走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 8:1 | 彼時，所羅門聚集以色列的長老及逐支派的首領，以及以色列人許個族長，到耶路撒冷所羅門王遐，欲將耶和華的約櫃對大衛城──就是錫安──運上來。 |
|---|---|
| 8:2 | 以他念月，就是七月的節期，以色列人攏聚集到所羅門王遐。 |
| 8:3 | 以色列的長老攏來，許個祭司扛約櫃， |
| 8:4 | 𪜶就扛耶和華的櫃，及會幕以及布棚內一切聖的器具上來，祭司及利未人攏扛伊上來。 |
| 8:5 | 所羅門王及聚集到伊遐以色列的全會，佇約櫃前獻羊牛做祭祀，多到𣍐算得，也算𣍐了。 |
| 8:6 | 祭司扛耶和華的約櫃到伊的所在入彼間厝的後殿，到至聖所，下佇𠼻𡀔兵的翅下。 |
| 8:7 | 因為𠼻𡀔兵展開𪜶的翅，佇櫃的所在的頂面，閣𠼻𡀔兵佇彼頂面遮蓋櫃，及伊的槓。 |
| 8:8 | 許個槓真長，槓尾佇後殿前的聖所通看見，佇外面就𣍐看見，到今仔日猶佇遐。 |
| 8:9 | 櫃內只有二塊石碑，就是以色列人出埃及地，耶和華及𪜶立約的時摩西佇何烈山所下的。這以外，無別項物。 |
| 8:10 | 當祭司對聖所出來的時，有雲充滿耶和華的殿； |
| 8:11 | 致到祭司為著雲的緣故𣍐會徛啲服事，因為耶和華的榮光充滿耶和華的殿。 |
| 8:12 | 彼時所羅門講：耶和華曾講，伊欲踮佇黑黑暗暗的所在。 |
| 8:13 | 我已經起此間殿互你徛起，做你永遠住的所在。 |
| 8:14 | 王越轉伊的面祝福以色列會眾，以色列會眾攏徛起來。 |
| 8:15 | 伊講：「耶和華──以色列的上帝是應該謳咾的！因為伊親嘴對我的父大衛所應允的，也親手應驗伊。 |
| 8:16 | 講：『對我導我的百姓以色列出埃及以來，我未曾佇以色列眾支派中揀一個城起殿互──我的名佇遐，獨獨揀大衛治理我的百姓以色列。』 |
| 8:17 | 我的父大衛心內有意思，欲為耶和華──以色列的上帝的名起殿。 |
| 8:18 | 總是耶和華對我的父大衛講：『你的心有意思欲為我的名起殿，你此個意思真好。 |
| 8:19 | 獨獨你呣通起殿，你所親生的子欲為我的名起殿。』 |
| 8:20 | 今耶和華應驗伊所講的話，我照耶和華的話起來續接我的父大衛坐以色列的國位，閣為耶和華──以色列上帝的名起殿。 |
| 8:21 | 我也佇遐為約櫃備辦一所在。櫃內有耶和華的約，就是伊導咱的列祖出埃及的時，及𪜶所立的約。」 |
| 8:22 | 所羅門當以色列會眾的面前，徛佇耶和華的壇前，抬起手向天講： |
| 8:23 | 「耶和華──以色列的上帝啊，佇天頂佇地下，無有上帝親像你守約行仁愛佇你許個奴僕，就是盡心行佇你的面前的； |
| 8:24 | 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。 |
| 8:25 | 耶和華──以色列的上帝啊，你所應允你的奴僕──我的父大衛講：『你的子孫若謹慎𪜶的所做，行佇我的面前親像你行佇我的面前，就屬佇你的欲佇我的面前坐以色列的國位，永無斷。』今求你應驗伊。 |
| 8:26 | 以色列的上帝啊，你對你的奴僕──我的父大衛所講的，求你互伊成做實事。 |
| 8:27 | 「上帝真正欲徛起地上嗎？看啊，天及諸個天的天尚且無夠額互你徛起，何況我所起此間殿啊？ |
| 8:28 | 耶和華──我的上帝啊，願你俯落數念你的奴僕的祈禱懇求，來聽你的奴僕今仔日所祈禱佇你面前的求叫祈禱。 |
| 8:29 | 願你日暝看顧此個殿，就是你所講起我的名欲佇遐的所在；來聽你的奴僕所欲向此所在祈禱的祈禱。 |
| 8:30 | 你的奴僕及你的百姓以色列向此所在祈禱的時，願你聽𪜶的祈求，願你佇天裡，你徛起的所在來聽𪜶，你聽見的時就赦免。 |
| 8:31 | 「人若得罪伊的厝邊，也有人用一個咒誓教伊咒誓，伊若來此間殿佇你的壇前咒誓， |
| 8:32 | 求你佇天裡聽，來辦理伊，審判你諸個奴僕：定歹人的罪，照伊所行的，報應佇伊的頭殼；定義人做義，照伊的義來互伊。 |
| 8:33 | 「設使你的百姓以色列因為得罪你，才刣輸佇對敵的面前，𪜶若歸向你，認你的名，閣佇此間殿祈禱懇求你， |
| 8:34 | 求你佇天裡聽𪜶，來赦免你的百姓以色列的罪，互𪜶倒來你所賞賜𪜶的列祖的地。 |
| 8:35 | 「設使𪜶得罪你，致到天關密無落雨，你刑罰𪜶的時；𪜶若向此所在祈禱，認你的名，離開𪜶的罪， |
| 8:36 | 求你佇天裡聽𪜶，赦免你的奴僕及你的百姓以色列的罪，佇你教示𪜶所著行的好路的時，閣落雨佇你的地，就是你賞賜你的百姓做業的。 |
| 8:37 | 「此個地若有飢荒、瘟疫、枯焦、朽爛、草蜢、剪蟲，抑是𪜶的對敵佇𪜶許個城的地圍困𪜶，無論有甚麼災禍甚麼破病， |
| 8:38 | 或是一人，或是你的百姓以色列的眾人，逐個知家己心內的災禍，向此間殿抬起手，無論怎樣懇求，怎樣祈禱， |
| 8:39 | 願你佇天裡你所徛起的所在來聽伊，來赦免，來施行。你知𪜶的心，照𪜶逐人的行做來款待𪜶（因為世間逐人的心只有你知）， |
| 8:40 | 互𪜶佇你賞賜阮列祖的地一世人敬畏你。 |
| 8:41 | 「論到外邦人呣是屬你的百姓以色列，伊為著你的名對遠遠的所在來的， |
| 8:42 | （因為𪜶聽見你的大名大權能的手，伸出的手）若來向此個殿祈禱， |
| 8:43 | 願你佇天裡你徛起的所在來聽𪜶，照外邦人一切所對你求的來行，互天下萬百姓攏識你的名，敬畏你親像你的百姓以色列一樣；閣互𪜶知我所起此間殿是用你的名來稱者。 |
| 8:44 | 「你的百姓若出去你所差𪜶去的路，及對敵交戰，也向你所揀的城及我為著你的名所起的殿來祈禱耶和華， |
| 8:45 | 願你佇天裡來聽𪜶的祈禱懇求，來給𪜶判斷。 |
| 8:46 | 「你的百姓若得罪你（因為無有無犯罪的人），你受氣𪜶，將𪜶交互對敵致到對敵掠𪜶到對敵的地，或是遠或是近， |
| 8:47 | 𪜶若佇所掠去的地心內倒轉想，來反悔，閣佇掠𪜶的人的地，懇求你講：『阮有罪，阮有悖逆，阮有做歹』； |
| 8:48 | 𪜶若佇受掠去的地就是對敵掠𪜶去的地，盡心盡性歸服你，閣向本地，就是你賞賜𪜶列祖的地及你所揀的城，以及我為著你的名所起的殿來祈禱你， |
| 8:49 | 願你佇天裡你所徛起的所在聽𪜶的祈禱懇求，給𪜶判斷； |
| 8:50 | 閣赦免你的百姓得罪你的，以及𪜶一切得罪你的罪過，互𪜶得著憐憫佇掠𪜶的人的面前，致到掠𪜶的人憐憫𪜶。 |
| 8:51 | 因為𪜶是你的百姓，你的產業，是你導𪜶出埃及對鑄鐵的爐中出來者。 |
| 8:52 | 願你的目睭開看顧你的奴僕的祈禱，及你的百姓以色列的祈禱，來聽𪜶一切對你求的。 |
| 8:53 | 主耶和華啊，因為你曾對地上眾百姓的中間分別𪜶，來做你的產業，是照你導阮的列祖出埃及的時，託你的奴僕摩西所講的。」 |
| 8:54 | 所羅門佇耶和華的壇前腳頭窩跪啲，手伸向天，所對耶和華祈禱懇求的已經祈禱明白，就起來， |
| 8:55 | 伊就徛啲，大聲祝福以色列全會眾，講： |
| 8:56 | 「耶和華是應該著謳咾者！因為伊一切所應允者賞賜平安互伊的百姓以色列，見若託伊的奴僕摩西所應允的好話，無一句落空。 |
| 8:57 | 願耶和華──咱的上帝及咱佇啲，親像伊及咱的列祖佇啲一樣，願伊無離開咱，無放拺咱， |
| 8:58 | 互咱的心歸向伊，來行伊一切的道路，守伊所命令咱的列祖的誡命、伊的律例、伊的法度。 |
| 8:59 | 我今佇耶和華的面前所祈求諸個話，願諸個話日暝近佇咱的上帝──耶和華，閣日日照代誌所合宜的為伊的奴僕判斷，及伊的百姓以色列判斷， |
| 8:60 | 互地上萬百姓知耶和華是上帝，伊以外無別個。 |
| 8:61 | 所以恁的心著純全向耶和華──咱的上帝，遵趁伊的律例，守伊的誡命，親像今仔日的款。」 |
| 8:62 | 王及以色列眾百姓相及佇耶和華的面前獻祭。 |
| 8:63 | 所羅門獻謝恩的祭就是獻互耶和華的，牛二萬二千隻，羊十二萬隻。按呢，王及以色列眾百姓為耶和華的殿行獻殿的禮。 |
| 8:64 | 當彼日，王分別耶和華殿前院中的所在，佇遐獻燒祭、素祭，及謝恩祭的油，因為耶和華頭前的銅壇甚細，𣍐容允得許個燒祭、素祭，及謝恩祭的油。 |
| 8:65 | 彼時，所羅門及以色列眾人，就是對哈馬的路口到埃及的溪，攏及伊聚集做大會，佇耶和華──咱上帝的面前守節筵七日閣七日，共十四日。 |
| 8:66 | 第八日，王差百姓去；𪜶就給王祝福。因為耶和華對伊的奴僕大衛及伊的百姓以色列所施出一切的恩惠，就歡喜心內快樂，逐個倒去𪜶的布棚。 |
