台語聖經

線上台語聖經

麥穗田首頁線上台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

創世記第42章

章節快速選擇 :

上下篇聖經查閱：出埃及記回到目錄

42:1	雅各看見埃及有五穀，雅各就給伊許個子講：「恁啥事啲相看？」
42:2	閣講：「我聽見埃及有五穀，恁通落去遐，為咱糴淡薄，互咱通度活，免死。」
42:3	對按呢，約瑟十個兄攏落埃及去糴米糧。
42:4	總是約瑟的小弟便雅憫，雅各無差伊及𪜶兄相及去，因為伊講：「驚了伊抵著害。」
42:5	來糴米糧的人的中間以色列許個子亦有來，因為迦南地亦有飢荒。
42:6	當時治理埃及地的是約瑟；糶米糧互彼所在的眾百姓者亦是伊。約瑟許個兄來，仆落地，拜伊。
42:7	約瑟看見伊許個兄，會認得，假做生份人，對𪜶講卡嚴的話，問𪜶講：「恁對叨落來？」𪜶講：「對迦南地來糴米糧。」
42:8	約瑟會認得𪜶兄，𪜶𣍐認得伊。
42:9	約瑟記得前所夢論到𪜶的許個夢，就對𪜶講：「恁是偵探，來探聽此所在的虛實。」
42:10	𪜶對伊講：「阮的主啊，呣是。你的奴僕來欲糴米糧。
42:11	阮攏是一人的子，阮是老實人；你的奴僕呣是偵探。」
42:12	約瑟給𪜶講：「呣是按呢，恁來是欲探聽此所在的虛實。」
42:13	𪜶講：「你的奴僕十二個兄弟，是迦南地一個人的子，第一細者現今佇阮老父遐，有一個無去啦。」
42:14	約瑟給𪜶講：「我抵仔講恁是偵探，此個話實在無錯。
42:15	我指法老的生命來咒誓，若恁煞尾的小弟無到遮，恁𣍐得通出此所在，用按呢來試驗恁的虛實。
42:16	著差恁中間一人去，導恁的小弟來。恁諸個攏著關佇遮，證明恁的話，知恁誠實抑無，若無，我指法老的生命來咒誓，恁一定是偵探。」
42:17	對按呢約瑟將𪜶攏關佇監裡三日。
42:18	到第三日，約瑟對𪜶講：「我敬畏上帝；恁照我的話行就會活。
42:19	恁若果然是老實人，恁兄弟中通留一個縛佇恁彼監內，總是恁通帶米糧倒去，救恁家內的飢荒。
42:20	將恁煞尾小弟導來我遮，按呢，恁的話就有憑據，恁也呣免死。」𪜶就照按呢行。
42:21	𪜶相及講：「咱對佇咱的小弟實在有罪。伊哀求咱的時，咱看見伊心內的艱苦，也呣肯聽伊，所以此場的苦難到佇咱。」
42:22	流便應𪜶講：「我豈呣是對恁講，呣通害彼個囝仔來取罪，獨獨恁呣聽，所以流伊的血的罪對咱諸個討。」
42:23	𪜶呣知約瑟聽會曉得，因為佇𪜶中間有用翻譯官。
42:24	約瑟越轉身，流目屎，閣越來及𪜶講話，就佇𪜶中間取西緬出來，佇𪜶的面前給伊縛𪜶。
42:25	約瑟吩咐人將五穀入佇𪜶的器具到滿滿，也將𪜶逐人的銀下佇𪜶的布袋內來還𪜶，閣用路裡的食物互𪜶，人就照按呢來給𪜶做。
42:26	𪜶就將五穀互𪜶的驢載，就離開遐去。
42:27	到歇暝的所在，𪜶中間有一人解開伊的布袋，欲提互驢食，才看見伊的銀猶原佇𪜶下佇布袋口。
42:28	就給伊的兄弟講：「我的銀還倒轉，你看，猶原佇我的布袋內。」𪜶就驚到無心肝，愕愕惙相及講：「上帝按呢款待咱是甚麼？」
42:29	𪜶到迦南地、到𪜶老父雅各遐，將所抵著的事攏給伊講，講：
42:30	「彼人就是彼所在的主，對阮講真嚴的話，掠阮做彼所在的偵探。
42:31	阮給伊講：『阮是老實人，阮呣是偵探。
42:32	阮是十二個兄弟，是阮老父的子，有一個無去，第一細者現今及阮老父佇迦南地。』
42:33	彼人就是彼所在的主給阮講：『若愛互我知恁是老實人，恁兄弟中通留一個佇我遮，恁諸個通帶五穀倒去，救恁家內的飢荒。
42:34	導恁煞尾的小弟來我遮，我就知恁呣是偵探，是老實人。按呢，我就將恁的兄弟交互恁，恁也通佇此所在買賣。』」
42:35	後來𪜶傾𪜶的布袋，無拍算，𪜶逐人的銀包攏佇𪜶的布袋內；𪜶及𪜶老父看見銀包就攏驚惶。
42:36	𪜶的老父雅各給𪜶講：「恁互我失落我的子：約瑟無去，西緬也無去，恁閣欲導便雅憫去；諸個代誌攏是害著我。」
42:37	流便給伊的老父講：「我若無導伊倒來交你，你通刣我二個子。做你通將伊交代我，我的確導伊倒來交你。」
42:38	雅各講：「我的子我無欲互伊及恁去；伊的兄已經死，只有剩伊，伊若佇恁所行的路抵著陷害，彼就是恁互我白頭毛、淒慘落陰府。」

- 本章節結束 -

聯繫資訊

線上台語聖經

台語聖經

創世記第42章

快速導航

相關資訊

聯絡麥穗田

聯繫資訊

線上台語聖經

台語聖經

創世記 第42章

創世記第42章