走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 2:1 | 耶和華的使者對吉甲上到波金，講：「我互恁對埃及上來，導恁到我對恁列祖咒誓的地。我也曾講：『所及恁立的約我永遠無違背。 |
|---|---|
| 2:2 | 恁也呣通及此所在徛起的百姓立約，著拆毀𪜶的壇。恁竟然呣聽我的話！是怎樣按呢行啊？』 |
| 2:3 | 因為按呢我閣講：『我無欲對恁的面前趕出𪜶；𪜶欲做恁脅下的茦。𪜶的上帝欲做害恁的羅網。』」 |
| 2:4 | 耶和華的使者對以色列眾人講諸個話的時，百姓就開聲啼哭； |
| 2:5 | 就號彼所在的名叫波金。𪜶佇遐獻祭互耶和華。 |
| 2:6 | 約書亞已經差以色列人去的時，𪜶逐人歸𪜶的業，來得著𪜶的地。 |
| 2:7 | 約書亞佇啲的日及約書亞死了後，許個看見耶和華為以色列人所行大事的長老猶佇啲的時，百姓服事耶和華。 |
| 2:8 | 耶和華的奴僕、嫩的子約書亞，一百一十歲就死。 |
| 2:9 | 𪜶就埋葬伊佇伊的業的界內，就是佇以法蓮山地的亭拿希烈，佇迦實山的北勢。 |
| 2:10 | 彼代的人攏倒祖。以後閣一代的人興起，呣知耶和華，也呣知為以色列人所行的事。 |
| 2:11 | 以色列人行耶和華看做歹的事，去服事巴力， |
| 2:12 | 棄拺𪜶列祖的上帝──耶和華就是導𪜶出埃及地的，去隨別個上帝，就是四圍許個百姓的上帝，跪拜𪜶，來惹耶和華的大受氣； |
| 2:13 | 𪜶也棄拺耶和華，去服事巴力及亞斯他錄。 |
| 2:14 | 耶和華受氣以色列的人，將𪜶交佇搶掠𪜶的人的手，𪜶就搶𪜶，伊閣賣𪜶互四圍對敵的手，致到𪜶佇𪜶的對敵的頭前無閣徛會住。 |
| 2:15 | 𪜶無論去叨落，耶和華伸手降災禍互𪜶，照耶和華所講的話，閣照耶和華對𪜶所咒誓的；𪜶就極困苦。 |
| 2:16 | 耶和華就興起士師，𪜶就救百姓脫離搶掠𪜶的人的手。 |
| 2:17 | 總是𪜶無聽趁𪜶的士師，竟然行邪淫，隨別個上帝來跪拜𪜶，𪜶的列祖趁耶和華的命令所行的路，𪜶緊緊歪斜伊無照按呢行。 |
| 2:18 | 耶和華給𪜶興起士師的時，耶和華就及士師佇啲。也佇士師活佇啲一切的日，救𪜶脫離對敵的手。𪜶因為受壓制苦楚，就吐氣，所以耶和華就退悔。 |
| 2:19 | 到士師死了，𪜶就越轉去行，比𪜶的父公閣卡歹，隨別個上帝來服事𪜶跪拜𪜶，攏無改𪜶的所行及𪜶固執的路。 |
| 2:20 | 耶和華就受氣以色列人。講：「因為此個百姓違背我的約就是我所命令𪜶的列祖的，也無聽趁我的話， |
| 2:21 | 所以約書亞死的時所剩的逐族，以後我無欲閣佇𪜶的面前趕出一族， |
| 2:22 | 通用諸個來試驗以色列人，看𪜶肯執守耶和華的道路來行伊，親像𪜶的列祖曾守伊抑無。」 |
| 2:23 | 所以耶和華留諸個族，無緊緊趕𪜶出，也無將𪜶交佇約書亞的手。 |
