走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 12:1 | 耶和華差拿單去見大衛。伊到伊遐，給伊講：「佇一個城有二人：一個好額，一個喪鄉。 |
|---|---|
| 12:2 | 好額的有牛羊真多； |
| 12:3 | 喪鄉人無甚麼，只有一隻羊種仔就是伊所買來飼的。伊及伊佇遐及伊的子相及長大，食伊所食的，飲伊的杯，睏佇伊的胸前，看伊親像家己的查某子。 |
| 12:4 | 有一個出外人到好額人遐；好額人呣甘對伊的羊群牛群取來備辦互人客食，反轉取喪鄉人的羊仔，備辦來互人客食。」 |
| 12:5 | 大衛大受氣彼人，給拿單講：「我指永活的耶和華來咒誓，行此個代誌的人著死！ |
| 12:6 | 著賠伊的羊仔四倍；因為伊行此個事，也因為伊無憐憫的心。」 |
| 12:7 | 拿單給大衛講：「你就是彼人！耶和華──以色列的上帝按呢講：『我用油抹你做以色列的王，救你脫離掃羅的手。 |
| 12:8 | 我閣用你的主的厝宅互你，用你的主許個某交佇你的胸前，閣用以色列及猶大家互你；諸個若猶掠做小可，我會加添此號彼號互你。 |
| 12:9 | 你啥事看輕耶和華的命令，行伊所看做歹的事？你用刀刣死赫、人烏利亞，就是借亞捫人的刀刣死伊，閣娶伊的某做你的某。 |
| 12:10 | 今刀劍欲永遠無離開你的家，因為你看輕我，娶赫人烏利亞的某做你的某。』 |
| 12:11 | 耶和華閣按呢講：『看啊，我欲對你的家興起災禍攻擊你；我欲佇你的目睭前，用你許個某互你的厝邊，伊欲佇青天白日及你許個某同房。 |
| 12:12 | 因為你佇暗中行伊，總是我欲佇青天白日，佇以色列眾人的面前，行此個事。』」 |
| 12:13 | 大衛給拿單講：「我有得罪耶和華！」拿單給大衛講：「耶和華已經除去你的罪，你𣍐致到死。 |
| 12:14 | 總是因為你行此個事，互耶和華的對敵有褻瀆的因由，所以，伊給你所生的子的確死。」 |
| 12:15 | 拿單就倒去𪜶厝。耶和華拍烏利亞的某給大衛所生的嬰仔，伊就破病真傷重。 |
| 12:16 | 大衛就為著彼個子祈禱上帝，大衛閣禁食，入內面，通暝倒佇地裡。 |
| 12:17 | 伊家中許個老人起來到伊的身邊，欲扶伊對地起來，總是伊呣肯，也無欲及𪜶相及食。 |
| 12:18 | 到第七日，囝仔死。大衛的人臣呣敢給伊講囝仔死啦，因為𪜶講：「囝仔猶活啲的時，咱勸伊，伊尚且呣聽咱的話，若給伊講囝仔死，伊傷心欲到怎樣？」 |
| 12:19 | 大衛看見伊的人臣嗤舞嗤呲啲講，大衛就知囝仔已經死，大衛就問伊的人臣講：「囝仔死啦嗎？」𪜶講：「死啦。」 |
| 12:20 | 大衛就對地裡起來，洗身軀，抹油，換衫，入耶和華的殿敬拜；然後倒去伊的厝，伊吩咐人排物佇伊的面前，他就食。 |
| 12:21 | 人臣問伊講：「你所行的是怎樣？囝仔活啲的時，你禁食啼哭；囝仔死，你反轉起來食。」 |
| 12:22 | 大衛講：「囝仔猶活啲，我禁食啼哭；因為我拍算講，豈採耶和華憐憫我，互囝仔活啲也敢。 |
| 12:23 | 囝仔已經死，我禁食欲啥事，我豈會互伊倒轉來嗎？我欲去伊遐，伊𣍐會來我遮。」 |
| 12:24 | 大衛安慰伊的某拔示巴，入去及伊同房，伊就生子，就給伊號名叫所羅門。耶和華也疼伊， |
| 12:25 | 就託先知拿單給伊號名，叫耶底底亞，因為耶和華疼伊。 |
| 12:26 | 約押攻亞捫人的拉巴取𪜶的京城。 |
| 12:27 | 約押差使者去見大衛，講：「我攻拉巴，已經取伊的水城。 |
| 12:28 | 今你著聚集其餘的百姓來，紮營攻此個城來取伊，驚了我取此個城，人就用我的名來叫伊。」 |
| 12:29 | 大衛就聚集眾百姓，去拉巴攻擊，來取伊， |
| 12:30 | 伊取𪜶的王頭殼頂的冕旒，伊的金重一他連得，閣鑲寶石。將此個來戴佇大衛的頭殼。伊閣對城內取真多財物， |
| 12:31 | 閣掠許個城的百姓出來，互𪜶用鋸仔，及鐵耙，以及鐵的斧頭做苦工，抑是佇瓦窯著磨；伊款待亞捫人許個城攏是按呢。大衛就及眾百姓倒去耶路撒冷。 |
