走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 25:1 | 耶和華佇西奈山吩咐摩西講： |
|---|---|
| 25:2 | 「你著吩咐以色列人給𪜶講：恁到我賞賜恁彼個地的時，地就著給耶和華守安息。 |
| 25:3 | 六年著種作你的田園，六年久著芟割你的葡萄園，收地的出產。 |
| 25:4 | 到第七年，地著守大的安息，就是給耶和華守的安息，呣通種作你的田園，也呣通芟葡萄園。 |
| 25:5 | 收成了家己發的五穀呣通收割；無過芟割的葡萄樹也呣通挽葡萄。此年，是地的安息年。 |
| 25:6 | 地佇安息年所出的欲互恁做食物，伊的出產攏欲互你及你的奴僕、你的女婢、你的倩工人，以及寄腳佇你遐的外人， |
| 25:7 | 及你的精牲，以及佇你的地的走獸做食物。」 |
| 25:8 | 「你著為家己算安息年七個，就是七擺的七年。此七擺的安息年，對佇你是四十九年。 |
| 25:9 | 彼年七月初十日，你著四界歕大聲的哨角；佇贖罪的日，著全地歕哨角。 |
| 25:10 | 恁著用第五十年，做聖，佇遍地給一切徛起的百姓宣佈自由。此年欲做恁的禧年，恁逐人著歸家己的產業，逐人著倒去伊的本家。 |
| 25:11 | 第五十年欲做恁的禧年。呣通種作；地家己發的，呣通收割；無芟的葡萄樹也呣通挽伊。 |
| 25:12 | 因為這是禧年，恁著掠伊做聖，恁通食地裡家己出的土產。 |
| 25:13 | 「此個禧年，恁逐人著倒去家己的產業。 |
| 25:14 | 恁賣物互厝邊，抑是對厝邊買物，恁呣通相剋虧。 |
| 25:15 | 你著照禧年後的年限對厝邊買；伊也著照收成的年限賣互恁。 |
| 25:16 | 照年限的多，你著加添伊的價錢；照年限的少，你著減少伊的價錢，因為伊照收成的數額來賣互恁。 |
| 25:17 | 恁也呣通相剋虧，獨獨著敬畏恁的上帝，因為我是耶和華──恁的上帝。」 |
| 25:18 | 「所以恁著行我的律例，守我的法度來行伊，就通佇彼個地安然徛起。 |
| 25:19 | 地也欲出伊的土產，恁就欲食飽，佇彼個地安然徛起。 |
| 25:20 | 恁若講：『看啊，此個第七年阮無種作，也無收成土產，欲食甚麼啊？』 |
| 25:21 | 我欲佇第六年命令我的福氣互恁，地就生三年的土產。 |
| 25:22 | 第八年，恁著種作，也著食地的出產，就是舊的米糧，聽候到第九年彼年的出產收來的時，恁猶久啲食舊的米糧。」 |
| 25:23 | 「地呣通永遠賣斷，因為地是我的；恁佇我的面前是出外人，是寄腳的。 |
| 25:24 | 恁所得著做業的全地，著准人贖回。 |
| 25:25 | 你的兄弟若變做喪鄉，賣伊的業幾若份，伊的至親著來贖回伊的兄弟所賣的。 |
| 25:26 | 若無人通給伊贖回，伊本身閣成做好額，夠額會贖回， |
| 25:27 | 伊就著算賣出地的年限，將所剩的還彼個買主，本身就通復倒伊的產業。 |
| 25:28 | 彼個人若𣍐會為家己贖回，就所賣的猶原存佇買主的手直到禧年；禧年已經到，產業著交出，彼人就復倒伊的業。 |
| 25:29 | 「人若賣城內的厝，賣了後，一年通贖回；一年足足，也有贖回的權。 |
| 25:30 | 若一年已經滿無贖回，此個城內的厝就定著永遠歸買主，到逐代；佇禧年也𣍐得交出。 |
| 25:31 | 獨獨厝佇無城牆的鄉村，著看伊親像鄉下的田一樣，通贖回；到禧年，攏著交出。 |
| 25:32 | 總是利未人的城，就是𪜶所得著做業的城彼中間的厝，利未人通不管時來贖回。 |
| 25:33 | 若有人對利未人贖回厝宅，所賣的厝佇所得著做業的城，到禧年就著交出，因為利未人城內的厝是𪜶佇以色列人中的產業。 |
| 25:34 | 總是𪜶的城外郊野的地呣通賣，因為是𪜶永遠的產業。」 |
| 25:35 | 「你的兄弟變做喪鄉衰退佇你遐，你著補助伊，互伊及你相及住，親像外人及寄腳的一樣。 |
| 25:36 | 呣通提伊的利息，也呣通提伊卡加；獨獨著敬畏你的上帝，互你的兄弟及你住。 |
| 25:37 | 你借伊錢，呣通給伊提利息；你借伊米糧，也呣通給伊提卡加。 |
| 25:38 | 我是耶和華──恁的上帝，曾導恁出埃及地，為著欲賞賜恁迦南地，也欲做恁的上帝。」 |
| 25:39 | 「你的兄弟若變喪鄉佇你遐，將本身賣互你，呣通互伊親像奴僕服事你。 |
| 25:40 | 伊著佇你遐親像做工人及寄腳的一樣，著服事你直到禧年。 |
| 25:41 | 彼時，伊欲離開你出去，及伊的子兒相及倒去伊的本家，復倒伊祖公的業。 |
| 25:42 | 因為𪜶是我的奴僕，是我所導出埃及地的，呣通賣做奴僕。 |
| 25:43 | 呣通嚴嚴管轄伊，獨獨著敬畏你的上帝。 |
| 25:44 | 論到你所欲有的奴僕、女婢，通對四圍的國中買來做奴僕女婢。 |
| 25:45 | 閣許個寄腳佇恁中間的外人的子兒以及𪜶及恁踮許個家眷，佇恁的地方所生的，恁也通對𪜶中間買人；𪜶欲做恁的家業。 |
| 25:46 | 恁欲取𪜶做業留互子孫做家業，恁欲永遠對𪜶中間取伊做奴僕；獨獨恁的兄弟以色列人，恁呣通嚴嚴相管轄。 |
| 25:47 | 「踮佇恁遐的外人，抑是寄腳的，若變做好額，你的兄弟佇𪜶遐變做喪鄉，將家己賣互恁中間的外人，抑是寄腳的，抑是外人的家族， |
| 25:48 | 賣了後，通贖回伊。伊的兄弟的一個通贖回伊， |
| 25:49 | 伯叔、抑是伯叔的子通贖回伊，抑是本家的親人，也通贖伊。伊本身若成做好額，也通家己贖。 |
| 25:50 | 伊著及買主算數，對賣家己彼年起，算到禧年；所賣的價錢照年限的多少，著照做工人的年限及伊算。 |
| 25:51 | 若所剩的年猶久多，就著照彼個年限對買伊的價錢，伊著還伊贖回的價錢。 |
| 25:52 | 若到禧年剩無幾年，著及伊算，照彼個年限著還伊贖回價錢。 |
| 25:53 | 伊著及伊住，親像年年雇倩的做工人，買主呣通嚴嚴管轄伊。 |
| 25:54 | 若無佇諸個受贖，到禧年，伊及伊的子兒攏通出去自由。 |
| 25:55 | 因為以色列人是我的奴樸僕是我導出埃及地的。我是耶和華──恁的上帝。」 |
