走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 23:1 | 第七年，耶何耶大家己強盛，召百總耶羅罕的子亞撒利雅，約哈難的子以實瑪利，俄備得的子亞撒利雅，亞大雅的子瑪西雅，細基利的子以利沙法，許個來及伊立約。 |
|---|---|
| 23:2 | 𪜶遍行猶大，對猶大許個城聚集利未人及以色列的族長攏到耶路撒冷。 |
| 23:3 | 全會佇上帝的殿及王立約。伊對𪜶講：「看啊，王的子欲做王，照耶和華論到大衛的子孫所講的； |
| 23:4 | 今恁著按呢行：恁諸個祭司及利未人三份一佇安息日入來者，著做顧門者， |
| 23:5 | 三份一著佇王宮，三份一著佇地基的門；百姓攏著佇耶和華殿內的院。 |
| 23:6 | 獨獨祭司及啲服事的利未人以外，別人呣通入耶和華的殿；諸個人通入去，因為𪜶是聖。總是眾百姓著為著耶和華來顧守。 |
| 23:7 | 利未人逐個手著抬軍器，四圍保護王；見若自專入殿者，著互伊死。王出入的時，恁著跟隨伊。」 |
| 23:8 | 利未人及猶大眾人照祭司耶何耶大一切所命令的去行，逐人帶𪜶輪著安息日入來的人及輪著安息日出去的人，因為祭司耶何耶大呣准𪜶散班。 |
| 23:9 | 祭司耶何耶大就將上帝殿內所囥大衛王的槍、屏牌、大牌交互許個百總， |
| 23:10 | 閣派眾百姓手逐個抬家私，佇壇及殿遐，對殿的正旁到殿的倒旁，徛佇王的四圍； |
| 23:11 | 𪜶就導王的子出來，給伊戴冕旒，將律法的冊互伊。耶何耶大及伊許個子用油抹伊，設立伊做王，眾人講：「願王萬歲。」 |
| 23:12 | 亞她利雅聽見百姓走來謳咾王的聲，就到百姓遐，入耶和華的殿， |
| 23:13 | 看見王徛佇殿門的柱邊，許個軍長及歕號頭者徛佇王的左右，百姓歡喜歕號頭，閣有唱歌的，用逐樣的樂器導眾人謳咾；亞她利雅就拆裂伊的衫，喝講：「反叛啦！反叛啦！」 |
| 23:14 | 祭司耶何耶大導管轄軍隊的百總，對𪜶講：「對班列的中間趕伊出去，見若隨伊的著用刀刣死伊！」因為祭司講：「呣通佇耶和華的殿刣伊。」 |
| 23:15 | 𪜶閃開雙旁，互伊去；伊行到王宮馬的門，就佇遐刣死伊。 |
| 23:16 | 耶何耶大佇本身及百姓及王的中間立約，攏欲做耶和華的百姓。 |
| 23:17 | 對按呢眾百姓到巴力的廟，拆毀伊，拍碎伊許個壇及偶像，閣佇壇前拍死巴力的祭司瑪坦。 |
| 23:18 | 耶何耶大閣照大衛早日所定著的，設立祭司利未人擔當耶和華殿的職。前大衛用此個班列派佇耶和華的殿，互𪜶歡喜唱歌，獻耶和華的燒祭，照所記載佇摩西的律法的； |
| 23:19 | 伊也設顧門者佇耶和華的殿許個門，無論啥代，無清氣者𣍐得入去。 |
| 23:20 | 閣帶百總及貴族；及百姓的首領，及國內的眾百姓，對耶和華的殿導王落來，對頂的門進入王宮，互王坐國位。 |
| 23:21 | 國內眾百姓攏歡喜，通城安靜。𪜶用刀刣死亞她利雅。 |
