走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 3:1 | 萬軍的耶和華講：「看啊，我差我的使者，伊欲佇我的頭前備辦路。恁所尋的主欲忽然到伊的殿；盟約的使者，就是恁所欣慕者，看啊，伊來啦。」 |
|---|---|
| 3:2 | 獨獨伊來的日，是誰當會起？伊顯現的時，是誰徛會住？因為伊親像鍛煉者的火，閣親像漂布者的鹼。 |
| 3:3 | 伊欲坐啲，親像鍛煉銀互伊清氣的，來清氣利未的子孫，鍛煉𪜶親像金銀；𪜶就欲憑公義獻禮物互耶和華。 |
| 3:4 | 彼時，猶大及耶路撒冷所獻的禮物欲得著耶和華歡喜，親像舊時的日、古早的年。 |
| 3:5 | 萬軍的耶和華講：「我欲臨到恁，來審判。我欲緊緊做干證，來指明行邪術者、行姦淫者、濫糝咒誓者、虧負做工人的工錢者、欺壓寡婦孤兒者、冤枉出外人者，及無驚畏我者。」 |
| 3:6 | 因為我──耶和華無改換，所以恁雅各的子無抵著滅無。 |
| 3:7 | 萬軍的耶和華講：對恁列祖的日以來，恁有違背我的律例，也無守伊。今恁著越轉尋我，我就越轉尋恁。總是恁講：『阮著怎樣越轉？』 |
| 3:8 | 人豈通偷提上帝的物嗎？恁竟然偷提我的物。總是恁講：『阮佇甚麼事偷提你的物啊？』就是佇應該納的十份一及禮物。 |
| 3:9 | 因為恁通國的人攏偷提我的物，所以恁受重的咒詛。 |
| 3:10 | 萬軍的耶和華講：恁著用十份的一份完全送入府庫，互我的厝有米糧，用此個來試我，看我果然給恁開天的窗仔，傾福氣互恁，到無地通下無。 |
| 3:11 | 萬軍的耶和華講：我欲為恁責備草蜢，無容允伊毀壞土產。恁田裡的葡萄樹佇未熟的代先也無落粒。 |
| 3:12 | 萬軍的耶和華講：萬國欲稱恁做有福氣者，因為恁欲做通歡喜的地。」 |
| 3:13 | 耶和華講：「恁用硬的話激我，恁猶久講：『阮用甚麼話激你啊？』 |
| 3:14 | 恁曾講：『服事上帝是空空，阮遵守伊的命令，佇萬軍的耶和華面前刻苦來行，有甚麼利益啊？ |
| 3:15 | 今阮稱驕傲的人有福氣，亦閣行歹的人得著建立；𪜶試上帝，猶久得著救出。』」 |
| 3:16 | 彼時，敬畏耶和華的人相及講，耶和華俯耳孔啲聽，閣有紀念的冊寫佇伊的面前，是為著敬畏耶和華、數念伊的名的人。 |
| 3:17 | 萬軍的耶和華講：「佇我所定著的日，𪜶欲歸佇我，做特別的寶貝。我欲疼惜𪜶，親像人疼惜彼個服事伊的子兒。 |
| 3:18 | 彼時恁欲閣會曉得好人及歹人的分別，服事上帝的人及無服事上帝的人的分別。」 |
