走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 20:1 | 此霎了後，摩押人及亞捫人，閣有米烏尼人，相及來欲及約沙法交戰。 |
|---|---|
| 20:2 | 有人來報約沙法講：「對海外對亞蘭遐有大軍隊來攻擊你，今𪜶佇哈洗遜他瑪，就是隱基底。」 |
| 20:3 | 約沙法就驚，定著意思懇求耶和華，佇猶大全地宣佈禁食。 |
| 20:4 | 對按呢猶大人聚會，求耶和華幫助。猶大逐個城攏有人出來尋耶和華。 |
| 20:5 | 約沙法就佇猶大及耶路撒冷的會中，徛佇耶和華殿的新院的頭前，講： |
| 20:6 | 「耶和華──阮的列祖的上帝啊，你豈呣是佇天裡的上帝嗎？你豈呣是列邦萬國的主宰嗎？佇你的手有權能有氣力，無一個會抵敵你。 |
| 20:7 | 阮的上帝啊，你豈呣是曾佇你的百姓以色列人的面前趕逐此個地方徛起的百姓，將伊賞賜你的朋友亞伯拉罕的後裔到永遠嗎？ |
| 20:8 | 𪜶就踮佇此個地方，閣因為你的名佇遮給你起一間聖所， |
| 20:9 | 講：『設使有災禍臨到阮，或是刀劍譴責，或是瘟疫飢荒，當患難的時，阮欲徛佇此間的頭前佇你的面前懇求你，因為你的名是踮佇此間殿，你欲聽來拯救。』 |
| 20:10 | 前以色列人出埃及地的時，你呣准𪜶侵犯亞捫人、摩押人，及西珥山人，就離開𪜶，無滅𪜶。 |
| 20:11 | 看啊，𪜶今怎樣報應阮，來趕逐阮出你的業，就是你賞賜阮互阮承接的。 |
| 20:12 | 阮的上帝啊，恁無欲責罰𪜶嗎？因為阮無力通抵當此個來攻擊阮的大軍隊，阮也呣知著怎樣行，阮的目睭專專向你」。 |
| 20:13 | 猶大眾人及𪜶的細漢囝仔、𪜶的某、𪜶的子兒攏徛佇耶和華的面前。 |
| 20:14 | 彼時，耶和華的神佇公會中臨到雅哈悉，伊是利未人亞撒的後裔──瑪探雅的元孫，耶利的曾孫，比拿雅的孫，撒迦利雅的子。 |
| 20:15 | 伊講：「猶大眾人、耶路撒冷徛起的百姓，及約沙法王你，攏著聽，耶和華對恁按呢講：『莫得因為此個大軍隊來驚來愞；因為此個交戰呣是在佇恁，就是在佇上帝。 |
| 20:16 | 明仔日恁著落去接陣，𪜶對洗斯山坪上來，恁欲佇耶魯伊勒曠野頭前的山谷口抵著𪜶。 |
| 20:17 | 此擺恁呣免交戰，猶大及耶路撒冷啊，恁著排陣徛啲，看耶和華拯救恁。呣免驚，呣免愞。明仔日著出去𪜶遐，因為耶和華及恁佇啲。』」 |
| 20:18 | 約沙法就俯頭仆佇地裡，猶大眾人及耶路撒冷徛起的百姓也仆佇耶和華的面前，敬拜耶和華。 |
| 20:19 | 哥轄族及可拉族的利未人攏徛起來，用極大的聲謳咾耶和華以色列的上帝。 |
| 20:20 | 隔日𪜶早早起來，出去提哥亞的曠野。出去的時，約沙法徛啲講：「猶大人及耶路撒冷徛起的百姓啊，著聽我：恁著信耶和華──恁的上帝就欲徛在；信伊的先知就欲亨通。」 |
| 20:21 | 伊已經及百姓議論，就設立唱歌謳咾耶和華的，互𪜶穿聖閣娞的衫，行佇軍隊的頭前謳咾耶和華講：「著感謝耶和華，因為伊的慈愛永遠佇啲！」 |
| 20:22 | 𪜶抵仔唱歌謳咾的時，耶和華就派埋伏的兵攻擊許個來攻擊猶大的亞捫、摩押，及西珥山的人，𪜶就受拍。 |
| 20:23 | 因為亞捫及摩押人起來，攻擊踮佇西珥山的人，一盡刣來滅𪜶；一盡滅踮佇西珥的人了後，𪜶逐個分旁相剿滅。 |
| 20:24 | 猶大人到曠野守望的樓，看見許個大軍隊，看啊，身屍倒佇地裡，無一個走離。 |
| 20:25 | 約沙法及伊的百姓來搶𪜶的財物，佇𪜶中間尋著多多財物、衣服、寶貝，𪜶剝做家己的多到帶𣍐去；𪜶搶物到三日，因為真多。 |
| 20:26 | 第四日𪜶聚集佇比拉迦的山谷，因為佇遐謳咾耶和華。所以彼所在名叫比拉迦山谷，到佇今仔日。 |
| 20:27 | 𪜶就倒去，就是猶大及耶路撒冷的人，約沙法佇𪜶的頭前，大家歡喜倒去耶路撒冷；因為耶和華及𪜶刣贏對敵，來歡喜快樂。 |
| 20:28 | 𪜶彈琴、彈瑟、歕號頭來耶路撒冷，到耶和華的殿。 |
| 20:29 | 列邦諸個國聽見耶和華刣贏以色列的對敵，就驚上帝。 |
| 20:30 | 按呢，約沙法的國太平，因為伊的上帝賞賜伊四圍平安。 |
| 20:31 | 約沙法做猶大王，坐位的時三十五歲，佇耶路撒冷做王歷過二十五年。伊的老母名叫阿蘇巴，就是示利希的查某子。 |
| 20:32 | 約沙法行伊的老父亞撒的路，無偏歪，行耶和華所看做好的事。 |
| 20:33 | 總是山頭壇猶未廢無，閣百姓也未有定著心意歸向𪜶列祖的上帝。 |
| 20:34 | 約沙法其餘的事，對頭到尾攏記佇哈拿尼的子耶戶的冊，彼個冊也列佇以色列列王的冊。 |
| 20:35 | 彼時了後，猶大王約沙法及以色列王亞哈謝結交；亞哈謝行歹到極。 |
| 20:36 | 二個王相及造船欲去他施，就佇以旬迦別造船。 |
| 20:37 | 彼時瑪利沙人、多大瓦的子以利以謝用讖語攻擊約沙法講：「因為你結交亞哈謝，耶和華破壞你的所做。」對按呢船就破，𣍐會去他施。 |
