走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 3:1 | 掃羅的家及大衛的家交戰久久。大衛愈強盛；掃羅的家愈衰弱。 |
|---|---|
| 3:2 | 大衛佇希伯崙生幾若個子：大子暗嫩是耶斯列人亞希暖所生的； |
| 3:3 | 第二個基利押是曾做迦密人拿八的某亞比該所生的；第三個押沙龍是基述王達買的查某子瑪迦的子； |
| 3:4 | 第四個亞多尼雅是哈及的子；第五個示法提雅是亞比他的子； |
| 3:5 | 第六個以特念是大衛的某以格拉所生的。諸個是大衛佇希伯崙所生的。 |
| 3:6 | 掃羅的家及大衛的家交戰的時，押尼珥佇掃羅的家家己強。 |
| 3:7 | 掃羅有一個妃，名叫利斯巴，是愛亞的查某子。伊施波設對押尼珥講：「你啥事及我老父的妃同房啊？」 |
| 3:8 | 押尼珥因為伊施波設的話就真受氣，講：「我豈是猶大的狗頭嗎？我好款待你的老父掃羅的家及伊的兄弟、朋友，無將你交佇大衛的手，你今仔日竟然因為此個婦仁人責備我嗎？ |
| 3:9 | 我若無照耶和華所對大衛咒誓的來行佇伊，就願上帝加倍責罰押尼珥， |
| 3:10 | 欲對掃羅的家移徙國位，來建立大衛的位，互伊治理以色列及猶大，對但到別是巴。」 |
| 3:11 | 伊施波設因為驚押尼珥，𣍐應一句話。 |
| 3:12 | 押尼珥為著本身差使者去見大衛，講：「此個地方屬是誰啊？」閣講：「你及我立約，我的手欲幫助你，互以色列攏歸你。」 |
| 3:13 | 大衛講：「好！我及你立約。總是我欲對你討一項，就是你來見我的面彼時，若無將掃羅的查某子米甲導來，的確𣍐見我的面。」 |
| 3:14 | 大衛就差使者去見掃羅的子伊施波設，講：「你著將我的某米甲還我；伊就是我曾用非利士人一百陽物的皮所聘定的。」 |
| 3:15 | 伊施波設就差人，對伊的丈夫、拉億的子帕鐵遐帶伊來。 |
| 3:16 | 伊的丈夫隨伊的後面，愈行愈哮，及伊到巴戶琳。押尼珥給伊講：「倒去啊！」伊就倒去。 |
| 3:17 | 押尼珥及以色列的長老參詳講：「恁前欣慕大衛做王治理恁， |
| 3:18 | 今著行伊。因為耶和華曾論到大衛講：『我欲用我的奴僕大衛的手，救我的百姓以色列脫離非利士人的手及眾對敵的手。』」 |
| 3:19 | 押尼珥也講互便雅憫人聽，閣到希伯崙，將以色列人及便雅憫全家一切所看做好的講互大衛聽。 |
| 3:20 | 押尼珥及二十人到希伯崙見大衛，大衛為著押尼珥以及及伊來的人設筵席。 |
| 3:21 | 押尼珥給大衛講：「我欲起來去招集以色列眾人來見我的主我的王，互𪜶通及你立約，你就通做王照心所愛來管理。」大衛就送押尼珥去；伊就平安去。 |
| 3:22 | 大衛的兵及約押出軍倒來，帶多多搶的物來。彼時押尼珥無佇希伯崙大衛遐，因為大衛已經送伊去，伊也平安去。 |
| 3:23 | 約押及隨伊的全軍已經到，有人通知約押講：「尼珥的子押尼珥來見王，王送伊去，伊也平安去。」 |
| 3:24 | 約押去見王講：「你做甚麼啊？看啊，押尼珥來見你，你啥事送伊去，今伊去了啦！ |
| 3:25 | 你知，尼珥的子押尼珥來是欲騙你，愛知你的出及你的入及你一切所做的事。」 |
| 3:26 | 約押對大衛遐出來，就差使者去趇押尼珥，𪜶就對西拉的井帶伊來，總是大衛呣知。 |
| 3:27 | 押尼珥倒轉來到希伯崙，約押導伊到城門口，假欲暗靜及伊講話，就佇遐鑿透伊的腹肚，伊就死。這是為著伊的小弟亞撒黑互伊刣死。 |
| 3:28 | 後來大衛聽見，就講：「留尼珥的子押尼珥的血，此個罪佇耶和華的面前的確永遠無歸佇我及我的國。 |
| 3:29 | 願彼個歸佇約押的頭殼及伊的老父全家；閣願約押的家患著下痟的，癩𰣻的，抑是倚柺的，互刀刣死的，無通食的永無斷。」 |
| 3:30 | 約押及伊的小弟亞比篩刣死押尼珥，是因為伊佇基遍交戰的時刣死𪜶的小弟亞撒黑。 |
| 3:31 | 大衛給約押及隨伊的眾百姓講：「恁著拆裂衫，縖麻布，佇押尼珥面前啼哭。」大衛王也隨佇伊的棺柴後。 |
| 3:32 | 𪜶埋葬押尼珥佇希伯崙。王倚押尼珥的墓來啼哭，眾百姓也啼哭。 |
| 3:33 | 王為著押尼珥悲哀，講：押尼珥怎樣親像戇人的死啊？ |
| 3:34 | 你的手無捆縛，你的腳無鎖鍊。你死，親像人死佇歹人的面前。對按呢眾百姓閣為著伊哀哭。 |
| 3:35 | 日未落的時，眾百姓來勸大衛食餅，總是大衛咒誓講：「我若佇日未落的代先食淡薄餅，抑是食別項物，願上帝加倍責罰我！」 |
| 3:36 | 眾百姓注意看，攏看做好。親像王凡所做的，眾百姓攏看做好。 |
| 3:37 | 彼日，眾百姓及以色列眾人才知刣死尼珥的子押尼珥攏呣是出佇王的意思。 |
| 3:38 | 王給伊的人臣講：「恁豈呣知今仔日佇以色列中死一個豪傑的大偉人嗎？ |
| 3:39 | 我雖然受抹油做王，今仔日猶是軟弱；洗魯雅的子諸個人比我卡強。行歹的人，願耶和華照伊的歹報應伊。」 |
