走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 9:1 | 上帝賜福挪亞及伊的子，亦對𪜶講：「恁著生湠多多，充滿地上。 |
|---|---|
| 9:2 | 見若地上的走獸及天裡的鳥攏欲驚恁，畏恁，連地上一切的蟲𧒴及海裡一切的魚攏交付恁的手。 |
| 9:3 | 見若活的動物攏做恁的食物。諸個一切我攏互恁，親像互恁菜蔬一樣。 |
| 9:4 | 獨獨有活命的肉，就是有含血的，恁呣通食。 |
| 9:5 | 流恁的血，就是流恁活命的血的罪，我欲討伊，我欲對各樣走獸討，亦欲對人的手，以及逐人兄弟的手，來討人的活命。 |
| 9:6 | 見若互人流血者，人也欲互伊流血，因為上帝造人是親像伊家己的像。 |
| 9:7 | 恁著生湠多多，佇地面上著興旺，加添真多。」 |
| 9:8 | 上帝給挪亞及伊的子講： |
| 9:9 | 「我，我及恁以及恁的後裔立我的約。 |
| 9:10 | 亦及許個及恁佇啲一切的活物──就是及恁佇啲的飛鳥、精牲一切走獸，見若對大船出來地上一切的走獸──立約。 |
| 9:11 | 我及恁立我的約，見有肉體的，無閣互大水滅無，亦無閣有大水毀壞土地。」 |
| 9:12 | 上帝講：「我及恁亦及許個及恁佇啲逐樣的活物所立永世代的約是有記號。 |
| 9:13 | 我將我的虹下佇雲裡，通做我及地立約的記號。 |
| 9:14 | 以後我互雲起遮地的時，欲有虹出現佇雲裡。 |
| 9:15 | 我就記念我及恁以及逐樣有肉體的活物所立的約，水無閣氾濫損壞一切有肉體的物。 |
| 9:16 | 虹欲出現佇雲裡，我欲看伊，互我記念上帝及地上逐樣有肉體的活物所立永遠的約。」 |
| 9:17 | 上帝對挪亞講：「這就是我及地上一切有肉體的物所立的約的記號。」 |
| 9:18 | 挪亞的子出大船的就是閃、含、雅弗。含是迦南的老父。 |
| 9:19 | 此三個是挪亞的子，對𪜶遍滿全地。 |
| 9:20 | 挪亞起手做農夫，栽種葡萄園。 |
| 9:21 | 飲彼個酒來醉，佇布棚內褪裼裼。 |
| 9:22 | 迦南的老父含看𪜶老父褪裼，去外面給𪜶二個兄弟講。 |
| 9:23 | 閃及雅弗提一領衫靠佇𪜶的肩頭，倒退行來遮老父的褪裼；𪜶的面向出無看見老父的褪裼。 |
| 9:24 | 挪亞酒醉醒，才知第二子的所做。 |
| 9:25 | 就講：迦南著受咒詛，伊欲做伊的兄弟奴僕的奴僕； |
| 9:26 | 閣講：著謳咾耶和華──閃的上帝！迦南做閃的奴僕。 |
| 9:27 | 願上帝互雅弗發展，互伊住佇閃的布棚；迦南亦做伊的奴僕。 |
| 9:28 | 大水了後，挪亞猶活三百五十年。 |
| 9:29 | 挪亞計共享壽九百五十歲才死。 |
