走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 11:1 | 年頭，列王出戰的時，大衛差約押，及伊的人臣及以色列的眾人出去。𪜶就刣贏亞捫人，圍攻拉巴。大衛猶原踮佇耶路撒冷。 |
|---|---|
| 11:2 | 有一日，欲暗的時，大衛對床裡起來，佇王宮的厝頂行來行去，對厝頂看見一個婦仁人啲洗浴，婦仁人生做真娞， |
| 11:3 | 大衛為著彼個婦仁人就差人去探聽。有人講：「伊豈呣是以連的查某子，赫人烏利亞的某拔示巴嗎？」 |
| 11:4 | 大衛差使者去導伊來，伊就來到伊遐，大衛及伊同房；婦仁人清氣伊的無清氣。就倒去𪜶厝。 |
| 11:5 | 婦仁人懷孕，差人給大衛講：「我已經懷孕。」 |
| 11:6 | 大衛差人到約押遐，講：「你差赫人烏利亞來我遮。」約押就差烏利亞去見大衛。 |
| 11:7 | 烏利亞已經來伊遐，大衛問看約押好嗎？百姓好嗎？交戰好勢嗎？ |
| 11:8 | 大衛給烏利亞講：「你落去恁兜洗腳。」烏利亞出王宮了後，王就送一份食物互伊。 |
| 11:9 | 總是烏利亞及伊主人的奴僕相及睏佇王宮的門口，無落去𪜶兜。 |
| 11:10 | 有人給大衛講：「烏利亞無落去伊的厝。」大衛就問烏利亞講：「你豈呣是對遠路來嗎？啥事呣落去你的家啊？」 |
| 11:11 | 烏利亞對大衛講：「約櫃及以色列及猶大攏踮佇草寮仔，我的主約押及我的主的奴僕攏紮營佇田野，我豈通倒去我的家飲食、及我的某相及睏嗎？我指你的活及你靈魂的活來咒誓，我決斷無欲行此個事！」 |
| 11:12 | 大衛給烏利亞講：「你今仔日猶原住遮，明仔再我互你去。」烏利亞就佇彼日及第二日住佇耶路撒冷。 |
| 11:13 | 大衛叫烏利亞來，伊就佇伊的面前飲食，伊互伊醉。已經暗，烏利亞出去伊的床裡睏，及伊的主諸個奴僕相及做伴，也無落去𪜶兜。 |
| 11:14 | 隔早起，大衛寫一張批互約押，託烏利亞的手帶去。 |
| 11:15 | 批內寫講：「著派烏利亞佇陣情極危急的所在，恁就對伊的後面退來，互伊受拍死。」 |
| 11:16 | 約押圍城的時，佇伊所知有勇士的所在，就派烏利亞佇遐。 |
| 11:17 | 城內的人有出來及約押交戰；大衛的奴僕死幾若人，赫人烏利亞也死。 |
| 11:18 | 約押差人用交戰的事攏給大衛講， |
| 11:19 | 就吩咐使者講：「你用交戰一切的事給王講明白， |
| 11:20 | 王若受氣，給恁講：『恁交戰的時啥事迫近城牆？豈呣知𪜶會對城頂射箭嗎？ |
| 11:21 | 前拍死耶路比設的子亞比米勒的是是誰？豈呣是一個婦仁人對牆頂㧒石磨的頂礅，佇伊的頂面，互伊死佇提備斯嗎？恁啥事迫近城啊？』你著講：『你的奴僕──赫人烏利亞也死。』」 |
| 11:22 | 使者去，照約押一切所命令的來給大衛講。 |
| 11:23 | 使者給大衛講：「對敵比阮卡強，出來郊野攻擊阮，阮拍伊到城門口。 |
| 11:24 | 射箭的人對牆頂射你的奴僕，王的奴僕死幾若人，你的奴僕赫人烏利亞也死。」 |
| 11:25 | 大衛給彼個使者講：「你著按呢給約押講：『呣免掛慮此個事，因為刀劍刣死人，此個彼個無一定；你著閣卡盡力攻城，來捙倒伊。』著按呢勉勵伊。」 |
| 11:26 | 烏利亞的某聽見丈夫烏利亞已經死，就為伊的丈夫啼哭。 |
| 11:27 | 丁憂已經明白，大衛差人導伊到宮內，伊就做伊的某，給伊生一個子。總是大衛所行的事，耶和華真無歡喜。 |
