走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 15:1 | 兄弟啊，我互恁知我前所傳互恁的福音，恁所承受，所倚靠來徛在的， |
|---|---|
| 15:2 | 恁若執守我所傳互恁福音的道理，也呣是空空信，就對此個得救。 |
| 15:3 | 因為我所受來傳互恁的：第一，就是基督為著咱的罪死，照聖經所記載， |
| 15:4 | 閣有埋葬；第三日復活，也照聖經所記載， |
| 15:5 | 有出現互磯法看見，閣出現互十二個使徒看見； |
| 15:6 | 閣一擺出現互五百外個兄弟同時看見，其中大半猶佇啲，若是有的已經睏去。 |
| 15:7 | 閣一擺出現互雅各看見，又閣一擺出現互攏總的使徒看見， |
| 15:8 | 上路尾也出現互我看見；我是親像未到月來生的。 |
| 15:9 | 因為我是使徒的至微細的，𣍐堪得稱做使徒，因為我曾窘逐上帝的教會。 |
| 15:10 | 總是我今成做此等號的人，是對上帝的恩才有，閣伊所賞賜我的恩呣是空空。若是我比𪜶眾人卡著磨；其實呣是我，是上帝的恩及我佇啲的。 |
| 15:11 | 按呢不論是我，抑是𪜶，阮乜按呢傳，恁乜按呢信。 |
| 15:12 | 今若傳基督對死人中復活，怎樣恁中間有人講死人無復活啊？ |
| 15:13 | 死人若無復活，就基督未曾復活； |
| 15:14 | 基督若未曾復活，就阮所傳的是空空，恁的信也是空空。 |
| 15:15 | 死人若無復活就上帝未曾互基督復活；呣拘阮干證伊曾互伊復活，就顯明阮是做上帝白賊的干證。 |
| 15:16 | 因為死人若無復活，就基督未曾復活。 |
| 15:17 | 基督若未曾復活，就恁的信無採工，恁猶久佇恁的罪中。 |
| 15:18 | 就許個𫢶佇基督已經睏的也是沈淪。 |
| 15:19 | 咱若干單在生有向望佇基督，就佇眾人中咱是第一可憐的。 |
| 15:20 | 總是今基督已經對死人中復活，做諸個啲睏的頭一個復活的。 |
| 15:21 | 因為既然對一人才有死，也對一人才有死人的復活。 |
| 15:22 | 因為親像佇亞當眾人攏死；也親像按呢，佇基督眾人欲得著復活。 |
| 15:23 | 若是逐個照伊的次序：頭一個是基督；第二，是許個屬基督的，佇伊臨到的時。 |
| 15:24 | 然後末期到，就是伊已經廢無攏總的政治、攏總的權柄、及才能，將國交互父上帝的時。 |
| 15:25 | 因為伊的確做王，到下攏總的對敵佇伊的腳下。 |
| 15:26 | 第一路尾受廢無的對敵就是死。 |
| 15:27 | 因為有講：「伊互萬項有降服佇伊的腳下。」已經講萬項有降服伊，就彼個互萬項有降服伊的，無在內，是明。 |
| 15:28 | 萬項有已經降服伊，就子也欲家己降服佇互萬項有降服伊的，互上帝佇萬有中做萬有的。 |
| 15:29 | 若呣是按呢，就為著死人受洗禮的，欲啥事？死人若一概無復活，為著𪜶受洗禮甚麼緣故？ |
| 15:30 | 閣阮啥事時時冒險啊？ |
| 15:31 | 兄弟啊，我佇咱的主基督耶穌為著恁所有的誇口，我指伊來咒誓，我日日拼死。 |
| 15:32 | 我若照人的款，佇以弗所及野獸相拍，我有甚麼利益？死人若無復活，咱就做咱飲做咱食！因為明仔日欲死啦。 |
| 15:33 | 莫得受迷惑；濫糝交陪是敗壞好德行。 |
| 15:34 | 著醒悟來照義，莫得犯罪，因為有人呣識上帝。我講按呢是欲互恁見誚。 |
| 15:35 | 有人欲講：「死人怎樣復活，用甚麼號的身體來啊？」 |
| 15:36 | 戇人啊，你所撒的，無代先死就𣍐活。 |
| 15:37 | 閣你所撒的呣是彼個將來的形體，或是麥，或是別樣的五穀，不過是一粒子若定。 |
| 15:38 | 若是上帝照伊所定著的用形體互伊，佇逐號種子有伊家己的形體。 |
| 15:39 | 見若肉體呣是同一樣的肉體：人的一款，獸的一款，鳥的一款，魚的一款。 |
| 15:40 | 有天裡的形體，也有地裡的形體；總是佇天裡者的榮光各樣，佇地裡者的榮光。 |
| 15:41 | 日的榮光是一款，月的榮光閣一款，諸個星的榮光又閣一款；因為此粒星及彼粒星榮光無相同。 |
| 15:42 | 死人復活也是按呢：所撒的是會朽爛，復活的是𣍐朽爛； |
| 15:43 | 所撒的是凌辱，復活的是榮光；所撒的是軟茈，復活的是勇健； |
| 15:44 | 所撒的是血氣的形體，復活的是神靈的形體。若有血氣的形體，也有神靈的形體。 |
| 15:45 | 所記載也是按呢講：「頭一個人亞當成做有血氣的活人」；路尾的亞當成做賞賜活的神。 |
| 15:46 | 總是神的呣是代先，是血氣的代先，神的隨後。 |
| 15:47 | 頭一個人出佇地裡，屬佇土的類；第二個人出佇天裡。 |
| 15:48 | 彼個屬佇土類的是怎樣，見若屬佇土類的也是按呢；也彼個屬佇天裡的是怎樣，見若屬佇天裡的也是按呢。 |
| 15:49 | 咱既然穿屬佇土者的形狀，也欲穿屬佇天者的形狀。 |
| 15:50 | 兄弟啊，我講血氣的肉體𣍐會承接上帝的國，會朽爛的𣍐會承接𣍐朽爛的。 |
| 15:51 | 今我用奧妙給恁講：咱無欲攏睏，是欲攏變化， |
| 15:52 | 一時仔久，目一nih，末期哨角鳴的時。因為哨角欲鳴，死人就欲復活，變做𣍐朽爛的，咱也欲變化。 |
| 15:53 | 因為此個會朽爛的的確著變做𣍐朽爛，此個會死的變做𣍐死。 |
| 15:54 | 若是此個會朽爛的已經變做𣍐朽爛，也此個會死的已經變做𣍐死，就所記載講：「有廢無死來卡贏伊，」此個話彼時欲應驗。 |
| 15:55 | 死啊！你的卡贏佇叨落？死啊！你的利害佇叨落？ |
| 15:56 | 死的利害就是罪，罪的權勢是律法。 |
| 15:57 | 總是感謝上帝，伊互咱對咱的主耶穌基督得著卡贏。 |
| 15:58 | 所以，我所疼的兄弟啊，恁著堅固，無搖泏，常常盡力佇主的工；因為知恁著磨佇主的呣是空空。 |
