走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 9:1 | 此月二四日，以色列人聚集禁食，穿麻衫，摻火灰。 |
|---|---|
| 9:2 | 以色列的後裔就及一切外邦人隔開，徛啲認家己的罪惡及𪜶列祖的罪過。 |
| 9:3 | 𪜶徛佇𪜶的所在，用彼日的時間四份一讀耶和華──𪜶的上帝律法的冊，閣用時間的四份一認罪，敬拜耶和華──𪜶的上帝。 |
| 9:4 | 耶書亞、巴尼、甲篾、示巴尼、布尼、示利比、巴尼、基拿尼徛佇利未人的台頂，大聲求叫耶和華──𪜶的上帝。 |
| 9:5 | 利未人耶書亞、甲篾、巴尼、哈沙尼、示利比、荷第雅、示巴尼、毗他希雅講：「恁著徛起來謳咾耶和華──恁的上帝，對永遠到永遠。耶和華啊，你榮光的名是應該謳咾的！𨃟過一切的稱呼謳咾。」 |
| 9:6 | 「你，獨獨你是耶和華！你創造天及諸個天的天，及天頂的萬軍，地及地上的萬物，海及海中的萬物，這一切攏是你所保存的。天軍也敬拜你。 |
| 9:7 | 耶和華啊，你是上帝，曾揀選亞伯蘭，導伊出迦勒底的吾珥，賞賜伊名叫亞伯拉罕。 |
| 9:8 | 你看伊的心盡忠佇你的面前，就及伊立約，應允將迦南人、赫人、亞摩利人、比利洗人、耶布斯人、革迦撒人的地互伊的後裔、閣有應驗你的話，因為你是公義者。 |
| 9:9 | 「你曾看見阮的列祖佇埃及所受的困苦，聽𪜶佇紅海邊的哀求， |
| 9:10 | 就行神蹟奇事責罰法老及伊的眾人臣，以及伊國內的眾百姓。因為你知𪜶驕傲款待阮的列祖，你就為家己得著名聲，親像今仔日一樣。 |
| 9:11 | 你佇𪜶的面前分開海，互𪜶對海中行乾地過去，追趇𪜶者你㧒𪜶佇深海，親像㧒石頭佇大水中； |
| 9:12 | 又閣日時你用雲柱導𪜶，暝時你用火柱照光𪜶所行的路。 |
| 9:13 | 你也降臨佇西奈山，對天裡及𪜶講話，賞賜𪜶正直的法度、真實的法度、好的律例及誡命， |
| 9:14 | 閣互𪜶知你安息的聖日，也託你的奴僕摩西用誡命、律例、法度、命令𪜶。 |
| 9:15 | 為著𪜶枵就對天賞賜米糧，為著𪜶嘴乾就對石磐出水，閣命令𪜶去承接你所咒誓欲互𪜶的地。 |
| 9:16 | 「總是𪜶及阮的列祖行代誌驕傲，硬𪜶的頷頸無聽趁你的誡命； |
| 9:17 | 呣肯順趁，也無記念你佇𪜶中間所行的奇事，竟然硬𪜶的頷頸，佇悖逆中，家己設立首領，欲越倒去𪜶做奴才的地。總是你是歡喜赦免人，有恩典，憐憫，無快快受氣，有滿滿慈愛的上帝，也無放拺𪜶。 |
| 9:18 | 𪜶雖然鑄一隻牛仔，閣講『這是你的上帝曾導你出埃及者』，按呢大大激動受氣； |
| 9:19 | 你猶久大施憐憫，無放拺𪜶佇曠野。日時，雲柱無離開𪜶，導𪜶行路；暝時，火柱也無離開𪜶，照光𪜶及𪜶所著行的路。 |
| 9:20 | 你也賞賜你好的神來教示𪜶；你的嗎哪猶原互𪜶食無息，為著𪜶嘴乾賞賜𪜶水。 |
| 9:21 | 佇曠野四十年，你養飼𪜶，𪜶就無欠缺一項：𪜶的衫無破，𪜶的腳無肨泡。 |
| 9:22 | 你將列邦及許個百姓互𪜶，分派𪜶佇逐角頭，𪜶就得著西宏的地、希實本王的地，及巴珊王噩的地。 |
| 9:23 | 你加添𪜶的子孫親像天星的多，導𪜶到彼個地就是你給𪜶的列祖講𪜶欲入去承接的。 |
| 9:24 | 按呢，𪜶的子孫入去承接彼個地，你佇𪜶的面前制壓彼所在徛起的百姓，就是迦南人；將𪜶及𪜶的君王，及彼所在的百姓，攏交佇𪜶的手，互𪜶出在意思來款待𪜶。 |
| 9:25 | 𪜶取堅固的城、肥的土地、得著充滿逐樣好物的厝宅、開便便的水井、葡萄園、橄欖園，果子樹多多。𪜶得著食飽，身體肥，因為你的大恩，心內快樂。 |
| 9:26 | 「總是，𪜶呣順趁，竟然悖逆你，將你的律法㧒佇尻脊後，你的先知勸戒𪜶欲互𪜶歸向你，𪜶就刣死𪜶，大大激動受氣。 |
| 9:27 | 所以你交𪜶佇對敵的手，受𪜶的苦楚。𪜶抵著苦難的時哀求你，你就對天俯落聽，照你的大憐憫互𪜶有拯救的人，救𪜶脫離對敵的手。 |
| 9:28 | 總是𪜶得著平安了後，閣佇你的面前行歹，所以你放拺𪜶佇對敵的手，互對敵管轄𪜶。𪜶越倒轉哀求你的時，你猶原對天俯落聽，沓沓照你的憐憫拯救𪜶， |
| 9:29 | 閣勸戒𪜶，愛欲引導𪜶歸向你的律法。總是𪜶行代誌驕傲，呣聽趁你的誡命，干犯你許個法度（人若行伊欲對伊得著活的），越轉肩頭，硬頷頸，呣肯聽趁。 |
| 9:30 | 總是你多多年寬容𪜶，閣用你的神託你許個先知來對𪜶做干證，𪜶猶原呣聽趁，所以你將𪜶交佇列國的百姓的手。 |
| 9:31 | 總是你對你的大憐憫，無一盡滅𪜶，也無放拺𪜶；因為你是有恩典，有憐憫的上帝。 |
| 9:32 | 「今阮的上帝啊，你是至大、有權能、通驚畏、守約，施慈愛的上帝。阮的君王、首領、祭司、先知、列祖，及你的眾百姓，對亞述列王的時到今仔日所抵著一切的苦難，求你莫得掠做小可。 |
| 9:33 | 總是見若阮所抵著的，你是公義；因為你所行的是真實，阮所行的是歹。 |
| 9:34 | 阮的君王、首領、祭司、列祖、攏無遵守你的律法，呣聽趁你的誡命及你的干證就是你對𪜶所干證的話。 |
| 9:35 | 𪜶佇𪜶的本國，佇你賞賜𪜶大福氣及你佇𪜶面前所賞賜闊大肥娞的地無服事你，也無越轉離開𪜶的歹所行。 |
| 9:36 | 阮今仔日做奴僕；你所賞賜阮列祖的地，通食伊的果子以及好的物，看啊，阮佇此個地做奴僕！ |
| 9:37 | 此個地出多多物歸佇列王，就是你因為阮的罪你所設立來管轄阮的。𪜶出在意思管轄阮的身軀及阮的精牲，阮抵著大患難。」 |
| 9:38 | 因為這一切的事，阮立確實的約，寫明伊。阮的首領、利未人，及祭司攏蓋印。 |
