走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 8:1 | 到第七月，以色列人已經徛起𪜶許個城。彼時，百姓親像一人攏聚集佇水門前寬闊的所在，請經學士以斯拉帶摩西律法的冊來就是耶和華所曾命令以色列的。 |
|---|---|
| 8:2 | 七月初一日，祭司以斯拉帶律法到公會前，或男或女，以及見若聽了會曉得者的面前。 |
| 8:3 | 佇水門前寬闊的所在，對天光到日晝，佇眾男女、及許個會明白者的面前讀伊。百姓俯耳孔聽律法的冊。 |
| 8:4 | 經學士以斯拉徛佇𪜶為著此個事所備辦的柴台頂。佇伊的身邊有瑪他提雅、示瑪、亞奈雅、烏利亞、希勒家，及瑪西雅徛佇伊的正旁；毗大雅、米沙利、瑪基雅、哈順、哈拔大拿、撒迦利亞，及米書蘭徛佇伊的倒旁。 |
| 8:5 | 以斯拉徛佇眾百姓的頂面，佇眾百姓的目睭前掀開此本冊。伊一下掀開，眾百姓就攏起來徛。 |
| 8:6 | 以斯拉謳咾耶和華至大的上帝；眾百姓攏抬起手應講：「阿們！阿們！」就俯頭，面向地，敬拜耶和華。 |
| 8:7 | 耶書亞、巴尼、示利比、雅憫、亞谷、沙比太、荷第雅、瑪西雅、基利他、亞撒利雅、約撒拔、哈難、毗萊雅，及利未人互百姓明白律法；百姓攏徛佇伊的所在。 |
| 8:8 | 𪜶讀上帝律法的冊到明白，閣開拆彼個意思，互百姓明白所讀的。 |
| 8:9 | 總督尼希米及做祭司的經學士以斯拉，及教示百姓的利未人，對眾百姓講：「今仔日是耶和華──恁上帝的聖日，呣通悲哀啼哭。」因為眾百姓聽見律法的話攏啼哭； |
| 8:10 | 伊閣給𪜶講：「去啊，恁去食肥的物，飲甜的味，無備辦物的人著分互伊，因為今仔日是咱的主的聖日。恁呣通憂悶，因為對耶和華得著的歡喜是恁的能力。」 |
| 8:11 | 對按呢利未人安慰眾百姓，講：「著靜靜，因為今仔日是聖日；呣通憂悶。」 |
| 8:12 | 眾百姓就去飲食，也分物互人，大歡喜，因為𪜶明白所傳互𪜶的話。 |
| 8:13 | 隔日，眾百姓的族長、祭司、及利未人攏聚集到經學士，以斯拉遐，欲致意聽律法的話。 |
| 8:14 | 𪜶看著律法中有記載，耶和華託摩西命令以色列人著佇七月的節期踮佇草寮， |
| 8:15 | 閣著佇逐個城及耶路撒冷宣傳報告講：「恁著出去山裡，取橄欖樹枝、野橄欖樹枝、岡拈樹枝、棗樹枝，艷樹的樹枝，來搭草寮照所記載的。」 |
| 8:16 | 百姓就出去，帶樹枝來，逐人佇家己的厝頂佇院內，佇上帝殿的院內，佇水門寬闊的所在，佇以法蓮門寬闊的所在搭草寮。 |
| 8:17 | 許個受掠去閣倒來的會眾就搭草寮，坐佇草寮裡。因為對嫩的子約書亞的時到此日，以色列人呣曾按呢行。對按呢𪜶大大歡喜。 |
| 8:18 | 對頭一日到路尾日，以斯拉逐日讀上帝的律法。眾人守節七日，到第八日有嚴肅會照定著的例。 |
