經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
16:1 | 耶和華的話臨到哈拿尼的子耶戶,攻擊巴沙講: |
---|---|
16:2 | 「我已經對塵埃的中間舉起你,設立你做我的百姓以色列的人君,你竟然行耶羅波安的路,互我的百姓以色列犯罪,對𪜶的罪激我的受氣, |
16:3 | 看啊,我欲一盡除巴沙及伊的家,我也欲互你的家親像尼八的子耶羅波安的家一樣。 |
16:4 | 凡若屬巴沙的人,死佇城裡的,狗欲食伊,死佇田野的,空中的鳥欲食伊。」 |
16:5 | 巴沙其餘的事,及伊所行的以及伊的能力,豈無攏記佇以色列列王的記錄嗎? |
16:6 | 巴沙及伊的列祖同睏,埋葬佇得撒。伊的子以拉續接伊做王。 |
16:7 | 閣耶和華的話臨到哈拿尼的子先知耶戶,攻擊巴沙也攻擊伊的家,因為伊佇耶和華的目睭前所行一切的歹,用伊的手的所做來激伊的受氣,親像耶羅波安的家一樣,閣因為伊拍死伊的全家。 |
16:8 | 猶大王亞撒二十六年,巴沙的子以拉佇得撒坐位做以色列王共二年。 |
16:9 | 有管理伊的戰車的一半的人臣心利背叛伊。當伊佇得撒就是佇得撒管家亞雜的厝食酒醉的時, |
16:10 | 心利就入去拍死伊,篡伊的位。這是猶大王亞撒二十七年的事。 |
16:11 | 心利起頭做王當坐位的時就刣巴沙全家,無論親人朋友,攏無給伊留一個查甫丁。 |
16:12 | 親像按呢,心利滅巴沙全家,抵抵照耶和華託先知耶戶所講攻擊巴沙的話。 |
16:13 | 這是因為巴沙一切的罪,及伊的子以拉的罪,𪜶二人所犯著的,也互以色列人犯著,用虛假的事來激耶和華──以色列的上帝的受氣。 |
16:14 | 以拉其餘的事,見伊所行的,豈無攏記佇以色列諸個王的記錄嗎? |
16:15 | 猶大王亞撒二十七年,心利佇得撒做王七日。彼時百姓抵仔紮營圍攻非利士的基比頓。 |
16:16 | 佇營中的百姓聽見講心利背叛,閣刣死王,所以以色列眾人,就彼日佇營中設立軍長暗利做以色列王。 |
16:17 | 暗利及以色列眾人,對基比頓上去,圍困得撒。 |
16:18 | 心利看見城已經破,就入王宮的衛所,放火燒王宮,家己死佇內面。 |
16:19 | 這是因為伊所犯的罪,是行耶和華所看做歹的,行耶羅波安的路,行伊所犯的罪,閣互以色列人犯罪。 |
16:20 | 心利其餘的事及伊所行背叛的事,豈無記佇以色列諸個王的記錄嗎? |
16:21 | 彼時,以色列百姓分做二旁:百姓一半隨基納的子提比尼,欲設立伊做王;閣一半隨暗利。 |
16:22 | 總是隨暗利的百姓贏過隨基納的子提比尼的百姓。提比尼死,暗利就做王。 |
16:23 | 猶大王亞撒三十一年,暗利坐位做以色列王共十二年;佇得撒做王六年。 |
16:24 | 暗利用銀二他連得對撒瑪買撒瑪利亞山,佇山頂起造,就照彼個山的原主撒瑪的名,給所起的城號名叫撒瑪利亞。 |
16:25 | 暗利行耶和華看做歹的事,比伊以前一切的王閣卡歹。 |
16:26 | 因為伊行尼八的子耶羅波安的路,及伊互以色列人犯罪的罪,用虛假的事來激耶和華──以色列的上帝的受氣。 |
16:27 | 暗利其餘所行的事,及伊所顯出的能力,豈無記佇以色列諸個王的記錄嗎? |
16:28 | 暗利及伊的列祖同睏,埋葬佇撒瑪利亞。伊的子亞哈續接伊做王。 |
16:29 | 猶大王亞撒三十八年,暗利的子亞哈坐位做以色列王。暗利的子亞哈佇撒瑪利亞做以色列王二十二年。 |
16:30 | 暗利的子亞哈行耶和華看做歹的事,比伊以前一切的王閣卡歹, |
16:31 | 伊行尼八的子耶羅波安的罪;猶久掠做小可,閣娶西頓王謁巴力的查某子耶洗別做某,去服事巴力來拜伊, |
16:32 | 伊佇撒瑪利亞所起巴力的廟,佇廟內給巴力起壇。 |
16:33 | 亞哈閣造亞舍拉,亞哈所行的激耶和華──以色列的上帝的受氣,比伊以前的以色列列王閣卡傷重。 |
16:34 | 當伊坐位的時,有伯特利人希伊勒起耶利哥城;下地基的時,死大子亞比蘭;下門的時,死煞尾子西割,抵照耶和華託嫩的子約書亞所講的話。 |