走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 17:1 | 屬基列徛起的百姓提斯比人以利亞對亞哈講：「我指永活耶和華──以色列的上帝，就是我徛佇伊的面前者來講，此幾年我若無講，欲無露水，無雨。」 |
|---|---|
| 17:2 | 耶和華的話臨到以利亞講： |
| 17:3 | 「你著離開遮越對東勢去，匿佇約但河的東勢基立溪邊。 |
| 17:4 | 你欲飲彼個溪的水，我已經命令烏鴉佇遐供給你。」 |
| 17:5 | 伊就去，照耶和華的話來行，去踮佇約但東勢的基立溪。 |
| 17:6 | 早起時烏鴉給伊帶餅及肉，下昏時也帶餅及肉，伊飲溪裡的水。 |
| 17:7 | 後來溪水乾，因為彼個地方無雨水。 |
| 17:8 | 耶和華的話臨到伊講： |
| 17:9 | 「你起來去到西頓的撒勒法，徛起佇遐；看啊，我已經命令彼所在一個守寡人養飼你。」 |
| 17:10 | 伊就起來去撒勒法。到城門的時，抵當有一個守寡的人佇彼所在啲拾柴，以利亞就叫伊講：「求你用器具舀淡薄水來互我飲。」 |
| 17:11 | 伊去舀的時，以利亞閣叫伊講：「請你順手提淡薄餅來互我！」 |
| 17:12 | 婦仁人講：「我指永遠的耶和華──你的上帝來講，我無一個餅，只有一把仔麵粉佇桶裡，及淡薄油佇瓶裡；看啊，我拾二支柴，欲倒去為著我及我的子煏伊；阮通食伊，才死！」 |
| 17:13 | 以利亞給伊講：「免驚！去啊！照你所講的來行。總是代先給我做一個細的餅帶來互我，然後為著你及你的子做伊。 |
| 17:14 | 因為耶和華──以色列的上帝按呢講：桶內的麵粉𣍐減少，瓶內的油𣍐了，到耶和華落雨佇地上的日。」 |
| 17:15 | 婦仁人就去，照以利亞的話來行。婦仁人及伊的家，及以利亞食多多日。 |
| 17:16 | 桶內的麵粉無減，瓶內的油無了，抵照耶和華託以利亞所講的話。 |
| 17:17 | 諸個代誌了後，此個婦仁人就是彼家的主人，伊的子破病；病真傷重，致到伊無一條氣絲。 |
| 17:18 | 婦仁人給以利亞講：「上帝的奴僕啊，我及你甚麼干涉？你來我遮互上帝記得我的罪，互我的子死啊？」 |
| 17:19 | 以利亞給伊講：「將你的子交我。」以利亞就對婦仁人的胸前抱去，帶到所踮的樓，下佇家己的床， |
| 17:20 | 就求叫耶和華講：「耶和華──我的上帝啊，你豈閣降災禍佇我所及伊住的守寡人，害死伊的子啊？」 |
| 17:21 | 以利亞就仆佇囝仔的身軀三擺，求耶和華講：「耶和華──我的上帝啊，求你互此個囝仔回魂！」 |
| 17:22 | 耶和華聽以利亞的聲，囝仔的魂就復倒，伊就活。 |
| 17:23 | 以利亞就抱彼個囝仔對樓頂落來，入厝交互伊的老母，以利亞講：「看啊，你的子活啦！」 |
| 17:24 | 婦仁人對以利亞講：「今我知你是上帝的奴僕，你所講耶和華的話是真實。」 |
