走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 10:1 | 耶路撒冷王亞多尼洗德聽見約書亞取艾城，一盡滅伊，款待艾城及伊的王，親像前款待耶利哥及伊的王一樣，閣聽見基遍徛起的百姓及以色列人立和約，徛起佇𪜶中間， |
|---|---|
| 10:2 | 就真驚；因為基遍是大城，親像一個京城，比艾城卡大，閣城內的人攏是勇士。 |
| 10:3 | 對按呢耶路撒冷王亞多尼洗德差人去見希伯崙王何咸、耶末王毗蘭、拉吉王雅非亞，及伊磯倫王底璧，講： |
| 10:4 | 「請恁上來我遮幫助我，咱通來去拍基遍，因為伊及約書亞及以色列立和約。」 |
| 10:5 | 對按呢亞摩利人五個王，就是耶路撒冷王、希伯崙王、耶末王、拉吉王、伊磯倫王，大家聚集，及𪜶的軍隊上去，紮營佇基遍的對面，欲攻擊伊。 |
| 10:6 | 基遍人就差人去吉甲的營見約書亞，講：「你呣通勼手呣看你的奴僕，求你緊緊來遮拯救阮，幫助阮，因為徛起山地亞摩利人許個王攏聚集來攻擊阮。」 |
| 10:7 | 對按呢約書亞及伊一切的戰士，以及一切大力的勇士，攏對吉甲上去。 |
| 10:8 | 耶和華給約書亞講：「莫得驚𪜶；因為我已經將𪜶交佇你的手，𪜶無一人會徛住佇你的面前。」 |
| 10:9 | 約書亞忽然到𪜶遐，因為伊對吉甲通暝上去。 |
| 10:10 | 耶和華互𪜶佇以色列人的面前紛亂。就佇基遍刣死𪜶真多，追趇𪜶，佇上伯和崙的路拍𪜶，到亞西加及瑪基大。 |
| 10:11 | 𪜶佇以色列人的面前逃走，佇伯和崙落去的時，耶和華對天落大雹佇𪜶的身上，到亞西加，互𪜶死。許個互雹拍死的，比以色列人用刀刣死的卡多。 |
| 10:12 | 當耶和華將亞摩利人交佇以色列人的日，約書亞就給耶和華講，也佇以色列人的面前講：日頭啊，你著停佇基遍的頂面；月啊，你著停佇亞雅崙的山谷。 |
| 10:13 | 日頭就停啲，月就歇啲，聽候百姓報仇佇𪜶的對敵。此個事豈呣是寫佇雅煞珥的冊嗎？日頭停佇天的中央，無緊緊落去，約略有一日的久。 |
| 10:14 | 以前，以後，無有親像彼一日，得著耶和華聽人的聲，是因為耶和華替以色列人交戰。 |
| 10:15 | 約書亞及以色列眾人倒來吉甲的營內。 |
| 10:16 | 彼五個王逃走，匿佇瑪基大的洞內。 |
| 10:17 | 有人去給約書亞講：「彼五個王已經尋著啦，攏匿佇瑪基大的洞內。」 |
| 10:18 | 約書亞講：「徙大塊石到洞口，派人踮遐顧守𪜶， |
| 10:19 | 總是恁呣通停腳，著追趇恁的對敵，拍𪜶的後隊，呣通容允𪜶入𪜶的城，因為耶和華──恁的上帝已經將𪜶交佇恁的手。」 |
| 10:20 | 約書亞及以色列大大刣死𪜶，到一盡剿滅才息；其中剩的人攏入堅固的城。 |
| 10:21 | 眾百姓就安然倒來瑪基大的營，到約書亞遐。無一人敢出聲攻擊以色列人。 |
| 10:22 | 約書亞講：「開洞口，掠彼五個王出洞，來我遮。」 |
| 10:23 | 𪜶就按呢行，掠彼五個王，就是耶路撒冷王、希伯倫王、耶末王、拉吉王、伊磯倫王，對洞內出來，帶到伊遐。 |
| 10:24 | 掠許個王出來到約書亞遐的時，約書亞就叫以色列眾人來，對許個及伊相及去的軍長講：「恁近前來，將腳踏佇諸個王的頷頸。」𪜶就近前來，用腳踏佇𪜶的頷頸。 |
| 10:25 | 約書亞對𪜶講：「恁莫得驚，也莫得愞。著勇敢壯膽，因為恁所欲攻擊一切的對敵耶和華欲按呢款待𪜶。」 |
| 10:26 | 後來約書亞拍死𪜶，吊𪜶佇五欉樹。𪜶吊佇樹裡到下昏。 |
| 10:27 | 日落的時，約書亞出令，就對樹裡收身屍落來，㧒佇𪜶所匿的洞，將幾若塊大石下佇洞口，到今猶佇啲。 |
| 10:28 | 彼日，約書亞取瑪基大，用刀刣死𪜶及𪜶的王；彼內面的人一盡剿滅，無留一個。伊款待瑪基大的王，親像前款待耶利哥王一樣。 |
| 10:29 | 約書亞及以色列眾人對瑪基大遐去到立拿，攻擊立拿。 |
| 10:30 | 耶和華將伊及伊的王交佇以色列人的手。伊用刀刣死伊，及彼內面的眾人，無留一個。伊款待伊的王，親像前款待耶利哥王一樣。 |
| 10:31 | 約書亞及以色列眾人對立拿遐去到拉吉，紮營佇伊的對面，來攻擊伊。 |
| 10:32 | 耶和華將拉吉交佇以色列人的手。隔日就取伊，用刀刣死伊及彼內面的眾人，是照伊對立拿一切所行的。 |
| 10:33 | 彼時基色的王荷蘭來欲幫助拉吉，約書亞就拍死伊及伊的百姓，攏無給伊留一個。 |
| 10:34 | 約書亞及以色列眾人對拉吉去到伊磯倫，佇伊的對面紮營，攻擊伊。 |
| 10:35 | 彼日就取伊，用刀拍伊。佇彼日，一盡剿滅彼內面的眾人，是照伊對拉吉一切所行的。 |
| 10:36 | 約書亞及以色列眾人對伊磯倫上去到希伯倫，攻擊伊， |
| 10:37 | 就取伊，用刀拍伊及伊的王，以及伊所屬的城，刣死彼內面的百姓，攏無留一個，是照伊對伊磯倫一切所行的，一盡剿滅伊，及彼內面的眾百姓。 |
| 10:38 | 約書亞及以色列眾人倒來到底璧，攻擊伊， |
| 10:39 | 就取伊及伊的王，以及屬伊的城，用刀拍伊一盡滅彼內面的眾人，無留一個。照伊前款待希伯倫的，今也款待底璧及伊的王，也照伊前款待立拿及伊的王一樣。 |
| 10:40 | 按呢，約書亞拍全地，就是山地、南方的地、平洋、山坪，及𪜶攏總的王，無留一個。見有喘氣的一盡剿滅，照耶和華──以色列的上帝所命令的。 |
| 10:41 | 對加低斯巴尼亞到迦薩，閣歌珊全地，以及基遍，攏互約書亞拍。 |
| 10:42 | 許個王及𪜶的地，約書亞做一時取𪜶，因為耶和華──以色列的上帝替以色列交戰。 |
| 10:43 | 約書亞及以色列的眾人就倒來到吉甲的營盤。 |
