走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
列王紀上下兩卷所記述每一王的歷史都以他是否對 神盡忠為標準。對 神盡忠，國就興盛；拜偶像，違背 神命令，國就蒙受禍患。北國諸王都經不起考驗；南國諸王的記錄有好的也有壞的。列王紀上卷中，耶和華的先知們佔有重要的地位。他們勇敢地代 神發言，警告人民不可拜偶像，不可違背 神的命令。其中傳誦最廣的是以利亞跟巴力的假先知們鬥爭的記述
| 1:1 | 大衛王歲多年老，雖然給伊蓋被，猶原𣍐燒。 |
|---|---|
| 1:2 | 伊許個奴僕就給伊講：「著給我的主我的王尋一個在室女，互伊徛佇王的面前來奉承伊，閣睏佇你的胸前，通互我的主我的王得著燒。」 |
| 1:3 | 就佇以色列的四境尋娞的查某囝仔，尋著書念一個女子名亞比煞，帶到王遐。 |
| 1:4 | 此個查某囝仔娞到極，伊奉承王，伺候伊，總是王無親近伊。 |
| 1:5 | 彼時，哈及的子亞多尼雅自高，講：「我欲做王」，就為家己備辦車、馬兵，閣五十人走佇伊的頭前。 |
| 1:6 | 伊的老父平時呣曾互伊憂悶，呣曾對伊講：「你怎樣按呢做？」伊生做不止好，伊出世佇押沙龍的尾後。 |
| 1:7 | 伊及洗魯雅的子約押，及祭司亞比亞他參詳；𪜶就隨亞多尼雅，來幫助伊。 |
| 1:8 | 總是祭司撒督，及耶何耶大的子比拿雅、先知拿單、及示每、利以，及大衛的勇士攏無為亞多尼雅。 |
| 1:9 | 亞多尼雅佇近隱羅結、瑣希列的石磐邊刣羊、牛，及肥的精牲，請伊的眾兄弟，就是王的子，以及猶大所有做王的人臣的眾人； |
| 1:10 | 獨獨先知拿單及比拿雅以及勇士，及伊的小弟所羅門，伊攏無請𪜶。 |
| 1:11 | 拿單給所羅門的老母拔示巴講：「哈及的子亞多尼雅做王啦，你無聽見嗎？咱的主大衛也呣知。 |
| 1:12 | 今你來，我替你打算，通保全你的生命及你的子所羅門的生命。 |
| 1:13 | 你入去見大衛王，給伊講：『我的主我的王啊，你豈呣曾對你的女婢咒誓講：你的子所羅門欲續接我做王，伊欲坐我的位嗎？怎樣亞多尼雅做王啊？』 |
| 1:14 | 你佇遐及王講話的時，我也隨你的尻脊後入去，來干證你的話是實。」 |
| 1:15 | 拔示巴入去房內見王，王真老，書念的查某囝仔亞比煞啲伺候王。 |
| 1:16 | 拔示巴鞠躬拜王；王講：「你欲甚麼？」 |
| 1:17 | 伊給伊講：「我的主啊，你曾指耶和華──你的上帝來對你的女婢咒誓講：『你的子所羅門欲續接我做王，伊欲坐佇我的位。』 |
| 1:18 | 看啊，今亞多尼雅做王，我的主我的王你也呣知。 |
| 1:19 | 伊有刣多多牛、肥的精牲，及羊，請王的眾子及祭司亞比亞他，及軍長約押；獨獨你的奴僕所羅門，伊無請。 |
| 1:20 | 我的主我的王啊，以色列眾人的目睭攏啲看你，聽候你給𪜶講，是誰欲續接我的主我的王來坐伊的位。 |
| 1:21 | 若無，到我的主我的王及列祖相及睏了後，我及我的子所羅門欲算做有罪的人。」 |
| 1:22 | 看啊，伊猶啲及王講話的時，先知拿單也入來。 |
| 1:23 | 有人給王講：「先知拿單佇遮。」拿單入去王的面前，仆佇地裡拜王。 |
| 1:24 | 拿單講：「我的主我的王，你豈有講『亞多尼雅欲續接我做王，欲坐我的位』嗎？ |
| 1:25 | 因為今仔日伊落去，刣多多牛、及肥的精牲，及羊，請王的眾子及諸個軍長，及祭司亞比亞他；看啊，𪜶佇伊的面前飲食，就講：『願亞多尼雅王萬歲！』 |
| 1:26 | 獨獨我，就是你的奴僕及祭司撒督，及耶何耶大的子比拿雅，以及你的奴僕所羅門，伊攏無請。 |
| 1:27 | 這是我的主我的王所做？也無給你的奴僕講，是誰欲續接我的主我的王，坐伊的位嗎？」 |
| 1:28 | 大衛王應講：「給我叫拔示巴來。」伊就入來王的面前，佇王的面前徛啲。 |
| 1:29 | 王咒誓講：「我指救我的生命脫離一切的患難、永活的耶和華來講。 |
| 1:30 | 我既然指耶和華──以色列的上帝對你咒誓講：你的子所羅門欲續接我做王，伊欲坐我的位來替我。我今仔日欲照按呢行。」 |
| 1:31 | 拔示巴就鞠躬仆佇地裡，拜王，講：「願我的主大衛王萬萬歲！」 |
| 1:32 | 大衛王閣講：「給我叫祭司撒督、先知拿單，及耶何耶大的子比拿雅來！」𪜶就攏來王的面前。 |
| 1:33 | 王給𪜶講：「著導恁的主許個奴僕及恁去，互我的子所羅門騎我的騾，互伊落去到基訓； |
| 1:34 | 佇遐祭司撒督及先知拿單著用油抹伊做以色列王；恁也著歕哨角，講：『願所羅門王萬歲！』 |
| 1:35 | 然後隨伊上來，伊欲來坐我的位，續接我做王。因為我設立伊做以色列及猶大的君王。」 |
| 1:36 | 耶何耶大的子比拿雅應王講：「阿們！願耶和華──我的主我的王的上帝也按呢講。 |
| 1:37 | 耶和華怎樣及我的主我的王佇啲，願伊照按呢及所羅門佇啲，閣互伊的國位比我的主大衛王的國位閣卡大。」 |
| 1:38 | 對按呢，祭司撒督、先知拿單、耶何耶大的子比拿雅，及基利提人、比利提人攏落去，互所羅門騎大衛王的騾，送伊到基訓。 |
| 1:39 | 祭司撒督就對布棚內提貯油的角，用油抹所羅門。人就歕哨角，眾百姓攏講：「願所羅門王萬歲！」 |
| 1:40 | 眾百姓隨伊上來，閣歕笛仔，大大歡喜，致到地因為𪜶的聲到欲裂開。 |
| 1:41 | 亞多尼雅以及及伊佇啲許個人客抵仔食桌息，聽見；約押聽見哨角的聲就講：「城內怎樣有嘩嘩哮的聲啊？」 |
| 1:42 | 伊猶啲講的時，看啊，祭司亞比亞他的子約拿單來。亞多尼雅給伊講：「入來！你是妥當人，必定是報好消息。」 |
| 1:43 | 約拿單應亞多尼雅講：「有影咱的主大衛王已經設立所羅門做王。 |
| 1:44 | 王差祭司撒督、先知拿單、耶何耶大的子比拿雅，及基利提人、比利提人及所羅門去，𪜶互伊騎王的騾。 |
| 1:45 | 祭司撒督及先知拿單佇基訓已經抹伊做王。𪜶攏對遐上來真歡喜，致到城應聲，這就是恁所聽見的聲； |
| 1:46 | 閣所羅門已經坐國位。 |
| 1:47 | 王的人臣也來給咱的主大衛王祝福，講：『願你的上帝互所羅門的名比你的名卡贏；互伊的國位比你的國位卡大。』王就佇床裡俯落去拜。 |
| 1:48 | 王也按呢講：『耶和華──以色列的上帝是應該謳咾的；因為伊賞賜我有一人今仔日坐我的位，我也親目看見。』」 |
| 1:49 | 許個及亞多尼雅佇啲的人客攏驚惶起來，逐人行𪜶的路。 |
| 1:50 | 亞多尼雅為著所羅門就驚，起來，去擒壇角。 |
| 1:51 | 有人給所羅門講：「看啊，亞多尼雅驚所羅門王，因為伊擒壇角，講：『願所羅門王今仔日對我咒誓，的確無用刀刣死伊的奴僕。』」 |
| 1:52 | 所羅門講：「伊若欲做好人，一支頭毛也𣍐磕落佇地裡；若看伊有歹，就的確著死。」 |
| 1:53 | 所羅門王就差人去，𪜶就帶伊對壇裡落來，伊就來，拜佇所羅門王的面前；所羅門給伊講：「你倒去你的厝！」 |
- 本章節結束 -
下一章