走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 30:1 | 雅基的子亞古珥的話就是默示。此個人對以鐵講，就是對以鐵及烏甲講： |
|---|---|
| 30:2 | 我比眾人卡蠢笨，也無有人的聰明。 |
| 30:3 | 我無學習智慧，也呣識至聖者的知識。 |
| 30:4 | 是誰上天閣落來？是誰聚集風佇手中心？是誰包水佇衫仔內？是誰定著地的四極？伊的名叫甚麼？伊的子名叫甚麼？你知嗎？ |
| 30:5 | 上帝的話逐句攏是過鍛煉的；見若倚靠伊的，伊就做𪜶的盾牌。 |
| 30:6 | 伊的話，你呣通加添，驚了伊責備你，你就顯明是講白賊的。 |
| 30:7 | 我求你二件事，佇我未死的代先，呣通無互我： |
| 30:8 | 求你互虛假及白賊離開我遠遠；互我無喪鄉也無好額；用所著用的米糧互我食， |
| 30:9 | 驚了我飽足呣認你，講：耶和華是是誰？閣驚了我喪鄉就偷提，致到褻瀆我的上帝的名。 |
| 30:10 | 呣通對主人來講伊的奴僕歹話，驚了伊咒詛你，你就算做有罪。 |
| 30:11 | 有一派的人，咒詛伊的老父，也無給伊的老母祝福。 |
| 30:12 | 有一派的人，家己看做清氣，總是無洗除伊的污穢。 |
| 30:13 | 有一派的人，目睭頭盡在高，目睭皮也展高高。 |
| 30:14 | 有一派的人，伊的牙親像劍，齒親像刀，欲吞滅地面上困苦的人及世間的喪鄉人。 |
| 30:15 | 蜈蜞有二個查某子，常常講：互我，互我！有三項無知足的，連彼號無講「夠額的」有四項： |
| 30:16 | 就是陰府及𪜶懷孕的石胎，無夠額水的地，及無講夠額的火。 |
| 30:17 | 戲弄老父、看輕呣聽趁老母的話，彼號人的目睭欲互山谷中的烏鴉啄出來，互鷹仔子所食。 |
| 30:18 | 我所想𣍐出的奇妙有三項，連我所呣知的有四項： |
| 30:19 | 就是鷹鳥佇空中的路；蛇佇石磐頂的路；船佇海中的路；男及女交合的路。 |
| 30:20 | 淫婦的路也是按呢：伊食了，拭伊的嘴就講：我無行歹。 |
| 30:21 | 為著三項地搖泏，連擔當𣍐起的有四項： |
| 30:22 | 就是奴僕做王；戇人食夠額； |
| 30:23 | 無人緣的女子出嫁；女婢續接主母。 |
| 30:24 | 地面上有四項微細的物，總是極智識： |
| 30:25 | 蚼蟻是無力的種類，總是佇夏天的時備辦米糧。 |
| 30:26 | 沙番是軟弱的種類，總是佇石磐中起厝。 |
| 30:27 | 草蜢無君王，總是攏會分隊出去。 |
| 30:28 | 繕蟲（sian-lang）用手擒，總是踮佇王宮。 |
| 30:29 | 步行威風的有三項，連行踏威風的有四項： |
| 30:30 | 獅──就是野獸中第一猛的、無為著別物來閃避， |
| 30:31 | 獵狗及公的山羊，以及無人抵敵的君王。 |
| 30:32 | 你若自高戇戇做，抑是存歹念頭，著用手掩嘴。 |
| 30:33 | 拍牛奶會成奶油；拍著鼻會出血。親像按呢，激受氣會起相爭。 |
