走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 14:1 | 會眾就出聲大喉叫；彼暝百姓攏啼哭。 |
|---|---|
| 14:2 | 以色列人哀怨摩西、亞倫；會眾對𪜶講：「呣值著阮死佇埃及地，呣值著死佇此曠野。 |
| 14:3 | 耶和華啥事導阮到此所在，互阮倒佇刀下啊？阮的某及子欲受掠。阮倒去埃及豈無卡好嗎？」 |
| 14:4 | 𪜶相及講：「咱著立一個首領倒去埃及！」 |
| 14:5 | 摩西、亞倫就仆落佇以色列全會眾人的面前。 |
| 14:6 | 偷看地的人的中間，嫩的子約書亞及耶孚尼的子迦勒拆裂𪜶的衫， |
| 14:7 | 對以色列全會講：「阮所經過、偷看的地是極好的地。 |
| 14:8 | 耶和華若歡喜咱，就欲導咱到彼個地，將地賞賜咱；彼個地是流奶及蜜的地。 |
| 14:9 | 總是恁呣通背叛耶和華，也莫得驚彼所在的百姓；因為𪜶是做咱的食物，閣致蔭𪜶的已經離開𪜶。閣有耶和華及咱佇啲，呣免驚𪜶！」 |
| 14:10 | 總是全會講：「用石頭擲死𪜶。」耶和華的榮光佇會幕向以色列人出現。 |
| 14:11 | 耶和華對摩西講：「此個百姓看輕我欲到底時啊？我佇𪜶中間行這一切的神蹟，𪜶猶久呣信我欲到底時？ |
| 14:12 | 我欲用瘟疫來拍𪜶，互𪜶𣍐得著承接業，互你成做大國，比𪜶卡強。」 |
| 14:13 | 摩西對耶和華講：「按呢埃及人欲聽見；因為你用你的權能，導諸個百姓對𪜶中間上來。 |
| 14:14 | 𪜶欲用諸個事給此所在徛起的人講；𪜶已經聽見耶和華──你佇諸個百姓的中間；因為耶和華你當面互人看見，閣你的雲停佇𪜶的頂面。你日時佇雲柱中，暝時佇火柱中，佇𪜶的面前行。 |
| 14:15 | 今你若刣死諸個百姓，親像刣死一人，許個聽見你的名聲的列國欲議論講： |
| 14:16 | 『因為耶和華𣍐會導諸個百姓入伊對𪜶咒誓應允的地，所以佇曠野刣死𪜶。』 |
| 14:17 | 今求主顯出大權能，照你所曾講的講： |
| 14:18 | 『耶和華無快受氣，閣有豐盛的慈愛，赦免罪過過失；決斷無掠有罪的做無罪，的確歸咎伊的罪，對父到子，到三、四代。』 |
| 14:19 | 求你照你的大慈愛赦免此個百姓的罪，親像你對埃及到今常常赦免𪜶一樣。」 |
| 14:20 | 耶和華講：「我照你的話有赦免𪜶。 |
| 14:21 | 總是我指我的活命來講，遍地欲充滿耶和華的榮光。 |
| 14:22 | 因為諸個人有看見我的榮光以及我所行佇埃及及曠野的神蹟，猶久試我十擺，呣聽趁我的話， |
| 14:23 | 𪜶決斷𣍐得著看見我對𪜶的列祖所咒誓應允的地。凡若看輕我的，攏𣍐得著看見； |
| 14:24 | 獨獨我的奴僕迦勒，因為伊另外有一個心志，完全隨我，我欲導伊入伊所行到的地；伊的後裔也欲得著彼個地做業。 |
| 14:25 | 亞瑪力人及迦南人踮佇山谷中，明仔日恁著越倒轉，對紅海的路去曠野。」 |
| 14:26 | 耶和華吩咐摩西、亞倫講： |
| 14:27 | 「諸個歹的會眾對我發出怨言，我吞愞𪜶欲到底時啊？以色列人哀怨我的怨言，我攏聽見啦。 |
| 14:28 | 著給𪜶講，耶和華講：『我指我的活命來講，恁互我聽見的話，我欲照按呢款待恁。 |
| 14:29 | 恁的身屍欲倒佇此曠野，見若恁中間過算的人照伊的數額，對二十歲以上，對我出怨言的， |
| 14:30 | 的確𣍐得著入我咒誓應允恁徛起的地；獨獨耶孚尼的子迦勒及嫩的子約書亞欲入去。 |
| 14:31 | 總是恁的囝仔，就是恁所講、欲受掠的，我欲導𪜶入去，𪜶就知恁所棄拺彼個地。 |
| 14:32 | 論到恁，恁的身屍欲倒佇此曠野； |
| 14:33 | 恁的子兒欲佇曠野漂流四十年，擔當恁淫行的罪，直到恁的身屍佇曠野消滅。 |
| 14:34 | 照恁偷看彼個地的日子共四十日，一日抵一年，恁著擔當罪四十年，恁就知我棄拺恁， |
| 14:35 | 我──耶和華已經講，我欲按呢款待這一切聚集對敵我的歹會眾；𪜶欲佇此曠野消滅，死佇遮。』 |
| 14:36 | 摩西所差、偷看彼個地倒轉來，報彼所在的歹消息，致到全會哀怨伊， |
| 14:37 | 許個報彼所在歹消息的人攏抵著瘟疫，死佇耶和華的面前。 |
| 14:38 | 偷看彼所在的人的中間只有嫩的子約書亞及耶孚尼的子迦勒猶久活啲。 |
| 14:39 | 摩西將諸個話給以色列的眾人講，百姓就真憂悶。 |
| 14:40 | 𪜶早早起來，上去山頂，講：「看啊，阮佇遮，欲上去耶和華所應允的地，因為阮有犯罪。」 |
| 14:41 | 摩西講：「恁啥事違背耶和華的命令啊？此個事𣍐會亨通。 |
| 14:42 | 莫得上去；因為耶和華無佇恁中間，驚了恁互對敵拍敗。 |
| 14:43 | 因為亞瑪力人及迦南人攏佇遐佇恁的頭前，恁欲倒佇刀下；因為恁越頭無隨耶和華，所以耶和華無欲及恁佇啲。」 |
| 14:44 | 總是𪜶自專上山頂，若是耶和華的約櫃及摩西無出營。 |
| 14:45 | 對按呢亞瑪力人及迦南人徛起佇山裡的攏落來攻擊𪜶拍敗𪜶，到佇何珥瑪。 |
