走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 21:1 | 撒但起來愛害以色列，引誘大衛算以色列人的數額。 |
|---|---|
| 21:2 | 大衛給約押及百姓中的首領講：「恁去算以色列人，對別是巴到但，倒來給我講，互我知𪜶的數額。」 |
| 21:3 | 約押講：「願耶和華互伊的百姓比現今加添百倍。我的主我的王啊，𪜶豈無攏是我的主的百姓嗎？我的主啥事命令此個代誌，啥事互以色列犯罪啊？」 |
| 21:4 | 總是王的話贏過約押。約押就出去，遍行以色列地，閣倒來耶路撒冷， |
| 21:5 | 約押就將所算百姓的總額報告大衛：以色列人會抬刀者一百十萬；猶大人會抬刀者四十七萬。 |
| 21:6 | 獨獨利未人及便雅憫人伊無算在內，因為約押厭惡王此個命令。 |
| 21:7 | 此個事上帝看做呣好，就拍以色列。 |
| 21:8 | 大衛對上帝講：「我行此個事大大有罪！今求你除去你的奴僕的罪，因為我所做的真戇。」 |
| 21:9 | 耶和華吩咐大衛的先見者迦得講： |
| 21:10 | 「你著去給大衛講，耶和華按呢講：今我用三項排佇你面前，你揀一項，我通行佇你。」 |
| 21:11 | 迦得就來見大衛，給伊講：「耶和華按呢講：『你著家己揀： |
| 21:12 | 豈採三年的飢荒；抑是三月日久抵著損害佇你的對敵的面前，互仇讎的刀劍趇著你；抑是三日久耶和華的劍，就是瘟疫佇你的國內，耶和華的使者佇以色列的遍境啲毀滅。』今你著想看，我通用甚麼話回覆差我者。」 |
| 21:13 | 大衛給迦得講：「我窘迫到極。我願陷落佇耶和華的手，因為伊的憐憫真大；我呣願陷落佇人的手。」 |
| 21:14 | 對按呢，耶和華就降瘟疫佇以色列，以色列人死者七萬。 |
| 21:15 | 上帝差一個使者到耶路撒冷滅伊，欲滅伊的時，耶和華看見，就退悔此個災禍，就給毀滅的使者講：「夠額啦，今通停你的手！」彼時，耶和華的使者徛佇耶布斯人阿珥楠的五穀場。 |
| 21:16 | 大衛抬目，看見耶和華的使者徛佇半空中，拔刀佇手裡，伸佇耶路撒冷的頂面。大衛及諸個長老攏穿麻衫，面仆佇地裡。 |
| 21:17 | 大衛對上帝講：「吩咐算百姓的豈呣是我嗎？我犯罪行大歹，總是諸個羊群有做甚麼啊？求耶和華──我的上帝伸手佇我及我的父的家，呣通攻擊你的百姓，降瘟疫互𪜶。」 |
| 21:18 | 當彼時耶和華的使者命令迦得去給大衛講，大衛著上去，佇耶布斯人阿珥楠的五穀場給耶和華起一座壇； |
| 21:19 | 大衛就照迦得奉耶和華的名所講的話上去。 |
| 21:20 | 彼時阿珥楠啲拍麥，越頭看見天使，及伊佇啲四個子走去匿。 |
| 21:21 | 大衛到阿珥楠遐，阿珥楠看見大衛，就出五穀場，俯頭拜大衛。 |
| 21:22 | 大衛對阿珥楠講：「你用此個五穀場的地互我，互我佇遐通給耶和華起一座壇，你著照足額的價錢賣我，互瘟疫息無害百姓。」 |
| 21:23 | 阿珥楠給大衛講：「你通用伊，願我的主我的王照你所看做好的去行。你看，我用牛互你做燒祭，用拍五穀的器具做柴，亦用麥做素祭。諸個我攏互你。」 |
| 21:24 | 大衛王給阿珥楠講：「呣是按呢！我決斷欲用足額的價錢來買。因為我呣愛提你的物互耶和華，呣愛用無開費來獻燒祭。」 |
| 21:25 | 對按呢大衛為著彼塊地秤六百舍客勒的金互阿珥楠。 |
| 21:26 | 大衛佇遐給耶和華起一座壇，獻燒祭及平安祭，閣求叫耶和華。伊對天降火佇座壇頂，來應伊。 |
| 21:27 | 耶和華命令使者，伊就收伊的刀入鞘。 |
| 21:28 | 彼時，大衛看見耶和華佇耶布斯人阿珥楠的五穀場應伊，就佇遐獻祭。 |
| 21:29 | 因為摩西佇曠野所造耶和華的會幕及燒祭的壇，彼時攏佇基遍高的所在； |
| 21:30 | 總是大衛𣍐會上到伊的面前來問上帝，因為伊驚耶和華使者的刀。 |
