走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 6:1 | 耶利哥的城門因為以色列人的緣故就關住住，無人出也無人入。 |
|---|---|
| 6:2 | 耶和華給約書亞講：「看啊，我有將耶利哥及伊的王，及伊大力的勇士，攏交佇你的手。 |
| 6:3 | 恁一切的戰士著圍踅此個城，一擺，六日攏著按呢行。 |
| 6:4 | 七個祭司著抬七支羊角的號筒行佇約櫃的頭前。到第七日，恁著踅城七擺，祭司也著歕號筒。 |
| 6:5 | 𪜶歕角的聲拖長，恁聽見號筒的聲，眾百姓著大聲喝，城牆就欲倒平平，逐人攏著直直進前去。」 |
| 6:6 | 嫩的子約書亞叫祭司來，給𪜶講：「恁著扛約櫃，祭司七人抬七支羊角的號筒佇耶和華的櫃前」； |
| 6:7 | 閣給百姓講：「恁著進前去踅城，帶軍器的著行佇耶和華的櫃前。」 |
| 6:8 | 約書亞對百姓講息，七個祭司抬七支羊角的號筒行佇耶和華的面前歕號筒；耶和華的約櫃隨佇𪜶的後面。 |
| 6:9 | 帶軍器的行佇歕號筒的祭司的頭前，後隊隨約櫃行。祭司愈行愈歕號筒。 |
| 6:10 | 約書亞命令百姓講：「恁呣通喝，呣通互人聽見恁的聲，連一句也呣通出嘴，聽候我吩咐恁喝的日，彼時才通喝。」 |
| 6:11 | 對按呢，伊互耶和華的約櫃圍城，踅一擺；𪜶就倒來營盤，歇佇營內。 |
| 6:12 | 天光約書亞早早起來，祭司也扛耶和華的約櫃。 |
| 6:13 | 抬七支羊角的號筒的七個祭司佇耶和華的櫃前，直直行歕號筒；帶軍器的佇𪜶的頭前行，後隊隨耶和華的約櫃行。祭司愈行愈歕號筒。 |
| 6:14 | 第二日，𪜶踅城一擺，就倒來營盤。六日攏是按呢行。 |
| 6:15 | 第七日拍昲光的時，𪜶早早起來，照按呢踅城七擺；只有此日踅城七擺。 |
| 6:16 | 到第七擺，祭司歕號筒的時，約書亞給百姓講：「著喝啊，因為耶和華用城交互恁啦！ |
| 6:17 | 此個城及其中一切所有的攏著分別歸互耶和華；只有娼妓喇合以及一切及伊佇厝內的通活啲，因為伊有囥密咱所差的使者。 |
| 6:18 | 恁佇應該滅的物著家己謹慎，驚了恁提應該滅的物，致到家己也做應該滅的，閣連累以色列全營也做應該滅的，來害著伊。 |
| 6:19 | 只有金、銀及銅鐵的器具攏著分別歸互耶和華，收入耶和華的府庫。」 |
| 6:20 | 百姓就喝，祭司也歕號筒。百姓聽見號筒的聲，就大聲喝，城牆就倒到平平，百姓就進前入城，逐人直直去，對按呢取彼個城； |
| 6:21 | 閣將城內所有的，無論男女老幼，牛、羊及驢，攏用刀一盡滅伊。 |
| 6:22 | 約書亞給偵探彼個地彼二人講：「恁入去彼個娼妓的厝，照恁對伊所咒誓的，導彼個婦仁人及一切屬佇伊的攏對遐出來。」 |
| 6:23 | 許個做偵探的少年人就入去，導喇合及伊的老父老母、兄弟，以及一切屬佇伊的出來，也導伊的親戚出來，互𪜶住佇以色列的營外。 |
| 6:24 | 𪜶就用火燒彼個城及其中一切所有的；獨獨金、銀及銅鐵的器具攏下佇耶和華厝內的府庫。 |
| 6:25 | 約書亞就保全娼妓喇合及伊老父的家眷，及一切屬佇伊的的活命；因為伊有囥密約書亞所差偷看耶利哥的使者，伊就踮佇以色列中，到今仔日。 |
| 6:26 | 當時，約書亞對眾人咒誓講：「見若起來起造此個耶利哥城的，著佇耶和華的面前受咒詛。伊下地基的時，欲死大子，下門的時，欲死煞尾子。」 |
| 6:27 | 耶和華及約書亞相及佇啲，伊的名聲滿滿佇彼所在。 |
