走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 20:1 | 對按呢以色列眾人對但，到別是巴攏出來，及踮佇基列的人，全會聚集親像一人，佇米斯巴到耶和華的面前。 |
|---|---|
| 20:2 | 百姓的首領，及以色列眾支派，攏家己來徛佇上帝百姓的會中；抬刀的步兵共四十萬。 |
| 20:3 | 便雅憫人攏聽見以色列人上到米斯巴。以色列人就講：「此個歹代的情由著給阮講明。」 |
| 20:4 | 彼個利未人，就是受害死的婦仁人的丈夫，應講：「我及我的細姨到便雅憫的基比亞歇暝。 |
| 20:5 | 基比亞人起來攻擊我，暝時包圍我歇的厝，想欲害死我，閣強姦我的細姨致到死。 |
| 20:6 | 我就將我的細姨割歸塊，差人提到以色列得著做業的全地，因為𪜶佇以色列中行淫亂及見誚事。 |
| 20:7 | 恁攏總以色列人著打算議論。」 |
| 20:8 | 眾百姓攏起來親像一人，講：「阮無一人欲去伊的布棚，也無一人欲倒去伊的厝。 |
| 20:9 | 阮對基比亞人欲按呢行，照所抽的籤去攻擊伊。 |
| 20:10 | 阮欲佇以色列眾支派中，一百人取十人，一千取一百，一萬取一千，給百姓運糧，互𪜶到便雅憫的基比亞的時，通照𪜶佇以色列中所行見誚的事來行佇𪜶。」 |
| 20:11 | 對按呢以色列眾人聚集攻擊彼個城，大家聯合親像一人。 |
| 20:12 | 以色列諸個支派差人，遍遍給便雅憫的支派講：「恁中間所行的甚麼歹啊？ |
| 20:13 | 今恁著將許個人就是基比亞的匪類交出，阮通互𪜶死，對以色列中除去彼個歹。」總是便雅憫人呣肯聽𪜶兄弟以色列人的話。 |
| 20:14 | 便雅憫人對𪜶許個城出來，聚集到基比亞，欲及以色列人交戰。 |
| 20:15 | 彼時便雅憫人對逐個城點出抬刀的，共二萬六千；另外猶有基比亞人點出七百精練的兵。 |
| 20:16 | 佇眾百姓的中間有七百精鍊的兵，慣練用倒手的，逐個會用索甩石，準準分毫無差。 |
| 20:17 | 便雅憫人以外，點出以色列人抬刀的，共四十萬，攏是戰士。 |
| 20:18 | 以色列人就起來，到伯特利問上帝講：「阮中間是誰著代先上去及便雅憫人交戰啊？」耶和華講：「猶大著代先去。」 |
| 20:19 | 以色列透早起來，紮營攻擊基比亞。 |
| 20:20 | 以色列人就出來，欲及便雅憫人交戰，以色列人排陣佇基比亞欲攻擊𪜶。 |
| 20:21 | 便雅憫人就對基比亞出來，彼日刣死以色列人二萬二千倒佇地裡。 |
| 20:22 | 以色列人就家己奮勇，猶原佇頭一日排陣的所在閣排陣。 |
| 20:23 | 以色列人上去，佇耶和華的面前啼哭，到下昏，問耶和華講：「阮著閣上去及阮的兄弟便雅憫人交戰抑呣免？」耶和華講：「著上去攻擊伊。」 |
| 20:24 | 第二日，以色列人就進前去攻擊便雅憫人。 |
| 20:25 | 便雅憫人也佇第二日對基比亞出來，攻擊𪜶，閣刣死以色列人一萬八千人倒佇地裡，攏是攑刀的。 |
| 20:26 | 以色列人及眾百姓攏上去到伯特利，佇遐坐佇耶和華的面前啼哭，彼日禁食到日暗；閣佇耶和華的面前獻燒祭及平安祭。 |
| 20:27 | 彼時，上帝的約櫃佇遐；亞倫的孫、以利亞撒的子非尼哈彼時徛佇伊的面前。 |
| 20:28 | 以色列人問耶和華講：「我著出去及我的兄弟便雅憫人交戰嗎？抑是著息啊？」耶和華講：「你著上去，因為明仔日我欲將𪜶交佇你的手。」 |
| 20:29 | 以色列人就埋伏兵佇基比亞的四圍。 |
| 20:30 | 第三日，以色列人閣上去攻擊便雅憫人，排列隊伍佇基比亞，及前二擺一樣。 |
| 20:31 | 便雅憫人就出去抵敵百姓，就受引誘離開城；𪜶親像前二擺，佇田裡起手刣死以色列人約略三十個；佇大路頂許個條路，一條𥦁伯特利，一條𥦁基比亞。 |
| 20:32 | 便雅憫人講：「𪜶猶原刣輸佇咱的面前。」以色列人講：「咱著逃走，引誘𪜶離開城到大路。」 |
| 20:33 | 以色列眾人攏對伊的所在起來，排列隊伍佇巴力他瑪，以色列埋伏的兵對𪜶的所在就是馬利迦巴衝出來。 |
| 20:34 | 通以色列有一萬精練的兵，進前來攻擊基比亞，交戰的勢面真猛烈；總是便雅憫人呣知災禍到啦。 |
| 20:35 | 耶和華拍便雅憫佇以色列的面前。彼日，以色列人刣死便雅憫二萬五千一百人，攏是抬刀的。 |
| 20:36 | 便雅憫人才知𪜶的受拍。因為以色列人退讓便雅憫人，是為著𪜶倚靠所設佇基比亞的伏兵。 |
| 20:37 | 埋伏的兵緊緊竄入基比亞，埋伏的兵進前用刀刣死通城的人。 |
| 20:38 | 以色列人及伏兵有代先約一個記號，就是互火熏對城內淐起來。 |
| 20:39 | 以色列人當交戰的時越轉身，便雅憫人起手刣死以色列人，約略三十個，就講：「𪜶猶原親像前擺刣輸佇咱的面前。」 |
| 20:40 | 當火焰親像煙柱對城中淐上去的時，便雅憫人越頭看，看見通城的火熏抵天。 |
| 20:41 | 以色列人閣越轉身，便雅憫人就真卬愕，因為看見災禍到啦。 |
| 20:42 | 所以𪜶佇以色列人的面前越轉身向曠野的路逃走；總是追刣𪜶真倚。對許個城出來的，𪜶攏刣𪜶佇彼中間。 |
| 20:43 | 𪜶圍困便雅憫人，追趇𪜶，佇𪜶歇腳的所在、𧿬踏𪜶，到基比亞的對面向日出的所在。 |
| 20:44 | 便雅憫人死的有一萬八千，諸個攏是勇士。 |
| 20:45 | 其餘的人越轉身走去曠野，到臨門的石磐。以色列人佇大路裡收拾𪜶五千人，親像拾麥屑一樣，閣追趇𪜶到基頓刣死𪜶二千人。 |
| 20:46 | 彼日便雅憫人死的共二萬五千人，許個攏是抬刀的勇士。 |
| 20:47 | 獨獨六百人，越轉身走去曠野，到臨門的石磐，就踮佇臨門的石磐四月日。 |
| 20:48 | 以色列人閣越轉攻擊便雅憫人，用刀拍死諸個城中的人及精牲，以及一切所抵著的，閣一切所到的城攏用火燒。 |
