走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 21:1 | 佇大衛的時有飢荒，連連三年，大衛就問耶和華。耶和華講：「是因為掃羅及伊的家流人的血的，因為伊刣死基遍人。」 |
|---|---|
| 21:2 | 基遍人本呣是以色列人，就是亞摩利人所剩的；以色列人曾對𪜶咒誓，呣刣𪜶，總是掃羅為著以色列人及猶大人熱心，想計謀刣𪜶。王就召基遍人來給𪜶講， |
| 21:3 | 大衛給基遍人講：「我著為恁做甚麼？我著用甚麼來替贖，互恁祝福耶和華的產業啊？」 |
| 21:4 | 基遍人講：「阮及掃羅及伊的家的事無關係金銀，也呣通為著阮的緣故害死一個以色列人。」伊講：「恁所講怎樣，我欲為恁行伊。」 |
| 21:5 | 𪜶對王講：「彼個從前毀壞阮、謀害阮、欲滅阮，互阮𣍐得通徛起佇以色列的境內的， |
| 21:6 | 今願用伊的後裔七人交付阮，阮欲佇耶和華的面前，將𪜶吊佇耶和華所揀掃羅的基比亞。」王講：「我欲交互恁。」 |
| 21:7 | 掃羅的子約拿單，伊的子米非波設王保惜，因為大衛及掃羅的子約拿單前曾指耶和華的名來咒誓， |
| 21:8 | 總是王將愛雅的查某子利斯巴給掃羅所生二個子亞摩尼、米非波設，及掃羅的查某子米甲給米何拉人巴西萊的子亞得列所生的五個子， |
| 21:9 | 攏交佇基遍人的手。𪜶就吊𪜶佇山裡，佇耶和華的面前，這七人攏做一下倒落來。攏總死佇起頭收割的時，就是起頭割大麥的時。 |
| 21:10 | 愛雅的查某子利斯巴提粗麻布為家己舒佇石磐頂，對起頭收割的時到天落雨水佇身屍的時，呣准日時空中的鳥，及暝時的走獸到佇許個身屍。 |
| 21:11 | 有人將掃羅的妃愛雅的查某子利斯巴所做的事給大衛講。 |
| 21:12 | 大衛就去，對基列雅比人提掃羅的骨及伊的子約拿單的骨（𪜶曾對伯珊的街路偷提，因為非利士人前佇基利波刣死掃羅的時，非利士人有吊𪜶佇遐。） |
| 21:13 | 伊就對遐帶掃羅的骨及伊的子約拿單的骨倒來，人就收拾許個受吊死者的骨， |
| 21:14 | 就埋葬掃羅及伊的子約拿單的骨佇便雅憫地的洗拉，佇掃羅的父基士的墓；照王一切所命令的去行。此霎了後上帝為著彼個地方聽𪜶的祈禱。 |
| 21:15 | 非利士人閣及以色列人交戰；大衛及伊的奴僕落去，及非利士人交戰，大衛真厭倦。 |
| 21:16 | 有大漢族的一人名叫以實比諾；伊的槍的銅重三百舍客勒，閣佩新的刀，欲刣大衛。 |
| 21:17 | 總是洗魯雅的子亞比篩保護大衛，拍死彼個非利士人。當時，隨大衛的人對伊咒誓講：「此霎了後你呣通閣及阮出戰，驚了拍熄以色列的燈。」 |
| 21:18 | 後來，閣及非利士人交戰佇歌伯，彼時有戶沙人西比該刣死一個大漢族的人名做撒弗。 |
| 21:19 | 閣再佇歌伯及非利士人交戰，伯利恆人雅雷俄珥金的子伊勒哈難刣死迦特人歌利亞。伊的槍柄親像布機的軸心。 |
| 21:20 | 閣佇迦特交戰，佇遐有一個大漢人，二支手各有六支指頭仔，二支腳各有六支指頭仔，共有二十四支；伊也是大漢族人的子。 |
| 21:21 | 此人藐視以色列的時，大衛的兄示米亞的子約拿單就給伊刣死。 |
| 21:22 | 此四人是迦特大漢人所生的，攏死佇大衛的手及伊的奴僕的手。 |
