走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 19:1 | 此霎了後，亞捫人的王拿轄死，伊的子續接伊做王。 |
|---|---|
| 19:2 | 大衛講：「我欲好款待拿轄的子哈嫩因為伊的老父從前好款待我。」大衛就差幾若個使者為著伊死老父去安慰伊。大衛的人臣到亞捫人的地見哈嫩，欲安慰伊， |
| 19:3 | 總是亞捫人的貴族對哈嫩講：「大衛差人來安慰你，拍算伊是尊敬你的老父嗎？伊的人臣來見你豈呣是欲詳細查、毀滅、探聽此個地嗎？」 |
| 19:4 | 哈嫩就將大衛的人臣剃伊的嘴鬚，剪斷伊的衣服的一半，露現伊的下體，才互伊去。 |
| 19:5 | 有人用諸個人所抵著的去給大衛講，伊就差人去接𪜶，因為許個人真見誚；王吩咐講：「著且踮耶利哥，聽候嘴鬚發長才倒來。」 |
| 19:6 | 亞捫人知對𪜶的所做有互大衛厭惡𪜶，哈嫩及亞捫人就寄銀一千他連得，對米所波大米、亞蘭、瑪迦、瑣巴倩戰車及馬兵， |
| 19:7 | 對按呢倩三萬二千張的戰車及瑪迦王以及伊的百姓；𪜶就來紮營佇米底巴的頭前。亞捫人也對𪜶許個城出來，聚集欲交戰。 |
| 19:8 | 大衛聽見，就差約押及勇猛的全軍出去。 |
| 19:9 | 亞捫人出來排陣佇城門前，所來諸個王另外排陣佇郊野。 |
| 19:10 | 約押看見對敵佇伊的前後排陣，就對以色列軍中揀選精兵，互𪜶排陣來對亞蘭人； |
| 19:11 | 其餘的兵交互伊的小弟亞比篩，互伊排陣對亞捫人。 |
| 19:12 | 閣講：「亞蘭人若卡強我，你著來幫助我；亞捫人若卡強你，我就幫助你。 |
| 19:13 | 著好膽，咱著為咱的百姓及咱的上帝諸個城做大丈夫，願耶和華照伊所看做好的來行。」 |
| 19:14 | 約押就及隨伊的人進前排陣佇亞蘭的面前；亞蘭人就佇伊的面前逃走。 |
| 19:15 | 亞捫人看見亞蘭人逃走，𪜶亦佇約押的小弟亞比篩面前逃走入城。約押就倒轉去耶路撒冷。 |
| 19:16 | 亞蘭人看見𪜶刣輸以色列人，就差使者聚集大河彼旁的亞蘭人，哈大利謝的將軍朔法導𪜶來。 |
| 19:17 | 有人通知大衛，伊就聚集以色列眾人過約但河，來到亞蘭人遐，排陣抵敵𪜶。大衛已經排陣攻擊亞蘭人，𪜶就及伊交戰。 |
| 19:18 | 亞蘭人佇以色列人的面前逃走。大衛刣亞蘭人七千張車的兵，閣步兵四萬，亦刣死將軍朔法。 |
| 19:19 | 哈大利謝諸個人臣看見𪜶刣輸以色列人，就及大衛講和，來服事伊。對按呢亞蘭人無閣幫助亞捫人。 |
