走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 5:1 | 百姓及𪜶的某大聲哮，嫌𪜶的兄弟猶大人。 |
|---|---|
| 5:2 | 有人講：「阮及子查某子人額多，著去得著五穀通食來得著活」； |
| 5:3 | 有的講：「為著飢荒，阮用阮的田園、葡萄園、厝宅，典人來得著五穀」； |
| 5:4 | 有的講：「阮已經用田、及葡萄園，借銀納王的稅。 |
| 5:5 | 阮的肉體及阮的兄弟的肉體一樣；阮的子兒及𪜶的子兒一樣。今阮用阮的子查某子做人的奴僕女婢，阮的查某子有的已經做女婢；阮也無法得，因為阮的田園、葡萄園已經歸別人。」 |
| 5:6 | 我聽見𪜶的喉叫及𪜶的話，就真受氣。 |
| 5:7 | 我心內想，就大責備許個貴族及官長給𪜶講：「恁逐人對兄弟提利息！」對按呢我招集大會來誅𪜶。 |
| 5:8 | 我給𪜶講：「阮量阮的力來贖咱的兄弟猶大人，就是已經賣互異邦人的；恁竟然欲賣恁的兄弟嗎？抑是𪜶欲受賣互咱嗎？」𪜶靜靜，無話通應。 |
| 5:9 | 我閣講：「恁所做的呣好！因為咱的對敵就是異邦人的誹謗，恁豈呣著敬畏咱的上帝來行嗎？ |
| 5:10 | 我及我的兄弟，我的奴僕也用錢銀五穀借互百姓；今我勸恁咱大家著免利息。 |
| 5:11 | 今我勸恁今仔日將𪜶的田、葡萄園、橄欖園、厝宅，及恁所對𪜶抽的錢銀、五穀、酒、油，每百份的一份攏著還伊。」 |
| 5:12 | 𪜶講：「阮欲還，無閣對𪜶討，欲照你的話行。」我就叫祭司來，教𪜶咒誓，著照此個話行。 |
| 5:13 | 我也拂開我的衫仔帕，講：「見若無成此個話者，願上帝照按呢拂開伊離開伊的家及伊的職業，就是願伊照按呢拂到空空。」會眾攏講：「阿們！」閣謳咾耶和華。百姓就照此個話行。 |
| 5:14 | 對我受設立佇猶大地做𪜶的總督，就是對亞達設西王二十年到三十二年，共十二年的久，我及我的兄弟攏無食總督的俸祿。 |
| 5:15 | 總是我以前舊任的總督互百姓負擔真重，提百姓的五穀及酒，及銀四十舍客勒，連𪜶的奴僕也轄制百姓；獨獨我因為敬畏上帝無按呢行。 |
| 5:16 | 閣我專務起城牆，並無買田地；我的奴僕也攏聚集佇遐做工。 |
| 5:17 | 除去許個對四圍的外邦中來尋阮的人以外，有猶大人及官長一百五十人佇我的桌相及食。 |
| 5:18 | 逐日備辦一隻牛牨，六隻肥的綿羊，閣備辦幾若隻雞；每十日一擺，備辦多多逐樣的酒。雖然按呢，我也無提總督的俸祿，因為百姓服役真重。 |
| 5:19 | 我的上帝啊，求你記念我為著此個百姓所行一切的事，來賜福我。 |
