走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 18:1 | 當以色列王以拉的子何細亞三年，猶大王亞哈斯的子希西家坐位。 |
|---|---|
| 18:2 | 伊坐位的時二十五歲，佇耶路撒冷做王共二十九年。伊的老母名叫亞比，是撒迦利雅的查某子。 |
| 18:3 | 伊行耶和華所看做好的事，照伊的祖大衛一切所行的。 |
| 18:4 | 伊廢無山頭壇，毀壞柱像，剉亞舍拉，拍碎摩西所造的銅蛇，因為到彼時以色列人對伊燒香，叫伊做尼忽士但。 |
| 18:5 | 伊倚靠耶和華──以色列的上帝，佇伊以後猶大列王中無一個會比得伊，伊以前也無。 |
| 18:6 | 因為伊結聯佇耶和華，隨伊無離開，執守耶和華所命令摩西的誡命。 |
| 18:7 | 耶和華及伊佇啲，伊無論去叨落一盡亨通。伊背叛亞述王、無服事伊。 |
| 18:8 | 伊攻擊非利士人，直到迦薩，及伊的境界，對守更樓到堅固的城。 |
| 18:9 | 希西家王第四年，就是以色列王以拉的子何細亞第七年，亞述王撒縵以色上來攻擊撒瑪利亞圍困伊； |
| 18:10 | 到第三年尾就取伊。希西家六年，以色列王何細亞九年，撒瑪利亞互伊取去。 |
| 18:11 | 亞述王掠以色列人到亞述，安置𪜶佇哈臘及哈博佇歌散河邊的，及瑪代人許個城； |
| 18:12 | 因為𪜶呣聽趁耶和華──𪜶的上帝的話，違背伊的約，見耶和華的奴僕摩西所命令的，𪜶呣聽呣守伊。 |
| 18:13 | 希西家王十四年，亞述王西拿基立上來攻擊猶大一切堅固的城，取伊。 |
| 18:14 | 猶大王希西家差人去拉吉見亞述王，講：「我有罪啦，求你離開我；見你罰我的，我欲擔當。」對按呢亞述王派猶大王希西家銀三百他連得，金三十他連得。 |
| 18:15 | 希西家就將耶和華殿內及王宮府庫所有的銀攏互伊。 |
| 18:16 | 彼時，希西家剝耶和華殿門的金及猶大王希西家安佇柱裡許個金，互亞述王。 |
| 18:17 | 亞述王對拉吉差他珥探、拉伯撒利，及拉伯沙基導大隊兵去耶路撒冷，希西家王遐。𪜶上去到耶路撒冷，已經到，就來徛佇頂池的水溝邊，就是佇漂布師傅的田的大路。 |
| 18:18 | 𪜶喉叫王的時，就有管家的希勒家的子以利亞敬，及書記舍伯那及史官亞薩的子約亞，出來見𪜶。 |
| 18:19 | 拉伯沙基對𪜶講：「恁去給希西家講，亞述王、大王按呢講：『你所倚靠的是倚靠甚麼？ |
| 18:20 | 你講有計謀有氣力通交戰，這是空空的話若定。你到底倚靠是誰才背叛我啊？ |
| 18:21 | 看啊，你所倚靠的埃及是彼個𤿎破的蘆竹枴；人若倚伊，就會刺入伊的手。埃及王法老對一切倚靠伊的人也是按呢。 |
| 18:22 | 恁若給我講：阮倚靠耶和華──阮的上帝，此個耶和華豈呣是希西家曾廢伊的山頭壇及伊許個祭壇，也曾對猶大及耶路撒冷的人講：恁著佇耶路撒冷佇此個壇前敬拜的嗎？ |
| 18:23 | 今請你用準當互我的主亞述王，我互你二千隻馬，看你彼面會備辦人騎伊抑𣍐。 |
| 18:24 | 若𣍐，豈可會拍退我的主諸個第一細的奴僕中一個軍長？也竟然倚靠埃及愛得著戰車及馬兵啊？ |
| 18:25 | 今我上來攻擊毀滅此個地，豈無耶和華的意思嗎？耶和華吩咐我講：你上去攻擊毀滅此個地。』」 |
| 18:26 | 希勒家的子以利亞敬及舍伯那、約亞，對拉伯沙基講：「求你用亞蘭的話及你的奴僕講，因為阮會曉聽；呣通用猶大的話及阮講，互城頂的百姓耳孔聽見。」 |
| 18:27 | 拉伯沙基講：「我的主差我來，豈是對你的主及你講諸個話嗎？豈呣是對坐佇城頂的人講、互𪜶及恁平平食家己的糞、飲家己的尿嗎？」 |
| 18:28 | 拉伯沙基就徛啲，用猶大的話大聲叫講：「恁著聽亞述王、大王的話！ |
| 18:29 | 王按呢講：『恁呣通互希西家所騙；因為伊𣍐會救恁脫離王的手。 |
| 18:30 | 也莫得聽希西家教恁倚靠耶和華，講耶和華的確欲救咱，此個城的確無交佇亞述王的手。』 |
| 18:31 | 莫得聽希西家的話！因為亞述王按呢講：『恁著及我和好，出來投降我，逐人就通食家己的葡萄樹及無花果樹的果子，飲家己的井水。 |
| 18:32 | 聽候我導恁到一個地及恁本地無各樣，就是有五穀及新酒的地，有米糧及葡萄園的地，有橄欖油及蜜的地，互恁活啲無死。希西家引誘恁，講耶和華欲拯救咱；恁莫得聽伊的話。 |
| 18:33 | 列國的上帝豈有一個曾救伊的國脫離亞述王的手嗎？ |
| 18:34 | 哈瑪及亞珥拔的上帝佇叨落啊？西法瓦音、希拿、以瓦的上帝佇叨落啊？𪜶豈曾救撒瑪利亞脫離我的手嗎？ |
| 18:35 | 諸個國的上帝有是誰曾救家己的國脫離我的手啊？莫卻耶和華豈會救耶路撒冷脫離我的手啊？』」 |
| 18:36 | 百姓靜靜，也無應一句，因為王曾吩咐講：「莫得應伊。」 |
| 18:37 | 彼時，希勒家的子管家的以利亞敬及書記舍伯那，及史官亞薩的子約亞，攏拆裂衫，來到希西家遐，將拉伯沙基的話給伊講。 |
