走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 3:1 | 所羅門及埃及王法老結親，娶法老的查某子做某，帶伊入大衛城，聽候伊起家己的厝及耶和華的殿，以及耶路撒冷四圍的城牆完工。 |
|---|---|
| 3:2 | 當時，猶未有為耶和華的名起殿，所以百姓猶原佇山頭壇獻祭。 |
| 3:3 | 所羅門疼耶和華，行伊的老父大衛的法律，獨獨佇山頭壇獻祭燒香。 |
| 3:4 | 王去基遍獻祭；因為佇遐有極大的山頭壇，所羅門佇壇頂獻燒祭的精牲一千隻。 |
| 3:5 | 佇基遍，暝時佇夢中，耶和華對所羅門出現，上帝講：「你愛我賞賜你甚麼？通對我求。」 |
| 3:6 | 所羅門講：「你曾施大恩互你的奴僕──我的父大衛照伊用誠實、公義、正直的心及你佇啲，行佇你的面前，你也給伊留此個大恩典，就是賞賜伊一個子坐伊的位，親像今仔日按呢。 |
| 3:7 | 耶和華──我的上帝啊，今你互你的奴僕續接我的老父大衛做王；總是我是囝仔，呣知著怎樣出入。 |
| 3:8 | 你的奴僕踮佇你所揀的百姓中，諸個百姓多到𣍐算得，也算𣍐了。 |
| 3:9 | 求你賞賜你的奴僕智慧的心，通判斷你的百姓，來分別好歹。因為是誰會判斷你即多的百姓啊？」 |
| 3:10 | 因為所羅門求這，主歡喜伊的話。 |
| 3:11 | 上帝對伊講：「你既然求這，無為家己求歲壽、無為家己求好額，也無求滅絕你的對敵的生命，單單為家己求智慧通分別審判的理， |
| 3:12 | 看啊，我照你的話來做，我賞賜你聰明智慧的心，致到你以前無人親像你，你以後也無有人起來親像你。 |
| 3:13 | 你所無求的，我也互你，就是好額、尊貴，互你佇世間的日子，列王無一個會比得你。 |
| 3:14 | 你若行我的道路，守我的律例、及我的誡命，學你的老父大衛所行的，我就欲互你長歲壽。」 |
| 3:15 | 所羅門睏醒，知是眠夢。就去耶路撒冷，徛佇耶和華的約櫃前，獻燒祭及謝恩祭，閣為著伊許個人臣排設筵席。 |
| 3:16 | 有一日，二個妓女來王遐，徛佇王的面前。 |
| 3:17 | 一個婦仁人講：「我的主啊，我及此個婦仁人相及住一間厝；我及伊佇厝內生一個子。 |
| 3:18 | 我生子了後第三日，此個婦仁人也生囝仔。阮相及徛起，除阮二人以外，厝內無別人及阮佇啲。 |
| 3:19 | 暝時，此個婦仁人的子死，因為伊睏的時壓著伊。 |
| 3:20 | 伊半暝起來，趁你的女婢啲睏，對我的身邊抱我的囝仔去，下佇伊的胸前，將伊的死囝仔下佇我的胸前。 |
| 3:21 | 天欲光的時，我起來欲互我的囝仔食奶，無拍算，囝仔已經死；到天光，我詳細看，呣是我所生的子。」 |
| 3:22 | 彼個婦仁人講：「無，活的是我的子，死的是你的子。」此個婦仁人講：「無，死的是你的子，活的是我的子。」𪜶佇王的面前按呢相諍。 |
| 3:23 | 王講：「此個婦仁人講『活的子是我的，死的子是你的』，彼個婦仁人講『無，死的子是你的，活的子是我的』」， |
| 3:24 | 王講：「給我抬刀來！」就抬刀到王的面前。 |
| 3:25 | 王講：「將活的囝仔破做二旁，一旁互彼個，一旁互此個。」 |
| 3:26 | 活的囝仔的老母為著家己的子，心親像火啲𤏸，就對王講：「我的主啊，將活的子互彼個婦仁人，千萬呣通互伊死！」彼個婦仁人講：「此個囝仔莫得歸你，也莫得歸我，破伊，通！」 |
| 3:27 | 王應講：「將活的囝仔互此個婦仁人，千萬呣通刣伊；因為伊實在是伊的老母。」 |
| 3:28 | 以色列眾人聽見王所判斷的案，就攏敬畏伊；因為看見伊的心內有上帝的智慧，來判斷。 |
