走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 7:1 | 所羅門起家己的厝，十三年久厝才起好； |
|---|---|
| 7:2 | 閣起黎巴嫩樹林的厝，長一百肘，闊五十肘，高三十肘，有柏香柴的柱四鑆，柱頂有柏香柴的楹。 |
| 7:3 | 頂面用柏香柴蓋伊，蓋佇四十五支柱頂的楹，每鑆十五支柱。 |
| 7:4 | 閣有窗門三鑆，窗及窗相對，三鑆攏是按呢。 |
| 7:5 | 諸個門及門豎是用柴做的攏是四方，有窗門三鑆，窗及窗相對，三鑆攏是按呢。 |
| 7:6 | 閣起有柱的兩廊，長五十肘，闊三十肘；佇𪜶的頭前閣有兩廊，佇𪜶的頭前有柱及戶椗。 |
| 7:7 | 閣起座位的廊就是審判的廊，通佇遐審判，此個廊對地板到天羅板用柏香柴蓋。 |
| 7:8 | 所羅門家己所欲徛的厝；另外有一間院佇廊的內面起造的法相同。所羅門娶法老的查某子，也給伊起一間厝，及此個廊相同。 |
| 7:9 | 起諸個攏是用寶貝的石，照寸尺來拍好的石，內外用鋸仔鋸的；對地基到簾簷，對外面到大院，攏是按呢。 |
| 7:10 | 地基是貴氣的石是大塊石，有十肘的石，有八肘的石； |
| 7:11 | 頂面有貴氣的石照寸尺拍好的石，也有柏香柴。 |
| 7:12 | 大院周圍有拍好的石三勻、柏香柴一勻，攏親像耶和華殿的內院及殿的廊。 |
| 7:13 | 所羅門王差人對推羅帶戶蘭來。 |
| 7:14 | 伊是拿弗他利支派中一個守寡人的子，伊的老父是推羅人，是拍銅師傅。戶蘭有智慧、聰明、本事滿滿，𠢕拍逐項的銅器。伊來所羅門王遐，做伊一切的工。 |
| 7:15 | 伊製造二支銅柱，每支高十八肘，柱的周圍十二肘； |
| 7:16 | 閣用銅來鑄二個柱枓下佇柱頂，此個柱枓高五肘，彼個柱枓高也五肘。 |
| 7:17 | 柱頂的柱枓有刺一目一目的網仔及一環一環的鍊仔，此個柱枓有七個，彼個柱枓也有七個。 |
| 7:18 | 伊造柱佇一個網仔的頂面的四圍有石榴二鑆，用伊來遮蓋柱頂的柱枓，彼個柱枓也是按呢。 |
| 7:19 | 廊的內面柱頂的柱枓，有刻百合花四肘。 |
| 7:20 | 二支柱頂近網仔邊肨圓的所在有柱枓，閣有石榴二百粒佇第二個柱枓，逐鑆圍伊。 |
| 7:21 | 伊徛二支柱佇殿的兩廊：徛佇正旁的，名叫雅斤；徛佇倒旁的，名叫波阿斯。 |
| 7:22 | 佇柱頂刻百合花。按呢，造柱的工就明白。 |
| 7:23 | 伊閣鑄一個銅海，款式是圓的，高五肘，對此旁到彼旁十肘，周圍三十肘。 |
| 7:24 | 佇伊的墘的下面，有匏仔的款圍伊；每肘十粒，來圍彼個銅海，匏仔有二鑆，鑄銅海的時續鑄的。 |
| 7:25 | 銅海靠佇十二隻銅牛的頂面：三隻向北，三隻向西，三隻向南，三隻向東；銅海下佇牛的頂面，牛尾向內面。 |
| 7:26 | 銅海厚一巴掌的闊，伊的墘親像杯的墘，親像百合花，通貯二千罷特。 |
| 7:27 | 伊用銅創十個座，每座長四肘，闊四肘，高三肘。 |
| 7:28 | 逐個座的款式是按呢：攏有隔堵，伊的堵佇角的所在相接， |
| 7:29 | 佇伊的角相接的所在，堵的頂面有獅及牛，及𠼻𡀔兵；佇角相接的所在的頂面有小座，獅及牛的下面有垂古簷窗的鬚。 |
| 7:30 | 逐個座有四個銅輪及銅的軸心。伊的四腳各有架，架鑄佇盆的下面，逐個邊仔有古簷窗的鬚。 |
| 7:31 | 伊的嘴佇枓的內面向頂一肘，伊的嘴是圓的，親像小座的款式，一肘半，佇伊的嘴有雕刻，伊的堵是四方的，呣是圓的。 |
| 7:32 | 四個輪佇堵的下面，輪的軸心及座相連，逐個輪高一肘半。 |
| 7:33 | 輪的款親像車輪的款；伊的軸心、伊的外環、伊的軹、伊的內環攏是鑄的。 |
| 7:34 | 座的四角有四個架，架及座連做一個。 |
| 7:35 | 座的頂面有圓的緣，高半肘；座的頂面有伊的托及伊的堵，攏及座連做一個。 |
| 7:36 | 伊的托的板及伊的堵的頂面，伊刻𠼻𡀔兵、及獅，及棗樹，照伊的空位，四圍有結古簷窗的鬚。 |
| 7:37 | 伊照按呢創十個座，𪜶的鑄法、寸尺、款式，攏相同。 |
| 7:38 | 閣造銅盆十個，每盆通貯四十罷特。逐個盆直徑四肘，十個座的頂面，逐個座下一個盆。 |
| 7:39 | 許個座五個下佇殿的正旁，五個下佇殿的倒旁；閣用銅海下佇殿的正旁，佇東勢的南旁。 |
| 7:40 | 戶蘭閣創盆、托仔，及盤。對按呢，戶蘭為著所羅門王做完耶和華殿一切的工。 |
| 7:41 | 就是：二支柱及柱頂的柱枓的二粒球；以及蓋佇柱頂柱枓的球二個網； |
| 7:42 | 為著二個網做四百粒石榴，一個網有二鑆的石榴，來蓋柱頂柱枓的二粒球； |
| 7:43 | 十個座及座頂十個盆； |
| 7:44 | 銅海一個及銅海下面十二隻牛； |
| 7:45 | 盆、托仔、盤。諸個一切攏是戶蘭為所羅門王做耶和華殿的器具，攏用光明的銅來做的， |
| 7:46 | 王佇約但的平洋、佇疏割及撒拉但的中間佇粘土的地鑄成的。 |
| 7:47 | 諸個一切的器具所羅門攏無過秤；因為極其多，銅的輕重也𣍐得通知。 |
| 7:48 | 所羅門也做耶和華殿內一切的器具，就是金壇及排列餅的桌用金做的； |
| 7:49 | 後殿的頭前的燈台：正旁五個，倒旁五個，攏用好金做的，伊的花、伊的燈、伊的鉗，用金做的， |
| 7:50 | 伊的杯、伊的剪刀、伊的碗、伊的匙、伊的火鼎，是用好金做的，閣有門臼，就是後殿、至聖所的門臼，及彼個厝，前殿的門臼，攏用金做的。 |
| 7:51 | 按呢，所羅門王做完耶和華殿一切的工，所羅門將伊的老父大衛所獻的物帶入去，銀金及器具下佇耶和華殿的府庫。 |
