走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 18:1 | 過多多日，佇第三年，耶和華的話臨到以利亞講：「你去互亞哈看見你；我欲落雨佇地上。」 |
|---|---|
| 18:2 | 以利亞就去，欲互亞哈看見。彼時，撒瑪利亞飢荒真大； |
| 18:3 | 亞哈就叫伊的管家者俄巴底來。（俄巴底不只敬畏耶和華， |
| 18:4 | 因為耶洗別滅耶和華諸個先知的時，俄巴底用先知一百人囥佇洞內，五十人做一組，用餅及水養飼𪜶。） |
| 18:5 | 亞哈給俄巴底講：「遍行此個地，到一切的水泉邊及一切的溪邊；豈採咱會得著青草，通互馬騾活啲，免得精牲一盡失落。」 |
| 18:6 | 對按呢𪜶分地欲遍行，亞哈家己行一條路，俄巴底也家己行一條路。 |
| 18:7 | 俄巴底佇路裡，以利亞抵著伊，俄巴底認得伊，就仆落去，講：「你是我的主以利亞嗎？」 |
| 18:8 | 應講：「是。你去給你的主講，以利亞佇遮。」 |
| 18:9 | 俄巴底講：「我有犯甚麼罪，你竟然欲將你的奴僕交佇亞哈的手，來害死我嗎？ |
| 18:10 | 我指永活的耶和華──你的上帝來講，無一族無一國，我的主無差人到遐尋你。𪜶若講伊無佇遮，就教彼國彼族的人咒誓講，𪜶實在無抵著你。 |
| 18:11 | 今你講，去給你的主講，以利亞佇遮； |
| 18:12 | 我一下離開你，耶和華的神欲帶你到我所呣知的所在。我去給亞哈講，也伊尋你𣍐著，就欲刣死我；總是你奴僕對少年是敬畏耶和華。 |
| 18:13 | 當耶洗別刣耶和華眾先知的時，我所做豈無人給我的主講嗎？就是我將耶和華的先知一百人囥佇洞裡，五十人做一組，用餅及水養伺𪜶。 |
| 18:14 | 今你講，去給你的主講，以利亞佇遮，伊的確會刣死我。」 |
| 18:15 | 以利亞講：「我指永活萬軍的耶和華，就是我徛佇伊的面前者，來講，今仔日我的確欲互亞哈看見我。」 |
| 18:16 | 俄巴底就去見亞哈，給伊講：亞哈就來見以利亞。 |
| 18:17 | 亞哈看見以利亞的時，亞哈就給伊講：「你此個陷害以色列者啊？」 |
| 18:18 | 以利亞應講：「陷害以色列的呣是我，是你及你的老父的家；因為恁棄拺耶和華的誡命，去隨許個巴力。 |
| 18:19 | 今你著差人，聚集以色列眾人及巴力的先知四百五十人，以及亞舍拉的先知四百人食佇耶洗別的桌者，攏去迦密山到我遐。」 |
| 18:20 | 亞哈就差人去以色列眾人遐，招集諸個先知到迦密山。 |
| 18:21 | 以利亞就近眾百姓講：「恁存二樣心無決斷欲到甚麼時啊？若耶和華是上帝，就著趁耶和華；若巴力是上帝就著趁巴力。」百姓無應一句話。 |
| 18:22 | 以利亞給百姓講：「耶和華的先知只有剩我一人；總是巴力的先知有四百五十人。 |
| 18:23 | 今著用二隻牛牨仔互阮，巴力的先知通為家己揀一隻牛仔，切歸塊，下佇柴頂，下面呣通橐火；我料理彼隻牛仔，下佇柴頂，下面也無橐火。 |
| 18:24 | 恁求叫恁的上帝的名，我求叫耶和華的名。彼個用火顯應的上帝，就是上帝。」眾百姓應講：「此個話真好。」 |
| 18:25 | 以利亞對巴力的先知講：「恁為家己揀一隻牛牨仔，代先料理伊，因為恁人額卡多，恁求叫恁上帝的名，獨獨呣通橐火佇下面。」 |
| 18:26 | 𪜶就將所互𪜶的牛𪜶仔去料理伊，對早起到日晝，求叫巴力的名講：「巴力啊，著聽阮！」總是無聲說，也無應答。𪜶佇所起的壇周圍趒跳。 |
| 18:27 | 到中晝，以利亞譏刺𪜶，講：「大聲求叫啦！因為伊是上帝，伊豈採靜靜啲想，抑是退去偏僻的所在，抑是行路，抑是啲睏，恁著叫伊醒。」 |
| 18:28 | 𪜶大聲求叫，照𪜶的例，用刀用槍家己割，致到𪜶的身軀流血。 |
| 18:29 | 對日過晝到獻下昏祭的時，𪜶啲講𪜶的先知話；總是無聲說，無應答也無插𪜶的。 |
| 18:30 | 以利亞給眾百姓講：「恁來近倚我。」眾百姓就近倚伊。伊就閣修理耶和華倒壞的壇。 |
| 18:31 | 以利亞取十二塊石，照雅各的子的支派的數額（此個雅各就是前耶和華的話曾臨到伊講：「以色列欲做你的名者」）， |
| 18:32 | 以利亞用諸個石頭，奉耶和華的名起一座壇，佇壇的周圍開溝，會貯得種子二細亞， |
| 18:33 | 閣排列柴，將牛仔切歸塊下佇柴頂，講：「恁用四個桶貯水滿滿，傾佇燒祭及柴的頂面」； |
| 18:34 | 閣講：「傾第二擺。」𪜶就傾第二擺；閣講：「傾第三擺。」𪜶就傾第三擺。 |
| 18:35 | 水流佇壇的四圍，溝也有水滿滿。 |
| 18:36 | 到獻下昏祭的時，先知以利亞近前來，講：「亞伯拉罕、以撒、以色列的上帝，耶和華啊，求你今仔日互人知你佇以色列做上帝，也知我是你的奴僕，閣是照你的話來行這一切的事。 |
| 18:37 | 耶和華啊，著聽我，著聽我！互此國的百姓知你──耶和華就是上帝，你互𪜶的心越倒轉。」 |
| 18:38 | 耶和華的火就降落，一盡燒伊的燒祭、及柴、及石、及土，閣燒乾溝內的水。 |
| 18:39 | 眾百姓看見，就仆佇地裡，講：「耶和華伊是上帝！耶和華伊是上帝！」 |
| 18:40 | 以利亞給𪜶講：「掠巴力的先知，無容允一個逃走！」𪜶就掠𪜶。以利亞帶𪜶落去到基順溪邊，佇遐刣𪜶。 |
| 18:41 | 以利亞給亞哈講：「你今通上去飲食，因為有大雨的聲。」 |
| 18:42 | 亞哈就上去飲食。以利亞上去迦密山頂，屈身佇地裡，面仆佇二個腳頭窩的中間； |
| 18:43 | 對伊的奴僕講：「你上去，向海看。」奴僕就上去看，講：「攏無甚麼。」伊講：「你閣去。」著到七擺。 |
| 18:44 | 到第七擺伊講：「看見有雲對海裡起來，細細親像人的手。」以利亞講：「你上去給亞哈講，著備辦車落去，免得互雨阻擋。」 |
| 18:45 | 霎仔久的中間，遍天因為風及雲黑暗，落大雨。亞哈就坐車去耶斯列。 |
| 18:46 | 耶和華的手靠佇以利亞的身上，伊就縖腰，佇亞哈的頭前走到耶斯列的城門。 |
