走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 18:1 | 約沙法有多多貨財及榮光，就及亞哈結親。 |
|---|---|
| 18:2 | 過幾若年，伊落去撒瑪利亞見亞哈；亞哈為著伊及隨伊的百姓刣多多牛羊，勸伊及伊相及去基列的拉末。 |
| 18:3 | 以色列王亞哈給猶大王約沙法講：「你欲及我去基列的拉末抑呣？」應講：「我親像你，我的百姓親像你的百姓，阮欲及你去交戰。」 |
| 18:4 | 約沙法給以色列王講：「請你代先問耶和華的意思。」 |
| 18:5 | 以色列王就聚集先知四百人，問𪜶講：「阮著上去基列的拉末來交戰，抑是著息啊？」𪜶應講：「通上去，因為上帝欲用𪜶交佇王的手。」 |
| 18:6 | 約沙法講：「佇遮豈無猶有耶和華的先知，互咱通對伊來問嗎？」 |
| 18:7 | 以色列王給約沙法講：「猶有一人，咱通對伊來問耶和華。總是我怨恨伊；因為伊所讖語我的，無一項好，只有常常講災禍若定。此人是音拉的子米該雅。」約沙法講：「請王莫得按呢講。」 |
| 18:8 | 以色列王就召一個官員來，講：「你去叫音拉的子米該雅緊緊來。」 |
| 18:9 | 以色列王及猶大王約沙法逐個坐伊的座位，穿禮服坐佇撒瑪利亞城門口闊的所在，眾先知逐個佇𪜶的面前讖語。 |
| 18:10 | 基拿拿的子西底家做鐵角，講：「耶和華按呢講：『你欲用諸個觸亞蘭人，到𪜶滅無。』」 |
| 18:11 | 眾先知攏按呢讖語講：「通上去基列的拉末，欲得勝，因為耶和華欲將伊交佇王的手。」 |
| 18:12 | 彼個去叫米該雅的使者給伊講：「看啊，眾先知攏講一樣話對王講好事，求你所講的及𪜶相同，平平講好話。」 |
| 18:13 | 米該雅講：「我指永活的耶和華咒誓來講，我的上帝講甚麼，我欲講伊。」 |
| 18:14 | 米該雅到王的面前，王問伊講：「米該雅啊，阮著上去基列的拉末來交戰，抑是著息啊？」伊應講：「通上去，欲得勝，因為𪜶欲受交付佇恁的手」。 |
| 18:15 | 王對伊講：「我著幾擺教你咒誓，你託耶和華的名只有著用真實給我講。」 |
| 18:16 | 米該雅講：「我看見以色列眾百姓四散佇山裡，親像無牧者的羊一般。耶和華按呢講：『諸個無主人，𪜶逐個通平安倒去𪜶的家。』」 |
| 18:17 | 以色列王給約沙法講：「我豈無給你講，此人所欲讖語我的，無講好話，只有災禍若定？」 |
| 18:18 | 米該雅講：「所以恁著聽耶和華的話。我看見耶和華坐佇寶座，天頂的萬軍徛佇伊的左右。 |
| 18:19 | 耶和華講：『是誰欲引誘以色列王亞哈互伊上去基列的拉末死佇遐啊？』此個講按呢，彼個講按呢。 |
| 18:20 | 後來，有一個神出來，徛佇耶和華的面前講：『我欲引誘伊。』耶和華問伊講：『你欲用甚麼法度？』 |
| 18:21 | 伊講：『我欲出去做白賊的神，佇伊眾先知的嘴。』耶和華講：『你欲引誘伊，也欲成伊！出去來做按呢！』。 |
| 18:22 | 今耶和華用白賊的神入佇你諸個先知的嘴，耶和華論到你有講災禍。」 |
| 18:23 | 基拿拿的子西底家進前搧米該雅的嘴䩃，講：「耶和華的神對叨落一條路離開我來及你講啊？」 |
| 18:24 | 米該雅講：「看啊，你入內房家己匿，彼日就欲看見。」 |
| 18:25 | 以色列王講：「著帶米該雅去，交城首亞們及王的子約阿施，講： |
| 18:26 | 『王按呢講：用此人關佇監裡，用艱苦的餅，艱苦的水互伊食，聽候我平安倒來。』」 |
| 18:27 | 米該雅講：「你若真正平安倒來，就是耶和華無託我講」；閣講：「諸個百姓啊，恁攏著聽！」 |
| 18:28 | 以色列王及猶大王約沙法上去基列的拉末。 |
| 18:29 | 以色列王給約沙法講：「我欲改裝上陣，你通穿王服。」以色列王就改裝，𪜶就上陣。 |
| 18:30 | 亞蘭王有吩咐伊的戰車的官長講：「無論大細，呣通及𪜶交戰，只有及以色列王交戰。」 |
| 18:31 | 戰車的官長看見約沙法就講，這是以色列王，就越過去欲及伊交戰。約沙法就哮救，耶和華就幫助伊，上帝也感動𪜶離開伊。 |
| 18:32 | 戰車的官長看見呣是以色列王，就越轉無追伊。 |
| 18:33 | 有一人偶然開弓，射入以色列王戰甲的合鑆。王給趕車者講：「你越轉手，帶我出陣，因為我著重傷啦！」 |
| 18:34 | 彼日交戰的勢面愈猛烈，以色列王勉強徛佇車裡抵當亞蘭人，到下昏。差不多日落的時，就死。 |
