走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 41:1 | 過二年足足，法老眠夢，夢見伊徛佇河邊， |
|---|---|
| 41:2 | 看見七隻牛母對河裡起來，娞閣肥，佇蘆竹仔內啲食。 |
| 41:3 | 隨後閣有七隻牛母對河裡起來，怯勢閣瘦及前許個牛同徛佇河邊。 |
| 41:4 | 諸個怯勢閣瘦的牛母一盡食彼七隻娞閣肥的牛。法老就醒。 |
| 41:5 | 伊閣睏，第二擺眠夢，夢見一欉麥出七穗，博閣好。 |
| 41:6 | 後來看見閣出七穗，冇冇閣互東風掃歹。 |
| 41:7 | 諸個冇的穗吞彼七穗博閣飽滿的。法老醒，才知是夢見。 |
| 41:8 | 到天光，法老心無平安，就差人召埃及所有的術士、博士來；法老就將伊所夢見的給𪜶講，𪜶無人會給法老圓。 |
| 41:9 | 彼時酒政長給法老講：「我今仔日記得我的罪。 |
| 41:10 | 前法老受氣人臣，將我及廚房頭關佇侍衛長府內的監。 |
| 41:11 | 我及伊二人像彼暝有夢見，各照伊的夢的意義來夢。 |
| 41:12 | 佇遐及阮佇啲有一個希伯來的少年人，是侍衛長的奴僕，阮給伊講，伊就給阮圓阮的夢，是照阮逐人的夢來圓。 |
| 41:13 | 後來抵抵照伊所給阮圓的來成：伊互我復職，彼人受吊來死。」 |
| 41:14 | 法老就差人去召約瑟，𪜶就緊緊導伊出監，伊就剪髮，換伊的衫，來見法老。 |
| 41:15 | 法老給約瑟講：「我夢見一個夢，無人會圓伊；我聽見人講到你，聽見夢就會圓。」 |
| 41:16 | 約瑟應法老講：「這呣是在佇我，上帝欲將平安指示法老。」 |
| 41:17 | 法老給約瑟講：「我夢見我徛佇河邊， |
| 41:18 | 有七隻牛母對河裡起來，肥閣娞，佇蘆竹仔內啲食。 |
| 41:19 | 隨後閣有七隻牛母起來，軟茈真怯勢閣真瘦，遍埃及地，我呣曾看見到即歹。 |
| 41:20 | 諸個瘦閣怯勢的牛母一盡食代先彼七隻肥的牛母， |
| 41:21 | 吞落腹猶未看出有吞落去，彼個怯勢的款猶原及代先無各樣。我就醒。 |
| 41:22 | 我佇夢中閣看見一欉麥，出七穗，飽滿閣好， |
| 41:23 | 後來閣出七穗，枯焦冇冇閣互東風掃歹； |
| 41:24 | 諸個冇冇的穗吞彼七穗好的。我講互術士聽，也無人會給我解明。」 |
| 41:25 | 約瑟給法老講：「法老的夢就是一個。上帝所欲行的事有指示法老。 |
| 41:26 | 七隻好的牛母是七年，七穗好的亦是七年；夢是一個。 |
| 41:27 | 許個隨後起來的七隻瘦閣怯勢的牛母是七年，許個七穗空冇閣互東風掃歹的亦是七年，欲做七年的飢荒。 |
| 41:28 | 上帝所欲做的事有顯明佇法老，這是我對法老所講的。 |
| 41:29 | 你看，埃及遍地欲抵著大好年冬七年， |
| 41:30 | 隨後閣欲抵著飢荒七年，甚至佇埃及地攏𣍐記得以前的好收，全地欲互飢荒所滅。 |
| 41:31 | 因為以後的飢荒太傷重，就呣知以前地方的好收。 |
| 41:32 | 論到法老二擺的眠夢，是因為上帝註定此個代誌，閣上帝欲緊緊成伊。 |
| 41:33 | 所以，法老著揀一個有聰明有智慧的人，派伊治理埃及地。 |
| 41:34 | 法老著按呢行，閣立官員管理此個地。當七年好年冬的時，埃及地所收的五份抽一份， |
| 41:35 | 互𪜶佇將來的好年冬積聚一切的米糧，聚集五穀，收囥照顧，佇逐個城做食物，歸佇法老的手頭。 |
| 41:36 | 所積聚的米糧通做埃及地將來七年飢荒的路用，免得此個地互飢荒所滅。」 |
| 41:37 | 法老及伊一切的人臣攏掠此個代誌做好。 |
| 41:38 | 法老對伊的人臣講：「咱豈會尋著一個親像伊此個人，有上帝的神佇伊的內面嗎？」 |
| 41:39 | 法老對約瑟講：「上帝已經將此個代誌攏指示你，可見無人親像你有此號的聰明智慧。 |
| 41:40 | 你通管理我的家；我的百姓攏著聽你的話互你管理。獨獨佇寶座我比你卡大。」 |
| 41:41 | 法老給約瑟講：「我舉起你管轄埃及全地。」 |
| 41:42 | 法老就剝伊手裡做印的手指，掛佇約瑟的指頭仔，給伊穿幼苧衫，將金鍊掛佇伊的頷頸， |
| 41:43 | 閣互約瑟坐伊的第二班車，開道者叫講：「跪。」按呢，法老設立伊治理埃及全地。 |
| 41:44 | 法老對約瑟講：「我是法老，若無你有聲，佇埃及全地，呣准人動腳手。」 |
| 41:45 | 法老欽賜約瑟的名叫撒發那忒巴內亞，閣將安城的祭司波提非拉的查某子亞西納互伊做某。約瑟就出巡埃及地。 |
| 41:46 | 約瑟見埃及王法老的時彼年三十歲。約瑟對法老的面前出去，遍行埃及全地。 |
| 41:47 | 七個好年冬的內面，地的出產極其豐盛， |
| 41:48 | 約瑟聚集埃及地七個好年冬一切的米糧，將米糧積聚佇逐個城；周圍田地的米糧攏積聚佇伊的本城。 |
| 41:49 | 約瑟積聚五穀極多，親像海邊的沙，到伊停止無算，因為算𣍐了。 |
| 41:50 | 飢荒的年未到以前，安城的祭司波提非拉的查某子亞西納給約瑟生二個子。 |
| 41:51 | 約瑟給大子號名叫瑪拿西，因為伊講：「上帝互我𣍐記得我一切的困苦及我的老父的全家。」 |
| 41:52 | 伊給第二子號名以法蓮，因為伊講：「上帝互我佇我受苦的地方興旺。」 |
| 41:53 | 埃及地七年好年冬已經完， |
| 41:54 | 七年飢荒就來。抵抵照約瑟所講的，逐國攏有飢荒；獨獨埃及全地有米糧。 |
| 41:55 | 到埃及全地有飢荒，眾百姓對法老哀求米糧，法老對埃及的眾人講：「恁去尋約瑟，凡若伊所講的，恁攏著做。」 |
| 41:56 | 當時飢荒遍滿天下，約瑟開逐所在的粟倉，糶米糧互埃及人；佇埃及地飢荒真傷重。 |
| 41:57 | 逐國的人攏去埃及，到約瑟遐糴米糧，因為天下飢荒真傷重。 |
