走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 13:1 | 此個以後大衛的子押沙龍有一個真娞的小妹，名叫他瑪。大衛的子暗嫩疼伊。 |
|---|---|
| 13:2 | 暗嫩為著伊的小妹他瑪鬱悴到破病。因為伊是在室女，暗嫩家己知得對伊做甚麼代誌。 |
| 13:3 | 暗嫩有一個朋友，名叫約拿達，是大衛的兄示米亞的子。約拿達是真靈竅的人； |
| 13:4 | 伊對暗嫩講：「王的子啊，你啥事一日一日卡消瘦啊？啥事呣給我講。」暗嫩給伊講：「我疼我的小弟押沙龍的小妹他瑪。」 |
| 13:5 | 約拿達給伊講：「你著倒佇眠床裡假做破病；你的老父來看你，就對伊講：『求你准我的小妹他瑪來我遮，用食物互我，備辦佇我的面前，互我看見，對伊的手接來食。』」 |
| 13:6 | 暗嫩就倒啲假破病。王來覓伊，暗嫩就對王講：「求你互我的小妹他瑪來，佇我的面前給我做二塊餅，我通對伊的手接來食伊。」 |
| 13:7 | 大衛就差人到他瑪的厝，給伊講：「今你去你的兄暗嫩的厝，給伊備辦食物。」 |
| 13:8 | 他瑪就到伊的兄暗嫩的厝；暗嫩倒啲。他瑪提麵粉，佇伊的面前摶做餅，閣煏許個餅， |
| 13:9 | 就將煎盤傾佇伊的面前，暗嫩呣食，就講：「眾人著離開我出去！」眾人就離開伊，出去。 |
| 13:10 | 暗嫩給他瑪講：「你捧食物入睏房，我通對你的手接來食。」他瑪就捧所做的餅入睏房，到伊的兄暗嫩遐， |
| 13:11 | 伊捧去互伊食，伊就搝伊，給伊講：「我的小妹啊，你來及我相及睏。」 |
| 13:12 | 伊給伊講：「我的兄，呣通莫得凌辱我。因為佇以色列中呣應該按呢行，你莫得做此個戇事； |
| 13:13 | 也我，我欲怎樣洗我的見誚？也你，你佇以色列做戇人的一個。今請你對王講，伊無欲禁止我嫁互你。」 |
| 13:14 | 總是暗嫩呣肯聽伊的話，因為伊比伊卡有力，就凌辱伊，及伊相及睏。 |
| 13:15 | 以後，暗嫩極其怨恨伊，彼個怨恨伊的怨恨比前疼伊的疼閣卡大，暗嫩就給伊講：「起來，去啊！」 |
| 13:16 | 伊給伊講：「呣通按呢！你趕我出去的害著我比你前款待我的卡殄！」總是暗嫩呣肯聽伊， |
| 13:17 | 就叫彼個伺候伊的奴僕，講：「著趕此個查某囝仔對我遮出去！伊出去，門就著閂。」 |
| 13:18 | 彼時他瑪穿彩色的衫，因為王的查某子，猶未出嫁的攏穿此號衫。暗嫩的奴僕就牽伊出去，出去了，門就閂啲。 |
| 13:19 | 他瑪摻火灰佇頭殼，拆裂所穿彩色的衫，用手抱頭殼來行，愈行愈哮。 |
| 13:20 | 伊的兄押沙龍問伊講：「你的兄暗嫩曾及你做堆嗎？我的小妹啊，今無做聲，伊是你的兄，莫得掛意此個事。」他瑪就單身踮佇伊的兄押沙龍的厝。 |
| 13:21 | 大衛王聽見諸個事，就不止受氣。 |
| 13:22 | 押沙龍無及暗嫩講好講歹；因為押沙龍怨恨暗嫩，是伊有凌辱伊的小妹他瑪。 |
| 13:23 | 過二年，押沙龍佇近以法蓮的巴力夏瑣有人給伊剪羊毛；押沙龍請王的眾子攏總去。 |
| 13:24 | 押沙龍來見王，講：「今你的奴僕有用人啲剪羊毛，請王及王的人臣及奴僕相及去。」 |
| 13:25 | 王給押沙龍講：「我的子啊，呣通，阮呣通攏去，驚了你開費甚傷重。」押沙龍迫伊，總是伊呣去，干單給伊祝福。 |
| 13:26 | 押沙龍講：「若無，就互我的兄暗嫩及阮去。」王講：「啥事著伊及你去啊？」 |
| 13:27 | 押沙龍迫伊，王就允准暗嫩及王的眾子相及去。 |
| 13:28 | 押沙龍吩咐伊的奴僕講：「恁著注意，看暗嫩飲酒得解的時，我給恁講拍暗嫩，恁就著刣死伊，莫得驚。這豈呣是我吩咐恁的嗎？恁做恁好膽勇敢！」 |
| 13:29 | 押沙龍的奴僕就照押沙龍所吩咐的，來行佇暗嫩。王的眾子攏絔起來，逐人騎伊的驢，逃走。 |
| 13:30 | 𪜶猶佇路裡，有風聲傳到大衛，講：「押沙龍有刣死王的眾子，無留一個。」 |
| 13:31 | 王就起來，拆裂衫，倒佇地裡。王的人臣也拆裂衫，徛佇伊的身邊。 |
| 13:32 | 大衛的兄示米亞的子約拿達應講：「我的主，莫得拍算王的眾子──許個少年人攏互伊刣死，只有暗嫩死若定。因為對暗嫩凌辱伊的小妹他瑪彼日，押沙龍就已經有此個意思。 |
| 13:33 | 今我的主我的王，莫得掛意此個事，拍算王的眾子攏死，其實只有暗嫩死若定。」 |
| 13:34 | 押沙龍就逃走。守望的少年人抬目看，看見多多百姓對伊的後面對山邊的路來。 |
| 13:35 | 約拿達給王講：「看啊，王的眾子攏來啦，果然照你的奴僕所講的。」 |
| 13:36 | 話抵仔講息，王許個子就到，開聲啼哭；王及人臣也攏大啼哭到極。 |
| 13:37 | 押沙龍走到基述王亞米忽的子達買遐。大衛日日為著伊的子悲哀。 |
| 13:38 | 押沙龍走到基述，踮遐三年。 |
| 13:39 | 大衛王的心切切數念押沙龍，因為暗嫩已經死，就受安慰。 |
