走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
目的：安慰受試煉的信徒，也說明信心與行為的關係。
| 1:1 | 上帝及主耶穌基督的奴僕雅各請安十二支派四散徛起者。 |
|---|---|
| 1:2 | 我的兄弟啊，恁陷落佇多多樣的試煉，著攏掠做歡喜； |
| 1:3 | 因為知恁信的經驗，會生出吞愞。 |
| 1:4 | 獨獨吞愞著互伊到成功，互恁完全、齊備，無所欠缺。 |
| 1:5 | 恁中間若有人欠缺智慧，著對彼個白白互眾人、也無嫌人的上帝，祈求就欲互伊。 |
| 1:6 | 獨獨著用信來求，攏無僥疑；因為僥疑的人，譬喻親像海湧互風拍，來起落。 |
| 1:7 | 彼號人免拍算對主有通得著甚麼。 |
| 1:8 | 二樣心的人，佇所行一切的路無定準。 |
| 1:9 | 卑微的兄弟著對伊的高升，來誇口； |
| 1:10 | 好額的對伊的卑微，也著按呢；因為伊欲過去，親像草的花。 |
| 1:11 | 因為日出，及燒的風，互彼個草乾，花謝，伊的娞就無去；好額人，佇伊的所行也欲按呢衰退。 |
| 1:12 | 抵著試來忍受的人有福氣，因為既然經過試驗，欲得著活命的冕旒；就是主所應允互疼伊的人的。 |
| 1:13 | 抵著試的人，莫得講：「我是互上帝所試」；因為上帝無互歹所試，伊家己也無試人。 |
| 1:14 | 獨獨逐人抵著試，攏是互家己私慾所迷所釣。 |
| 1:15 | 私慾已經懷孕，就生罪惡；罪惡已經長成，就生出死無。 |
| 1:16 | 我所疼的兄弟啊，莫得錯誤。 |
| 1:17 | 見若好的賞賜及完全的恩賜攏是對頂面，對眾項光的父落來；伊無變換，也無轉踅的影。 |
| 1:18 | 伊照家己的意思，曾用真理的道生咱，欲互咱佇伊所造者的中間做親像頭水的果子。 |
| 1:19 | 我所疼的兄弟啊，恁知此個。若是逐人論到聽著緊，講話著慢，受氣也著慢， |
| 1:20 | 因為人的受氣無成上帝的義。 |
| 1:21 | 所以，恁除去攏總腌臢及過額的惡毒，著用溫柔來接納所種佇內面的道理，就是會救恁的靈魂的。 |
| 1:22 | 恁著做行道理的，呣是干單聽的，來家己騙。 |
| 1:23 | 因為聽道理若無行的，譬喻親像人佇鏡裡詳細看伊本然的面， |
| 1:24 | 看過了，就做伊去，連鞭𣍐記得伊生做甚麼款。 |
| 1:25 | 若是人注神佇彼個齊全的律法，就是互人自由的，也長長住佇彼個，呣是聽了𣍐記得的，是實在啲用工的，此號人佇伊的所做欲有福氣。 |
| 1:26 | 若有人掠家己做敬虔，也無約束伊的舌，就是騙伊家己的心，此號人的敬虔是空空。 |
| 1:27 | 獨獨眷顧孤兒寡婦佇𪜶的患難中，閣家己守，無互世俗染著，這佇父上帝的面前，就是做清氣無垃墋的敬虔。 |
- 本章節結束 -
下一章