走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 45:1 | 約瑟佇許個徛伊身邊的人的面前愞徛𣍐住，就喝講：「眾人著離開我出去！」約瑟將伊本身互兄弟認得的時無一人徛佇伊的面前。 |
|---|---|
| 45:2 | 伊就出聲大哭；埃及人聽見，法老的家亦聽見。 |
| 45:3 | 約瑟給伊的兄弟講：「我是約瑟。我的老父猶佇啲嗎？」伊的兄弟𣍐會應，因為佇伊的面前攏驚惶。 |
| 45:4 | 約瑟閣給伊的兄弟講：「請行倚來。」𪜶就倚來。伊講：「我是恁的小弟約瑟，就是恁所賣到埃及的。 |
| 45:5 | 今，呣免因為賣我到遮來憂悶來家己怨恨。這是上帝差我代先恁來，因為欲保全生命。 |
| 45:6 | 今佇此所在的飢荒已經二年，猶有五年無通種作，無通收成。 |
| 45:7 | 上帝差我代先恁來，為著欲給恁留剩的種族佇世上，閣欲行伊大的拯救，保全恁的活命。 |
| 45:8 | 按呢看起來，差我到遮的呣是恁，就是上帝。伊閣互我親像法老的父，做伊全家的主，及管理埃及全地。 |
| 45:9 | 恁著趕緊上去我的老父遐，給伊講：『你的子約瑟按呢講：上帝互我做全埃及的主，請落來我遮，呣通延延。 |
| 45:10 | 你及你的子你的孫，及牛群羊群，以及一切所有的，攏通來踮佇歌珊的地，及我相近。 |
| 45:11 | 我欲佇遐奉承你；因為猶有五年的飢荒，免得你及你的家眷，及一切所有的，落薄。』 |
| 45:12 | 何況恁的目睭及我的小弟便雅憫的目睭攏看見我及恁親嘴對恁講話。 |
| 45:13 | 恁也著將我佇埃及一切的榮光及恁所看見的事攏給我的老父講，閣著趕緊將我的老父搬來我遮。」 |
| 45:14 | 對按呢約瑟仆佇伊的小弟便雅憫的頷頸啼哭，便雅憫也佇伊的頷頸啼哭。 |
| 45:15 | 伊閣及眾兄弟唚嘴，抱𪜶哭；後來伊的兄弟就及伊講話。 |
| 45:16 | 此個風聲傳到法老的宮內，講：「約瑟的兄弟來啦。」法老及伊的人臣攏歡喜。 |
| 45:17 | 法老給約瑟講：「你著給你的兄弟講：『恁著按呢行：將物互精牲載，起身去迦南地。 |
| 45:18 | 將恁的老父及恁的家眷攏搬來我遮，我欲將埃及地的好物互恁，恁亦通食此所在的山珍海味。 |
| 45:19 | 今我命令你，恁著按呢做：對埃及地帶車去，將恁的囝仔及某，及恁的老父攏搬來。 |
| 45:20 | 呣通看重恁家內的物，因為埃及全地的好物攏是恁的。』」 |
| 45:21 | 以色列的眾子就按呢行。約瑟照法老的命令互𪜶車及路中著用的食物， |
| 45:22 | 閣互𪜶一人一套衣服，獨獨互便雅憫銀三百，衣服五套； |
| 45:23 | 送𪜶老父的物記佇下底，驢牨十隻，載埃及的好物，驢母十隻，載五穀及餅及菜，互𪜶老父路裡通用。 |
| 45:24 | 約瑟就差伊的兄弟倒去，𪜶就起身，閣給𪜶講：「恁呣通佇路裡冤家。」 |
| 45:25 | 𪜶對埃及上去，來到迦南地、𪜶老父雅各遐， |
| 45:26 | 給伊講：「約瑟猶佇啲，閣管理埃及全地。」雅各心昏去，因為呣信𪜶的話。 |
| 45:27 | 𪜶就將約瑟對𪜶所講的話攏給伊講。伊閣看見約瑟所差來欲載伊的車，𪜶老父雅各的心活起來。 |
| 45:28 | 以色列講：「好啦！我的子約瑟猶佇啲，趁我猶未死，我欲去看伊。」 |
