走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 21:1 | 徛起佇南方的迦南人亞拉得王，聽見以色列人對亞他林路來，就及以色列人交戰，掠𪜶幾若人。 |
|---|---|
| 21:2 | 以色列人對耶和華發願講：「你若真正將此個百姓交我的手，我就一盡剿滅𪜶的城。」 |
| 21:3 | 耶和華聽以色列人的聲，將迦南人交代𪜶，𪜶就一盡滅𪜶及𪜶的城。彼所在的名就叫何珥瑪。 |
| 21:4 | 𪜶對何珥山起身，對紅海的路去，欲踅以東的地。百姓為著所行的路，心不止餒志， |
| 21:5 | 就嫌上帝及摩西講：「恁啥事導阮出埃及、互阮死佇此個曠野啊？因為無餅，無水，阮的心厭賤此個清淡的食物。」 |
| 21:6 | 耶和華就差火蛇入百姓的中間，咬百姓。以色列人死多多。 |
| 21:7 | 百姓到摩西遐，講：「阮有犯罪，因為阮有嫌耶和華及你。請你求耶和華，互諸個蛇離開阮。」摩西就替百姓求。 |
| 21:8 | 耶和華對摩西講：「你做一尾火蛇，掛佇旗杆頂；見若互伊咬著的，一下看，就會活。」 |
| 21:9 | 摩西就做一尾銅蛇，掛佇旗杆頂；見若互蛇咬著的，一下看此個銅蛇就活。 |
| 21:10 | 以色列人起身，紮營佇阿伯。 |
| 21:11 | 閣對阿伯起身，紮營佇以耶亞巴琳，就是向日出的所在，及摩押相對的曠野。 |
| 21:12 | 對遐起身，紮營佇撒烈的山谷。 |
| 21:13 | 對遐起身，紮營佇亞嫩的彼旁。就是佇曠野，對亞摩利的地界出來；因為亞嫩是摩押的交界，佇摩押及亞摩利的中間。 |
| 21:14 | 所以耶和華交戰的冊有講：「蘇法的哇哈伯及亞嫩許個山谷， |
| 21:15 | 以及諸個山谷的水泉，就是向亞珥徛起的所在，倚近摩押的境界。」 |
| 21:16 | 𪜶對遐到比珥，這就是耶和華曾對摩西所講起的井。講：「你聚集百姓，我欲用水互𪜶。」 |
| 21:17 | 彼時以色列人唱歌講：井啊，淐出來！恁著對伊唱歌。 |
| 21:18 | 此個井是首領開伊，百姓尊貴的人用權柄用𪜶的枴仔掘的。𪜶對曠野去瑪他拿， |
| 21:19 | 對瑪他拿到拿哈列，對拿哈列到巴末， |
| 21:20 | 對巴末到摩押地的山谷，到彼個看落低，會看見曠野的毗斯迦的山尖。 |
| 21:21 | 以色列人差使者去見亞摩利人的王西宏，講： |
| 21:22 | 「求你容允我對你的地經過；阮無偏佇田園及葡萄園，阮也無欲飲井裡的水，獨獨行大路，直直經過你的地界。」 |
| 21:23 | 西宏呣准以色列人經過伊的境界，西宏就聚集伊的眾百姓出來到曠野，欲抵敵以色列人，到雅雜及以色列人交戰。 |
| 21:24 | 以色列人用刀刣伊，佔伊的地，對亞嫩到雅博，直直到亞捫人遐，因為亞捫人的地界真堅固。 |
| 21:25 | 以色列人取伊一切的城，以色列人也徛起亞摩利的城，佇希實本及伊一切的城。 |
| 21:26 | 此個希實本是亞摩利王西宏的城；伊曾及摩押前的王交戰，對伊的手搶全地，直到亞嫩。 |
| 21:27 | 所以做詩的人唸講：恁著來希實本；願西宏的城得著起造，閣堅固。 |
| 21:28 | 因為有火對希實本出，有火焰對西宏的城發，燒毀摩押的亞珥及亞嫩高的所在的主。 |
| 21:29 | 摩押啊，你有災禍！基抹的百姓啊，恁滅無啦！互伊的查甫丁做逃走的，查某子做受掠的，交互亞摩利王西宏。 |
| 21:30 | 阮射𪜶；希實本到底本一盡毀滅。阮互地拋荒，直到羅法；就是到米底巴。 |
| 21:31 | 按呢，以色列人就徛起佇亞摩利人的地。 |
| 21:32 | 摩西差人去偷看雅謝，就取𪜶許個鄉社，趕出徛起遐的亞摩利人。 |
| 21:33 | 以色列人越對巴珊的路去。巴珊王噩及伊的眾百姓，攏出來抵敵𪜶，佇以得來及𪜶交戰。 |
| 21:34 | 耶和華對摩西講：「呣免驚𪜶！因為我已經將伊及伊的眾百姓，伊的地，攏交佇你的手；你著款待伊親像你曾款待踮佇希實本的亞摩利王西宏一樣。」 |
| 21:35 | 𪜶就拍伊及伊許個子，以及伊的眾百姓，無給伊留一個，就得著伊的地。 |
