走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 17:1 | 耶和華吩咐摩西講： |
|---|---|
| 17:2 | 「你著吩咐亞倫及伊許個子及以色列的眾人講，耶和華所命令的就是按呢講： |
| 17:3 | 見若屬以色列家的人刣牛牨，抑是綿羊仔，抑是山羊，無論刣佇營內抑是刣佇營外， |
| 17:4 | 若無代先牽到會幕門口、來耶和華的會幕前獻互耶和華做禮物，刺血的罪欲歸佇彼人。伊有刺血，彼人欲對伊的百姓中剪除。 |
| 17:5 | 這是為著以色列人將𪜶佇田野所獻的祭帶到會幕門口、耶和華的面前，交互祭司，獻互耶和華做謝恩的祭。 |
| 17:6 | 祭司著將血灑佇會幕門口、耶和華的壇頂，將油燒做芳芳的味，獻互耶和華。 |
| 17:7 | 𪜶呣通閣獻祭佇𪜶行邪淫所趁的鬼怪；這欲做𪜶逐世代永遠的例。 |
| 17:8 | 「你著對𪜶講：見若屬以色列家的人，抑是寄腳佇𪜶中間的外人，獻燒祭抑是祭物， |
| 17:9 | 若無帶到會幕門口獻互耶和華，彼人著對伊的百姓中受剪除。 |
| 17:10 | 「見若屬以色列家的人，抑是寄腳佇𪜶中間的外人，若食甚麼血，我欲對彼個食血的人變面，對伊的百姓中剪除伊。 |
| 17:11 | 因為肉的活命在佇血。我用伊賞賜恁，通佇壇頂為恁的活命贖罪；因為血內有活命，所以會贖罪。 |
| 17:12 | 所以，我對以色列人講：恁攏呣通食血；寄腳佇恁中間的外人也呣通食血。 |
| 17:13 | 見若以色列人，抑是寄腳佇𪜶中間的外人，若拍獵得著會食得的禽獸，著刺伊的血出來，用土蓋伊。 |
| 17:14 | 「論到一切有肉身的活命，伊的血就是伊的活命。所以我對以色列人講：無論甚麼肉身的血，恁攏呣通食，因為一切肉身的活命就是伊的血。見若食伊的人，的確受剪除。 |
| 17:15 | 見若食家己死的物，抑是互野獸拆裂的，無論是本地人，抑是外人，的確無清氣到下昏，攏著洗伊的衫，用水洗身軀，到下昏才清氣。 |
| 17:16 | 總是伊若無洗衫，洗身軀，就著擔當伊的罪過。」 |
