走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
路得記是一篇可歌可頌、溫馨動人的故事，士師記所記載的患難時期為背景，描述一段歷史的插曲。士師記有好些故事記述神子民在離棄 神時遭遇到的災難。路得的故事卻寫外國人因歸向以色列的 神而蒙福，成為 神忠心子民的一部份。
| 1:1 | 當士師辦政事的時，彼個地抵著飢荒。佇猶大伯利恆，有一個人及伊的某二個子出外去摩押地。 |
|---|---|
| 1:2 | 彼人名叫以利米勒，伊的某名叫拿俄米；伊二個子，名瑪倫、基連，攏是猶大伯利恆的以法他人。𪜶到摩押地，就佇遐徛起。 |
| 1:3 | 後來拿俄米的丈夫以利米勒死，放伊及伊二個子。 |
| 1:4 | 二個子娶摩押的查某子做某，一個名叫俄珥巴，一個名叫路得，踮佇遐約略十年。 |
| 1:5 | 瑪倫及基連二人也死，剩彼個婦仁人無丈夫，也無子。 |
| 1:6 | 伊就及二個媳婦起來，欲對摩押地倒去；因為伊佇摩押地聽見耶和華眷顧伊的百姓，賞賜𪜶米糧。 |
| 1:7 | 伊就對伊徛起的所在出去，二個媳婦及伊去，𪜶行路欲倒去猶大地。 |
| 1:8 | 拿俄米給二個媳婦講：「恁去啊，逐個倒去老母的厝。願耶和華好款待恁，親像恁款待已經死的人及我一樣！ |
| 1:9 | 願耶和華賞賜恁逐人佇丈夫的家得著平安！」就及𪜶唚嘴。𪜶就出聲啼哭， |
| 1:10 | 給伊講：「呣啊，阮欲及你相及倒去你的百姓遐。」 |
| 1:11 | 拿俄米講：「我的查某子啊，倒去啊！啥事欲及我去啊？我猶會懷胎生子做恁的丈夫嗎？ |
| 1:12 | 我的查某子啊，倒去啊，去啊！我已經年老，𣍐會閣有丈夫；我若講，我猶有向望，我今暝若有丈夫也會生子， |
| 1:13 | 恁豈會聽候𪜶大漢嗎？恁豈會家己守無嫁人嗎？我的查某子啊，莫得按呢。我為著恁盡在憂苦，因為耶和華伸手攻擊我。」 |
| 1:14 | 𪜶閣出聲哭，俄珥巴及乾家唚嘴，獨獨路得及伊放𣍐離。 |
| 1:15 | 伊講：「看啊，你的同姒已經倒去伊的百姓伊的上帝遐，你也著隨你的同姒倒去！」 |
| 1:16 | 路得講：「莫得勸我離開你，倒去無隨你。因為你去遐，我也欲去遐；你歇佇遐，我也欲歇遐；你的百姓欲做我的百姓，你的上帝也欲做我的上帝。 |
| 1:17 | 你死佇遐，我也死佇遐，埋葬佇遐。除死以外若有甚麼互你我相離！願耶和華加倍責罰我。」 |
| 1:18 | 伊看見伊決意欲及伊去，就無閣對伊講起。 |
| 1:19 | 對按呢二人相及行，來到伯利恆。𪜶到伯利恆，通城為著𪜶攏泏起來。許個婦仁人講：「這是拿俄米嗎？」 |
| 1:20 | 伊應講：「莫得叫我拿俄米，著叫我瑪拉，因為全能者款待我真艱苦。 |
| 1:21 | 我出去的時滿足，耶和華互我空空倒來。耶和華已經責備我來證明我，全能者已經苦楚我。恁啥事叫我拿俄米啊？」 |
| 1:22 | 按呢拿俄米倒來，伊的媳婦摩押的查某子路得，對摩押地倒來的也及伊來，𪜶到伯利恆抵仔是起手割大麥的時。 |
- 本章節結束 -
下一章