走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 19:1 | 日暗，彼二個使者到所多瑪；羅得坐佇所多瑪城門裡，羅得看見𪜶，就起來迎接𪜶，鞠躬面向地， |
|---|---|
| 19:2 | 講：「我的主啊，請越來奴僕的厝歇暝洗腳，明仔早起起來行恁的路。」𪜶講：「呣免！阮欲佇大街面過暝。」 |
| 19:3 | 羅得切切請𪜶，𪜶才越轉腳，越入伊的厝。羅得為𪜶備辦筵席，peh無酵餅𪜶就食。 |
| 19:4 | 𪜶猶未去睏，城內的人就是所多瑪人，對少年到老，四面來圍伊的厝， |
| 19:5 | 叫羅得講：「今暗到你遮的人佇叨落？互𪜶出來，照阮所愛做。」 |
| 19:6 | 羅得出去到門外眾人遐，就將門關啲， |
| 19:7 | 講：「兄弟啊！請恁莫得做此號歹。 |
| 19:8 | 你看，我有二個查某子，猶是在室女，容允我導出來，出在恁所愛來行；獨獨此二人已經到我的厝，呣通對𪜶做甚麼。」 |
| 19:9 | 眾人講：「你退去！」閣講：「此人寄居佇遮，續欲管轄阮嗎？今阮欲害你比害𪜶卡傷重。」就挨夾羅得，進前欲攻破伊的門。 |
| 19:10 | 總是彼二人伸手，牽羅得入厝，將門關起， |
| 19:11 | 閣互門外的人，對細到大，目睭煙暈，攏𣍐看見；尋到倦尋無門。 |
| 19:12 | 彼二人對羅得講：「你佇遮猶有甚麼人？或是子婿或是子或是查某子，以及城內一切屬你的人，你著互𪜶攏出此所在。 |
| 19:13 | 因為阮欲剿滅此個所在；是為著𪜶喝喊的聲佇耶和華的面前真大，耶和華差阮來，欲剿滅伊。」 |
| 19:14 | 羅得出去，對娶伊的查某子的子婿講：「恁起來離開遮，因為耶和華欲滅無此個城。」伊的子婿掠做伊是講笑。 |
| 19:15 | 天光，使者催迫羅得講：「起來！導你的某以及你佇遮二個查某子去，驚了及此個城的罪惡相及受滅無。」 |
| 19:16 | 羅得延延。彼二人因為耶和華憐憫羅得，就牽伊的手及伊的某的手，及伊二個查某子的手，將伊導出，安置佇城外； |
| 19:17 | 導𪜶出去了，講：「你著逃命，呣通越頭看，亦呣通住佇平洋。著走去山裡，驚了受滅無。」 |
| 19:18 | 羅得對𪜶講：「我的主啊！呣通按呢！ |
| 19:19 | 你看，你的奴僕已經得著恩典佇你的面前；你亦對我顯出極大的仁慈，救我的性命。我𣍐會走到山裡，驚了此個災禍到佇我，我就死。 |
| 19:20 | 你看，此個城近近通逃走，也是細，請容允我逃閃佇遐，來保全我的活命。此個城豈呣是細個嗎？」 |
| 19:21 | 伊對伊講：「此個代誌我亦允准你；你所講的城我無欲捙倒。 |
| 19:22 | 你著緊緊走去遐；因為你猶未到遐，我𣍐會做甚麼。」因為按呢彼個城名叫瑣珥。 |
| 19:23 | 羅得到瑣珥，日已經出。 |
| 19:24 | 彼時，耶和華將硫磺及火對天頂對耶和華遐，降落佇所多瑪及蛾摩拉， |
| 19:25 | 將許個城以及全平洋，及城內所有的百姓，連地面上成長的，攏毀壞。 |
| 19:26 | 羅得的某佇後面一下越頭看，就變做一支鹽柱。 |
| 19:27 | 亞伯拉罕透早起來，到伊前日徛佇耶和華面前彼位， |
| 19:28 | 向所多瑪蛾摩拉，及平洋的全地來看，看見彼所在火煙淐高，親像火爐的煙。 |
| 19:29 | 當上帝剿滅平洋諸個城的時，上帝數念亞伯拉罕，抵抵佇捙倒羅得所徛起的城的時，就教羅得對捙倒的中間出去。 |
| 19:30 | 羅得踮佇瑣珥驚惶，就及伊二個查某子對瑣珥上去，踮佇山裡；伊及二個查某子踮佇一個洞內。 |
| 19:31 | 大查某子對細查某子講：「咱的老父老啦，地上閣無人及咱做匹配來照人道。 |
| 19:32 | 來啦！通互老父飲酒，及伊相及睏。按呢，咱好通對伊留存後裔。 |
| 19:33 | 彼暝𪜶互老父飲酒，大查某子就入去及老父相及睏；伊甚麼時去睏，甚麼時起來，老父攏呣知。 |
| 19:34 | 隔日，大查某子給細查某子講：「我昨暝及老父相及睏。今暗咱閣互伊飲酒，你通入去及伊相及睏。按呢，咱好通對老父留存後裔。」 |
| 19:35 | 彼暝𪜶閣互老父飲酒，細查某子起來去及伊睏；伊甚麼時去睏，甚麼時起來，老父亦攏呣知。 |
| 19:36 | 按呢，羅得二個查某子攏對𪜶老父來懷孕。 |
| 19:37 | 大的生子，叫伊的名摩押，就是現今摩押人的祖。 |
| 19:38 | 細的也生子，叫伊的名便亞米，就是現今亞捫人的祖。 |
