走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 21:1 | 諸個代誌了後，耶斯列人拿伯有葡萄園佇耶斯列，近撒瑪利亞王亞哈的宮。 |
|---|---|
| 21:2 | 亞哈給拿伯講：「你用你的葡萄園互我，我通做菜園，因為是近佇我的宮；我欲用閣卡好的園給你換，抑是你愛銀，我就照價錢互你。」 |
| 21:3 | 拿伯給亞哈講：「用我的祖所留的業互你，此個代誌願耶和華禁止我。」 |
| 21:4 | 亞哈因為耶斯列人拿伯所講的話，就鬱悴無歡喜倒去伊的厝，因為拿伯曾講「我呣用我的祖業互你」，亞哈就倒佇眠床，面向內面，也呣食。 |
| 21:5 | 王后耶洗別到伊遐問伊講：「你的心內憂悶續呣食，是啥緣故啊？」 |
| 21:6 | 伊給伊講：「因為我對耶斯列人拿伯講：『你用你的葡萄園互我，我用銀互你，抑是你若愛，我就用葡萄園換你』；伊講：『我的葡萄園我呣互你。』」 |
| 21:7 | 王后耶洗別給伊講：「你此陣是啲管理以色列國抑呣是？做你起來食，互你的心歡喜，我欲用耶斯列人拿伯的葡萄園互你。」 |
| 21:8 | 就用亞哈的名寫批，用王的印頓伊，寄許個批互拿伯的城互及伊徛起的長老貴族。 |
| 21:9 | 寫佇批裡講：「恁著宣佈禁食，互拿伯坐佇百姓間的高位； |
| 21:10 | 閣設二個匪類佇伊的面前，做干證告伊講：『你謗瀆上帝及王』；然後就拖伊出去用石頭擲死伊。」 |
| 21:11 | 伊城內的人，就是徛起彼個城的長老及貴族，就照耶洗別所寄的話，就是照伊寄互𪜶的批，所寫的來行， |
| 21:12 | 宣佈禁食，互拿伯坐佇百姓間的高位。 |
| 21:13 | 彼二個匪類入去，坐佇伊的面前，匪類當百姓的面前做干證告拿伯講：「拿伯謗瀆上帝及王！」就拖伊出城外，用石頭擲死伊。 |
| 21:14 | 就差人去給耶洗別，講：「拿伯已經互石頭擲死啦。」 |
| 21:15 | 耶洗別聽見拿伯互石頭擲死，耶洗別就給亞哈講：「你起來掌耶斯列人拿伯呣肯為著價錢互你的葡萄園！因為拿伯已經死，無命啦！」 |
| 21:16 | 亞哈聽見拿伯已經死，亞哈就起來，落去耶斯列人拿伯的葡萄園遐欲掌伊。 |
| 21:17 | 耶和華的話臨到提斯比人以利亞講： |
| 21:18 | 「你起來，去見踮佇撒瑪利亞的以色列王亞哈，伊落去拿伯的葡萄園欲掌伊，此陣伊佇遐。 |
| 21:19 | 你著給伊講：『耶和華按呢講：你有刣死人閣掌伊的業嗎？』閣著給伊講：『耶和華按呢講：狗佇甚麼所在舐拿伯的血，狗也欲佇遐舐你的血，就是你本身的血。』」 |
| 21:20 | 亞哈給以利亞講：「我的對敵啊，你尋著我嗎？」伊應講：「我尋著你；因為你賣家己，行耶和華看做歹的事。 |
| 21:21 | 耶和華講：『我欲降災禍互你，欲一盡除你。見屬亞哈的查甫丁，無論受拘束者、抑是自由者，攏佇以色列中剪除伊。 |
| 21:22 | 我欲互你的家親像尼八的子耶羅波安的家，閣親像亞希雅的子巴沙的家；因為你所干犯激動我受氣的事，閣互以色列犯罪。』 |
| 21:23 | 論耶洗別，耶和華也有講：『狗欲食耶洗別佇耶斯列的外城。 |
| 21:24 | 屬亞哈的人，死佇城內的，狗欲食伊，死佇田野的，空中的鳥欲食伊。』」（ |
| 21:25 | 總是無人親像亞哈，因為伊家己賣，行耶和華看做歹的事，是對伊的王后耶洗別教唆伊； |
| 21:26 | 伊行大可惡的事，因為伊隨許個偶像，攏親像亞摩利人一樣，就是耶和華所趕出佇以色列人的面前者。） |
| 21:27 | 亞哈聽見諸個話，就拆裂衫，身軀穿粗麻布，禁食，睏也倒佇粗麻布，閣緩緩仔行。 |
| 21:28 | 耶和華的話臨到提斯比人以利亞講： |
| 21:29 | 「亞哈怎樣家己謙卑佇我的面前，你有看見嗎？因為伊家己謙卑佇我的面前，所以我無欲佇伊活啲的日，降此個災禍；是佇伊的子的日，降此個災禍佇伊的家。」 |
