走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 6:1 | 彼時，所羅門講：耶和華曾講伊欲踮佇黑黑暗暗的中間。 |
|---|---|
| 6:2 | 總是我已經起一間殿互你徛起，做你永遠住的所在。 |
| 6:3 | 王越轉伊的面祝福以色列的會眾，以色列會眾攏徛起來。 |
| 6:4 | 伊講：「耶和華──以色列的上帝是應該謳咾者！因為伊親嘴對我的父大衛所應允的，親手應驗伊。 |
| 6:5 | 講：『對我導我的百姓出埃及地以來，我未曾佇以色列眾支派中揀一個城來起殿互我的名踮佇遐，也未曾揀人做我的百姓以色列的仁君； |
| 6:6 | 獨獨揀耶路撒冷互我的名踮佇遐，閣揀大衛治理我的百姓以色列。』 |
| 6:7 | 「我的父大衛心內有意思，欲為耶和華──以色列的上帝的名起殿， |
| 6:8 | 總是耶和華對我的父大衛講：『你的心有意思欲為我的名起殿，你此個意思真好； |
| 6:9 | 獨獨你呣通起殿，你所親生的子欲為我的名起殿。』 |
| 6:10 | 「今耶和華應驗伊所講的話，我照耶和華的話起來續接我的父大衛，坐以色列的國位，閣為耶和華──以色列上帝的名起殿。 |
| 6:11 | 我安置約櫃佇遐，櫃內有耶和華的約，就是伊及以色列人所立的約。」 |
| 6:12 | 王當以色列會眾的面前，徛佇耶和華的壇前，抬起手，（ |
| 6:13 | 因為所羅門曾造一個銅台，長五肘，闊五肘，高三肘，下佇院中），就徛佇台頂，當以色列會眾的面前跪落去，抬起手向天， |
| 6:14 | 講：「耶和華──以色列的上帝啊，佇天裡，佇地裡無有上帝親像你！守約行慈愛佇你許個奴僕，就是盡心行佇你的面前者； |
| 6:15 | 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。 |
| 6:16 | 耶和華──以色列的上帝啊，你所應允你的奴僕──我的父大衛講：『你的子孫若謹慎𪜶的所做，行我的律法，親像你行佇我的面前，就屬佇你的欲佇我的面前坐以色列的國位永無斷。』今求你應驗伊。 |
| 6:17 | 耶和華──以色列的上帝啊，你對你的奴僕大衛所講的，求你互伊成做實事。 |
| 6:18 | 「上帝豈真正欲及世間人徛起地上嗎？看啊，天及諸個天的天尚且無夠額互你徛起，何況我所起此間殿啊？ |
| 6:19 | 耶和華──我的上帝啊，願你俯落數念你的奴僕的祈禱懇求，來聽你的奴僕所祈禱佇你的面前的求叫祈禱。 |
| 6:20 | 願你日暝看顧此個殿，就是你所講起欲安置你的名佇遐的所在；來聽你的奴僕所欲向此所在祈禱的祈禱。 |
| 6:21 | 你的奴僕及你的百姓以色列向此所在祈禱的時，願你聽𪜶的祈求，願你對天你徛起的所在來聽𪜶，你聽見的時就赦免。 |
| 6:22 | 「人若得罪伊的厝邊，也有人用一個咒誓教伊咒誓，伊若來此間殿，佇你的壇前咒誓， |
| 6:23 | 求你對天聽來辦理伊，審判你諸個奴僕，定歹人的罪，照伊所行的報應佇伊的頭殼；定義人做義，照伊的義來互伊。 |
| 6:24 | 「設使你的百姓以色列因為得罪你，才刣輸佇對敵的面前，𪜶若歸向你認你的名，閣佇此間殿祈禱懇求你， |
| 6:25 | 求你對天聽𪜶，來赦免你的百姓以色列的罪，互𪜶倒來你所賞賜𪜶，及𪜶列祖的地。 |
| 6:26 | 「設使𪜶得罪你，致到天關密無落雨，你刑罰𪜶的時，𪜶若向此所在祈禱，認你的名，離開𪜶的罪， |
| 6:27 | 求你佇天裡聽𪜶，赦免你的奴僕及你的百姓以色列的罪，佇你教示𪜶所著行的好路的時，閣落雨佇你的地，就是你賞賜你的百姓做業的。 |
| 6:28 | 「此個地若有飢荒、瘟疫、枯焦、朽爛、草蜢、剪蟲，抑是𪜶許個對敵，佇𪜶許個城的地圍困𪜶，無論有甚麼災禍甚麼破病， |
| 6:29 | 或是一人，或是你的百姓以色列的眾人，逐個知家己心內的災禍憂悶，向此間殿抬起手，無論怎樣懇求，怎樣祈禱， |
| 6:30 | 願你對天裡你所徛起的所在來聽伊，來赦免伊。你知𪜶的心，照𪜶逐人的行做來款待𪜶（因為世間人的心只有你知若定）， |
| 6:31 | 互𪜶佇你賞賜阮列祖的地一世人敬畏你，行你的道路。 |
| 6:32 | 「論到外邦人，呣是屬你的百姓以色列的，為著你的大名大權能的手，伸出的手骨，對遠遠的所在來，𪜶若來向此間殿祈禱， |
| 6:33 | 願你對天，你徛起的所在來聽𪜶，照外邦人一切所對你求的來行，互天下萬百姓攏識你的名，敬畏你，親像你的百姓以色列一樣，閣互𪜶知我所起此間殿，是用你的名來稱的。 |
| 6:34 | 「你的百姓若出去你所差𪜶去的路，及對敵交戰，向你所揀此個城，及我為著你的名所起的殿來祈禱你， |
| 6:35 | 願你對天來聽𪜶的祈禱懇求，來保護𪜶的義。 |
| 6:36 | 「你的百姓若得罪你（因為無有無犯罪的人），你受氣𪜶，將𪜶交互對敵，致到𪜶掠𪜶到或是遠或是近的地； |
| 6:37 | 𪜶若佇所掠去的地，心內倒轉想來反悔，閣佇掠𪜶的人的地，懇求你講：『阮有罪，阮有悖逆，阮有做歹』； |
| 6:38 | 𪜶若佇受掠去的地，就是對敵掠𪜶去的地，盡心盡性歸服你，閣向本地，就是你賞賜𪜶列祖的地及你所揀的城，以及我為著你的名所起的殿來祈禱你， |
| 6:39 | 願你對天你所徛起的所在聽𪜶的祈禱懇求，來保護𪜶的義，閣赦免你的百姓得罪你的。 |
| 6:40 | 「我的上帝啊，今我求你目睭看，耳孔聽佇此所在所獻的祈禱。 |
| 6:41 | 耶和華上帝啊，求你起來，你及你能力的櫃，入你安息的所在。耶和華上帝啊，願你的祭司穿救恩；願你許個聖的百姓，得著福氣來歡喜。 |
| 6:42 | 耶和華上帝啊，求你莫得拒絕你受抹油者，著記念你施互你的奴僕大衛的慈愛。」 |
