走到哪裡都有麥子
走出你的個人世界 WITH

走到哪裡都有麥子～

聯繫我們

聯繫資訊

新北市永和郵局238號信箱 (02)2926-5882 .0987-300-005 服務信箱：info@awheat.org 捐款支持

線上台語聖經

麥穗田首頁 線上台語聖經

台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

  列王紀上  第11章

章節快速選擇 :   
1
2
3
4
5
6
7
8
9
10
11
12
13
14
15
16
17
18
19
20
21
22
上下篇聖經查閱： 撒母耳記下    列王紀下     回到目錄
11:1 所羅門王佇法老的查某子以外，閣疼多多外邦的查某囝仔，就是摩押、亞捫、以東、西頓，赫人的查某囝仔。
11:2 論到諸個列國，耶和華曾吩咐以色列人講：「恁呣通去𪜶遐，𪜶也呣通來恁遮，因為𪜶會互恁的心偏歪去隨𪜶的上帝。」總是所羅門戀愛許個查某囝仔，及𪜶結聯。
11:3 伊有后妃七百，攏是貴族的；閣有嬪妃三百。諸個女子誘惑伊的心。
11:4 因為所羅門年老的時，伊許個某誘惑伊的心去隨別個上帝，伊的心無純全向耶和華──伊的上帝，親像伊的父大衛的心。
11:5 所羅門去隨西頓人的女神亞斯她錄及亞捫人可惡的物米勒公。
11:6 所羅門行耶和華所看做歹的事，無專心隨耶和華親像伊的老父大衛。
11:7 彼時所羅門為著摩押可惡的物基抹及亞捫人可惡的物摩洛，佇耶路撒冷頭前的山起山頭壇。
11:8 許個外邦的某攏燒香祭祀𪜶的上帝，伊也為著𪜶照按呢做。
11:9 耶和華受氣所羅門，因為伊的心離開耶和華──以色列的上帝，就是曾二擺對伊出現。
11:10 也論到此個事曾命令伊，呣通隨別個上帝，總是伊無守耶和華所命令的。
11:11 所以耶和華對所羅門講：「因為你已經行此個事，無守我所命令你守的約及我的律例，我欲對你來拆裂你的國，賞賜你的奴僕。
11:12 總是，因為你的老父大衛的緣故，我無佇你活啲的日行此個事，獨獨欲對你的子的手拆裂伊。
11:13 總是我無將全國拆裂，欲帶著我的奴僕大衛及我所揀的耶路撒冷，猶留一支派互你的子。」
11:14 耶和華興起一個對敵攻擊所羅門，就是以東人哈達；伊是以東王的後裔。
11:15 前大衛拍以東，伊的軍長約押上去埋葬陣亡的人，將以東的查甫丁攏刣死。
11:16 約押及以色列眾人踮遐六月日，直到將以東的查甫丁一盡剪除。
11:17 彼時哈達猶是細漢的囝仔；哈達及伊的老父人臣中，幾若個以東人走去埃及。
11:18 𪜶對米甸起來，到巴蘭；對巴蘭帶幾若人及𪜶去埃及到埃及王法老遐；法老就用厝互𪜶，派定著的米糧，閣用田地互𪜶。
11:19 哈達佇法老的面前大得著恩惠，法老續用伊的某的小妹就是王后答比匿的小妹互伊做某。
11:20 答比匿的小妹給伊生一個子，名叫基努拔。答比匿給伊斷奶佇法老的王宮，基努拔及法老的眾子相及踮佇法老的王宮。
11:21 哈達佇埃及聽見大衛及伊的列祖相及睏，軍長約押也已經死，哈達就對法老講：「容允我去，互我倒去本國。」
11:22 法老給伊講：「你佇我遮有甚麼欠缺，你竟然愛欲倒去本國啊？」伊應講：「我無欠缺甚麼，總是容允我倒去。」
11:23 上帝閣興起一個對敵攻擊所羅門，就是以利亞大的子利遜。是對伊的主瑣巴王哈大底謝遐逃走來的。
11:24 大衛刣瑣巴人的時，利遜招集人倚伊，做彼黨的頭，去大馬色踮佇遐，佇大馬色做王。
11:25 所羅門活啲的時，哈達做災害以外，利遜也做以色列的對敵。伊怨恨以色列，也做亞蘭人的王。
11:26 尼八的子耶羅波安是以法蓮族洗利達人，伊是所羅門的奴僕也起手攻擊王。伊的老母是守寡人，名叫洗魯阿。
11:27 伊起手攻擊王的緣故照下底所記的，所羅門起米羅，修補伊的老父大衛城的破隙。
11:28 耶羅波安是大勇士。所羅門看見此個少年人殷勤，就派伊管理約瑟的家一切的工。
11:29 彼時，耶羅波安對耶路撒冷出來，示羅人先知亞希雅佇路裡抵著伊；彼時伊有穿一領新衫。𪜶二人佇田裡，以外無別人。
11:30 亞希雅提伊所穿的新衫拆做十二塊，
11:31 給耶羅波安講：「你通提十塊。因為耶和華──以色列的上帝按呢講：『看啊，我欲對所羅門的手拆裂伊的國，將十支派互你。（
11:32 獨獨因為我的奴僕大衛的緣故，及我佇以色列眾支派中所揀的耶路撒冷的緣故，伊猶有一支派。）
11:33 因為𪜶棄拺我，去敬拜西頓人的上帝亞斯他錄、摩押的上帝基抹，及亞捫人的上帝米勒公，無行我的道路，做我看做正直的事，守我的律例法度，親像伊的老父大衛的所做。
11:34 總是我無欲對伊的手搶伊的全國；是欲互伊一世人做君王，是因為我的奴僕大衛的緣故，因為伊是我所揀選的，有守我的律例及法度。
11:35 總是我欲對伊的子的手搶伊的國，用十支派互你，
11:36 用一支派互伊的子，互我的奴僕大衛佇我的面前常常有一葩燈佇耶路撒冷，就是我所揀，通佇遐安置我的名的城。
11:37 我欲取你，你欲做以色列的王，照你的心一切所愛的來管理。
11:38 你若聽我一切所命令你的，行我的道路，做我看做正直的事，守我的律例法度，親像我的奴僕大衛的所做，我就及你佇啲，給你建立堅固的家，親像我給大衛所建立的一樣，閣欲將以色列交互你。
11:39 因為這我欲困苦大衛的後裔，總是無到永遠。』」
11:40 為著按呢所羅門愛欲刣死耶羅波安。耶羅波安就起來逃走去埃及；到埃及王示撒遐，就踮佇埃及，到所羅門死。
11:41 所羅門其餘的事，見伊所行的及伊的智慧豈無攏記佇所羅門的行傳。
11:42 所羅門佇耶路撒冷做以色列全國的王共四十年。
11:43 所羅門及伊的列祖相及睏，埋葬佇伊的老父大衛的城。伊的子羅波安續接伊做王。

- 本章節結束 -

上一章    下一章