走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 15:1 | 此霎了後，押沙龍為家己備辦車馬，閣五十人走佇伊的頭前。 |
|---|---|
| 15:2 | 押沙龍早早起來，徛佇城門的路邊，若有人來有案件著互王判斷的，押沙龍就叫伊來，問伊講：「你是叨落一個城的人。」伊應講：「奴僕是以色列一個支派的人。」 |
| 15:3 | 押沙龍給伊講：「你的代誌是好是有情理，總是王無交代人聽你的話。」 |
| 15:4 | 押沙龍閣講：「可惜無設立我做此個地方的審判司！見有相告著判斷的事的來到我遮，我欲照公義判決伊。」 |
| 15:5 | 見有人近倚來拜伊，伊就伸手牽伊，給伊唚。 |
| 15:6 | 以色列人的中間，見若欲去見王求判斷的，押沙龍攏按呢款待𪜶。按呢，押沙龍暗靜得著以色列人的心。 |
| 15:7 | 過四年，押沙龍對王講：「求你准我去希伯崙，還我對耶和華所下的願。 |
| 15:8 | 因為奴僕踮佇亞蘭的基述，曾下願講：『耶和華若果然互我閣倒來耶路撒冷，我欲服事耶和華。』」 |
| 15:9 | 王給伊講：「你通平安去！」押沙龍就起來，去希伯崙。 |
| 15:10 | 押沙龍差偵探行遍以色列逐支派，講：「恁一下聽見哨角的聲就講：『押沙龍佇希伯崙做王啦！』」 |
| 15:11 | 押沙龍所請彼二百人及伊對耶路撒冷去，許個人攏是無意中去，呣知彼個事。 |
| 15:12 | 大衛的謀士亞希多弗是基羅人，當獻祭的時，押沙龍差人召伊，對伊的本城基羅來。對按呢叛逆的勢面愈強；因為隨押沙龍的百姓日日愈多。 |
| 15:13 | 有人來報大衛講：「以色列人的心攏歸向押沙龍啦。」 |
| 15:14 | 大衛給許個及伊佇耶路撒冷的人臣講：「起來，咱著逃走，若無攏𣍐會閃避押沙龍；著緊緊去，驚了伊緊緊到來趇著咱，陷害咱，用刀刣死城內的人。」 |
| 15:15 | 王的人臣給王講：「看啊，我的主我的王所注意的，你的奴僕攏欲行。」 |
| 15:16 | 王出去，伊的家眷攏隨伊，王留十個嬪妃顧厝。 |
| 15:17 | 王出去，眾百姓攏隨伊，到伯墨哈，就歇。 |
| 15:18 | 王的人臣攏佇伊的面前行過去。一切的基利提人、比利提人，及迦特人就是對迦特隨伊來的六百人，也攏佇王的面前行過去。 |
| 15:19 | 王給迦特人以太講：「你啥事及阮去？通倒去及王相及住，你是外邦人，遷徙佇外面，通倒去本所在！ |
| 15:20 | 你昨日才來，我今仔日豈通勞煩你及阮漂流啊？我去我所去的所在，你通倒去，帶你的兄弟相及倒去！願恩典誠實及你佇啲。」 |
| 15:21 | 以太應王講：「我指永活的耶和華，及我的主我的王的活命來咒誓：我的主我的王或活或死，見所佇啲的所在，你的奴僕也佇遐。」 |
| 15:22 | 大衛給以太講：「你去，過去！」迦特人以太及許個隨伊的人及所有的囝仔就攏過去。 |
| 15:23 | 遍地大聲啼哭，眾百姓攏過去，王也過汲淪溪；眾百姓過去，向曠野啲行。 |
| 15:24 | 撒督及攏總隨伊的利未人扛上帝的約櫃來，𪜶下上帝的櫃佇遐。亞比亞他上來，聽候眾百姓對城內出來攏過去。 |
| 15:25 | 王給撒督講：「你扛上帝的櫃倒去城內。我若得著恩典佇耶和華的目前，伊欲互我倒來，互我閣看見伊及伊徛起的所在。 |
| 15:26 | 設使伊講：『我無歡喜你』，看啊，我佇遮，願伊照伊看做好的行佇我！」 |
| 15:27 | 王閣給祭司撒督講：「你豈呣是先見嗎？你通安然倒去城內；你的子亞希瑪斯及亞比亞他的子約拿單，恁此二個子攏通及你去。 |
| 15:28 | 看啊，我佇曠野的渡口聽候對你遐有消息來報我知實情。」 |
| 15:29 | 對按呢撒督及亞比亞他扛上帝的櫃倒去耶路撒冷，𪜶就住佇遐。 |
| 15:30 | 大衛對上橄欖山的路上去，愈上去愈哮，罩頭殼褪赤腳來行。隨伊去的眾百姓也罩頭殼上去，愈上去愈哮； |
| 15:31 | 有人報大衛講：「亞希多弗也隨押沙龍佇叛黨的中間。」大衛講：「耶和華啊，求你互亞希多弗的計謀變做戇！」 |
| 15:32 | 大衛上到山頂、敬拜上帝的所在，看見亞基人戶篩，衫拆裂，頭殼摻塵埃來迎接伊。 |
| 15:33 | 大衛給伊講：「你若及我去，會拖倕我； |
| 15:34 | 你若倒去城內，給押沙龍講：『王啊，我欲做你的奴僕；我前做你的父的奴僕，今我也欲按呢做你的奴僕。』你就通給我破壞亞希多弗的計謀。 |
| 15:35 | 祭司撒督及亞比亞他豈無及你佇遐嗎？你對王宮內所聽見的，就著給祭司撒督及亞比亞他講。 |
| 15:36 | 撒督的子亞希瑪斯，亞比亞他的子約拿單，此二個子也及𪜶佇遐。見若恁所聽見的通託仗𪜶來報我。」 |
| 15:37 | 對按呢，大衛的朋友戶篩入城；押沙龍也入耶路撒冷。 |
