫安攏𣍐記得，耶和華互伊按呢，閣佇伊的受氣痛恨中看輕君王及祭司。 |
| 2:7 | 主棄拺伊的祭壇，厭惡伊的聖所，將伊的宮殿的牆交佇對敵的手。𪜶佇耶和華的厝嘩嘩哮，親像佇節期的日一樣。 |
| 2:8 | 錫安查某子的城牆耶和華決意欲拆毀；伊牽繩線，直直毀滅，手無勼倒轉。伊互外牆及城牆攏悲哀，做一下衰敗。 |
| 2:9 | 伊的門沈落地；主毀壞、遏折伊的門楗。伊的君王及貴族住佇無法律的列國中；伊的先知無得著耶和華的啟示。 |
| 2:10 | 錫安查某子的長老坐佇土腳靜靜無聲；用土粉摻頭殼，用麻布縖腰；耶路撒冷的在室女頭殼徛落地。 |
| 2:11 | 我的目睭流目屎，致到煙暈；我的心腸攪絞，我的肝膽墜落地，因為我的百姓的查某子抵著毀滅，閣因為囝仔及食奶的佇城內的街路暈去。 |
| 2:12 | 𪜶佇城內街路暈去，親像受傷者，佇老母的心懷，氣欲斷；彼時對老母講：五榖及酒佇叨落？ |
| 2:13 | 耶路撒冷的查某子啊，我欲怎樣為你做干證？我欲用甚麼譬喻你啊？錫安的在室女啊，我欲用甚麼比並你，互你得著安慰啊？因為你的傷嘴大親像海，是誰會醫好你啊？ |
| 2:14 | 你的先知替你看虛假及愚戇的異象，無顯出你的罪過，通互你受掠者倒轉來；獨獨替你看虛假的啟示及受遷徙的因端若定。 |
| 2:15 | 見若過路人攏給你拍噗仔。𪜶向耶路撒冷的查某子恥笑，搖頭，講：此個城豈是人所稱十足娞，做全地所歡喜的嗎？ |
| 2:16 | 你的對敵攏向你大大開伊的嘴；𪜶恥笑，閣咬齒講：阮有吞滅伊。這真正是阮所向望的日，今阮有抵著，阮有看見！ |
| 2:17 | 耶和華有成伊所定著，應驗伊早時所命令的話。伊捙倒，亦無保惜，互對敵對你大悅；互你的對敵的角抬高。 |
| 2:18 | 𪜶的心求叫主。錫安查某子的牆啊，你著暝日流目屎親像溪，你呣通歇睏；你的目睭仁著流目屎無息。 |
| 2:19 | 暝間，換更的時著起來求叫，佇主的面前傾出你的心親像水。你的囝仔佇街市口因為枵暈去；你著為著𪜶的生命向主抬手來祈禱。 |
| 2:20 | 耶和華啊，求你鑑察！看你向是誰按呢行？婦仁人豈通食𪜶所生的、手所抱的嬰仔嗎？祭司及先知豈通佇主的聖所受刣嗎？ |
| 2:21 | 囝仔及老人倒佇街路的土腳；我諸個在室女及壯丁倒佇刀下；你受氣的日刣死𪜶。你刣死𪜶，亦無憐憫。 |
| 2:22 | 你叫四圍通驚惶者到佇我，親像佇節期的日。佇耶和華受氣的日，無人有脫離，亦無人留啲。我所抱所育者，對敵給伊刣死了了。 |
