走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 9:1 | 十二月，就是亞達月十三日，王的命令及諭旨得欲舉行，就是猶大人的對敵向望得著管轄𪜶的日，總是代誌對反，反轉互猶大人管轄見若怨恨𪜶的人。 |
|---|---|
| 9:2 | 彼日佇亞哈隨魯王的逐省猶大人攏聚集佇𪜶的城，下手攻擊許個欲害𪜶的人。無人會抵當𪜶，因為眾百姓攏驚𪜶。 |
| 9:3 | 逐省的首領、大臣、總督，及辦理王的事的人，攏來幫助猶大人，因為驚末底改。 |
| 9:4 | 因為末底改佇朝廷尊大，名聲遍傳逐省，此個末底改愈升愈大。 |
| 9:5 | 猶大人用刀拍𪜶一切的對敵，刣死𪜶剿滅𪜶出在意思行佇怨恨𪜶的人。 |
| 9:6 | 佇書珊城，猶大人刣滅五百人； |
| 9:7 | 閣刣死巴珊大他、達分、亞斯帕他、 |
| 9:8 | 破拉他、亞大利雅、亞利大他、 |
| 9:9 | 帕瑪斯他、亞利賽、亞利大、瓦耶撒他； |
| 9:10 | 此十人攏是哈米大他的孫、猶大人的對敵哈曼的子。總是無搶𪜶的財物。 |
| 9:11 | 當彼日，將書珊城受刣的人額呈報佇王的面前。 |
| 9:12 | 王給王后以斯帖講：「猶大人佇書珊城刣死對敵五百人，閣刣死哈曼十個子，佇王其餘的逐省呣知做怎樣？今你所請是甚麼，欲互你；你所求是甚麼，也欲做成伊。」 |
| 9:13 | 以斯帖就講：「王若掠做好，求你准書珊的猶大人，明仔日也照今仔日的諭旨來行，也將哈曼十個子吊佇柴架裡。」 |
| 9:14 | 王就命令照按呢行。彼個諭旨傳佇書珊，人就將哈曼十個子吊起來。 |
| 9:15 | 亞達月十四日，書珊的猶大人閣聚集佇書珊，刣死三百人，總是無搶𪜶的財物。 |
| 9:16 | 佇王逐省其餘的猶大人也攏聚集起來保護家己的生命，脫離對敵，享受平安。刣死怨恨𪜶的人七萬五千，總是無搶𪜶的財物。 |
| 9:17 | 亞達月十三日，行此個事；十四日安息，用此日設筵席做歡喜的日。 |
| 9:18 | 總是書珊的猶大人，此十三、十四日聚集；十五日安息，用此日做設筵席歡喜的日。 |
| 9:19 | 所以踮佇鄉社的猶大人，徛起佇無城牆的埠頭，今攏用亞達月十四日做設筵席歡喜的日，做好的日，用禮物相送。 |
| 9:20 | 末底改記載許個事，閣寫批互亞哈隨魯王逐省遠近所有的猶大人， |
| 9:21 | 定著𪜶逐年著守亞達月十四、十五二日， |
| 9:22 | 此二日是猶大人脫離對敵得著平安的日，彼月是憂悶變做歡喜，悲哀變做好的日。也著守此二日做設筵席歡喜，大家用禮物相送，賑濟喪鄉人的日。 |
| 9:23 | 對按呢，猶大人照末底改所寫互𪜶的批，承認欲照𪜶起頭行的來守伊； |
| 9:24 | 因為猶大人的對敵亞甲族哈米大他的子哈曼設計謀攻擊猶大人欲滅𪜶，博普珥，就是抽籤，為著欲敗壞𪜶，剿滅𪜶； |
| 9:25 | 總是此個代誌到王的面前，王就降諭旨互哈曼計謀害猶大人的歹計謀歸佇伊家己的頭殼，閣吊伊及伊許個子佇柴架頂。 |
| 9:26 | 對按呢𪜶照普珥的名，就叫許個日做「普珥日」。𪜶因為此張批攏總的話，以及𪜶佇此個事所親目看見親身抵著的事， |
| 9:27 | 猶大人就決意承認𪜶及𪜶的後裔，以及見若歸倚𪜶的人，年年欲照所記載所定著的期守此二日，互伊無廢無。 |
| 9:28 | 閣欲紀念來守許個日，佇逐代、逐家、逐省、逐城，互普珥的日佇猶大人的中間無廢無，佇𪜶的後裔紀念無息。 |
| 9:29 | 彼時亞比孩的查某子──王后以斯帖及猶大人末底改，用全權寫來堅固普珥的第二張批， |
| 9:30 | 閣用和平誠實的話，寫批互亞哈隨魯王國內一百二十七省所有的猶大人， |
| 9:31 | 欲堅固此個「普珥的日」，佇𪜶所定著的期，照猶大人末底改及王后以斯帖所命令𪜶的，也照猶大人為家己及𪜶的後裔所定著的，禁食啼哭。 |
| 9:32 | 以斯帖的詔命堅固「普珥」的事，也有記佇冊裡。 |
