走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 14:1 | 耶和華吩咐摩西講： |
|---|---|
| 14:2 | 「癩𰣻者得著清氣的日，伊的規例就是按呢：著導伊去見祭司； |
| 14:3 | 祭司著出營外，祭司著驗伊，看啊，癩𰣻者若伊的癩𰣻症已經好， |
| 14:4 | 祭司著吩咐人為著彼個欲得著清氣的，取二隻清氣活活的鳥及柏香柴、朱紅色的料，及牛膝草。 |
| 14:5 | 祭司著吩咐人刣彼二隻鳥的一隻，佇活水的頂面，佇磁器內。 |
| 14:6 | 論到彼隻活鳥，伊著掠伊，用柏香柴、朱紅色的料及牛膝草及活鳥攏搵佇彼隻刣佇活水頂的鳥的血， |
| 14:7 | 著灑彼個癩欲得著清氣的人七擺，就斷伊做清氣，閣放彼隻活鳥去山裡。 |
| 14:8 | 欲得著清氣的人著洗伊的衣裳，一盡剃伊的毛，用水洗身軀，就清氣；然後通入營，獨獨著佇家己的布棚外徛起七日。 |
| 14:9 | 到第七日，著一盡剃伊的頭毛及嘴鬚、目眉，就是剃伊攏總的毛；閣著洗伊的衫褲，用水洗身軀，就清氣。 |
| 14:10 | 「到第八日，伊著取二隻無瑕疵的羊牨仔及一隻未滿年、無瑕疵的羊種仔，閣著用調和油的麵粉伊法十份三做素祭，及油一羅革。 |
| 14:11 | 行清氣的禮的祭司著將彼個愛得著清氣的人及許個物安置佇會幕門口、耶和華的面前。 |
| 14:12 | 祭司著取羊牨仔的一隻獻做補過失的祭，及油一羅革，攏搖佇耶和華的面前做搖祭； |
| 14:13 | 閣著刣羊牨仔佇聖所的地，就是刣贖罪祭及燒祭的所在。補過失祭著歸互祭司，親像贖罪祭一般樣，是至聖者。 |
| 14:14 | 祭司著提淡薄補過失祭的血，抹佇愛得著清氣的人正旁的耳仔垂，及正手的大哺拇，及正腳的大哺拇。 |
| 14:15 | 祭司著對彼一羅革油的中間提淡薄，倒佇家己倒手的手中心， |
| 14:16 | 祭司著用正手的一支指頭仔搵倒手手中心的油，佇耶和華的面前，用指頭仔灑油七擺。 |
| 14:17 | 祭司將手中所剩的油，抹佇彼個愛得著清氣的人正旁的耳仔垂，及正手的大哺拇，及正腳的大哺拇，就是抹褡佇補過失祭的血頂。 |
| 14:18 | 祭司手中所剩的油，著傾佇彼個愛得著清氣的人的頭殼頂，祭司佇耶和華的面前給伊贖罪。 |
| 14:19 | 祭司著獻贖罪祭，給彼個愛得著清氣的人，為著伊的無清氣贖罪；然後刣彼個燒祭的精牲， |
| 14:20 | 祭司著佇壇頂獻燒祭及素祭，祭司著為伊贖罪，伊就清氣。 |
| 14:21 | 「伊若喪鄉𣍐備辦到許多，就著取一隻羊牨仔做補過失的祭，通搖伊，為伊贖罪；也著帶調和油的幼麵粉伊法十份一做素祭，及油一羅革； |
| 14:22 | 閣照伊的氣力取二隻鳩鵻抑是二隻鴿仔子，一隻做贖罪祭，一隻做燒祭。 |
| 14:23 | 到第八日，為著伊得著清氣，將諸個帶到會幕門口、耶和華的面前，交代祭司。 |
| 14:24 | 祭司著取補過失的羊仔及油一羅革，祭司著搖伊佇耶和華的面前做搖祭。 |
| 14:25 | 伊著刣補過失祭的羊仔，祭司取淡薄補過失祭的血，抹佇彼個愛得著清氣的人正旁的耳仔垂，及正手的大哺拇，及正腳的大哺拇。 |
| 14:26 | 祭司著將淡薄油倒佇家己倒手的手中心， |
| 14:27 | 祭司用倒手裡的油，佇耶和華的面前，用正手的一支指頭仔灑油七擺， |
| 14:28 | 祭司閣用手中的油抹淡薄佇彼個愛得著清氣的人正旁的耳仔垂，及正手的大哺拇，正腳的大哺拇，就是抹佇補過失祭的血的原位。 |
| 14:29 | 祭司手中所剩的油，著抹佇彼個愛得著清氣的人的頭殼，佇耶和華的面前為著伊贖罪。 |
| 14:30 | 伊著照伊的氣力獻許個鳩鵻的一隻抑是鴿仔子的一隻， |
| 14:31 | 就是照伊所會的，一隻做贖罪祭，一隻做燒祭，及素祭相及獻；祭司著佇耶和華的面前給彼個愛得著清氣的人贖罪。 |
| 14:32 | 人患著癩的症頭，也無力通備辦得著清氣的禮物，彼個規例是按呢。」 |
| 14:33 | 耶和華吩咐摩西、亞倫講： |
| 14:34 | 「恁到我賞賜恁做業的迦南地的時，我用癩症染著一間厝，佇恁所得著做業的地， |
| 14:35 | 厝主著去通知祭司，給伊講：『照我看，厝內親像有症頭。』 |
| 14:36 | 祭司猶未入去驗症頭的代先，祭司就著吩咐人將厝傾空，免得厝內所有的染著無清氣；後來祭司著入去驗彼間厝。 |
| 14:37 | 伊著驗彼個症頭，看啊，症頭若佇厝的壁有顯出青抑是紅的凹紋，款式深入牆壁， |
| 14:38 | 祭司著出彼間厝，到厝門口，封彼間厝七日。 |
| 14:39 | 到第七日，祭司著閣去驗，看啊，症頭若湠佇厝的牆壁， |
| 14:40 | 祭司就著吩咐人將許個染著症頭的石挖起來，㧒佇城外無清氣的所在； |
| 14:41 | 也著教人敲厝內的四圍，所敲起來的灰土，著傾佇城外無清氣的所在； |
| 14:42 | 閣著用別塊石替許個石，閣用灰土抹彼間厝。 |
| 14:43 | 「伊挖石，敲厝，抹灰了後，症頭若閣到，閣發現佇彼間厝， |
| 14:44 | 祭司著閣入去驗，症頭若湠佇彼間厝，彼間厝是染著惡的癩，是無清氣。 |
| 14:45 | 伊就著拆彼間厝，伊的石、伊的柴、及伊一切的灰土攏搬出城外到無清氣的所在。 |
| 14:46 | 彼間厝封密的時間，人若入去就無清氣到下昏； |
| 14:47 | 睏佇彼間厝的著洗伊的衣服；食佇彼間厝的也著洗伊的衣服。 |
| 14:48 | 「彼間厝抹灰了後，祭司入去驗，看啊，若症頭無湠佇厝內，祭司就著斷彼間厝做清氣，因為症頭已經消無。 |
| 14:49 | 為著清氣彼間厝著取二隻鳥及柏香柴、朱紅色料及牛膝草， |
| 14:50 | 著刣彼二隻鳥的一隻，佇活水頂，磁器的內面， |
| 14:51 | 伊著提彼個柏香柴、牛膝草、朱紅色的料，及彼隻活鳥，攏搵佇彼隻受刣的鳥的血及活水，來灑彼間厝七擺。 |
| 14:52 | 伊著用彼隻鳥的血、活水、活鳥、柏香柴、牛膝草，及朱紅色料，清氣彼間厝。 |
| 14:53 | 總是著用彼隻活鳥放佇城外的山裡。按呢給彼間厝贖罪，彼間厝就清氣。」 |
| 14:54 | 這是為著逐樣癩𰣻的症頭及瘡， |
| 14:55 | 及衣服及厝的癩𰣻， |
| 14:56 | 以及腫、癬、火斑所立的規例， |
| 14:57 | 指明甚麼時是無清氣，甚麼時是清氣。這是癩𰣻的規例。 |
