走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 36:1 | 國民用約西亞的子約哈斯設立做王佇耶路撒冷續接伊的老父。 |
|---|---|
| 36:2 | 約哈斯坐位的時二十三歲，佇耶路撒冷做王歷過三月日。 |
| 36:3 | 埃及王佇耶路撒冷廢伊，閣罰彼國進貢銀一百他連得，金一他連得。 |
| 36:4 | 埃及王設立伊的兄以利雅敬做猶大及耶路撒冷的王，換伊的名叫約雅敬。尼哥帶伊的小弟約哈斯到埃及。 |
| 36:5 | 約雅敬坐位的時二十五歲，佇耶路撒冷做王共十一年，行耶和華──伊的上帝所看做歹的事。 |
| 36:6 | 巴比倫王尼布甲尼撒上來攻擊伊，用銅鍊縛伊，欲帶伊到巴比倫。 |
| 36:7 | 尼布甲尼撒閣將耶和華殿內的器具帶到巴比倫，下佇巴比倫伊的廟內。 |
| 36:8 | 約雅敬其餘的事及伊所行可惡的事，及伊的不正，攏記佇以色列及猶大列王的記錄。伊的子約雅斤續接伊做王。 |
| 36:9 | 約雅斤坐位的時八歲，佇耶路撒冷做王三月日連十日，行耶和華所看做歹的事。 |
| 36:10 | 隔年，尼布甲尼撒差人帶伊及耶和華殿內許個寶貝的器具到巴比倫，就設立伊的叔西底家做猶大及耶路撒冷的王。 |
| 36:11 | 西底家坐位的時二十一歲，佇耶路撒冷做王共十一年。 |
| 36:12 | 伊行耶和華──伊的上帝所看做歹的事。先知耶利米用耶和華所吩咐的傳互伊，伊猶原無家己謙卑佇伊的面前。 |
| 36:13 | 尼布甲尼撒王曾教伊指上帝來咒誓，總是伊背叛，硬伊的頷頸，固執伊的心，呣歸順耶和華──以色列的上帝。 |
| 36:14 | 閣許個祭司的頭目及百姓也犯大罪，學外邦一切可惡的事，拍垃墋耶和華佇耶路撒冷分別做聖的殿。 |
| 36:15 | 耶和華──𪜶列祖的上帝託伊許個使者差𪜶去百姓遐，是透早起來差伊，因為伊憐憫伊的百姓及伊徛起的所在。 |
| 36:16 | 總是𪜶恥笑上帝的使者，藐視伊的話，譏刺伊的先知，直到耶和華大受氣伊的百姓，無法度通醫治。 |
| 36:17 | 所以，上帝導迦勒底人的王來攻擊𪜶，佇𪜶聖所的厝用刀刣死𪜶的少年人，無憐憫𪜶少年的查甫丁抑是在室女，老及白頭毛者。上帝將𪜶攏交佇伊的手。 |
| 36:18 | 伊閣將上帝的殿大細的器具及耶和華殿內的財寶，以及王及許個首領的財寶，攏帶到巴比倫。 |
| 36:19 | 𪜶燒上帝的厝，拆毀耶路撒冷的城牆，用火燒許個宮殿，毀壞許個寶貝的器具。 |
| 36:20 | 見若脫離刀劍的，伊帶𪜶到巴比倫，𪜶做伊及伊的子孫的奴僕，到波斯國興起。 |
| 36:21 | 這是應驗耶和華託耶利米所講的話：聽候土地享受伊的安息；因為伊拋荒的時守安息，到滿七十年。 |
| 36:22 | 當波斯王古列元年，因為欲應驗耶和華託耶利米所講的話，耶和華就激動波斯王古列的心，互伊宣佈佇通國，閣寫伊，講： |
| 36:23 | 「波斯王古列按呢講：天頂的上帝──耶和華將天下的萬國賞賜我，閣命令我佇猶大的耶路撒冷給伊起殿。恁中間見若做伊的百姓的，通上去，願耶和華──伊的上帝及伊佇啲。」 |
- 本章節結束 -
上一章