走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 10:1 | 耶和華對摩西講：「你入去見法老。因為我已經互伊的心及伊的人臣的心剛硬，通互我顯明我諸個神蹟佇𪜶中間， |
|---|---|
| 10:2 | 也欲互你將我所做佇埃及的事，及我佇𪜶中間所行諸個神蹟，傳互你的子及你的孫聽，通互恁知我是耶和華。」 |
| 10:3 | 摩西、亞倫就去見法老，給伊講：「耶和華──希伯來人的上帝按呢講：『你佇我的面前呣肯家己謙卑欲到甚麼時啊？著准我的百姓去，互𪜶服事我。 |
| 10:4 | 你若呣肯互我的百姓去，看啊，明仔日我欲互草蜢入你的境內， |
| 10:5 | 𪜶欲遮蓋地面，致到𣍐看見土，閣欲食彼個對災禍所剩的就是雹所拍無了的，也欲食田裡為恁所發一切的樹木。 |
| 10:6 | 草蜢欲充滿你的厝及你的眾人臣的厝，以及一切埃及人的厝，對你的老父及你的祖公出世到今，未曾看見按呢。』」摩西就越轉身離開法老出去。 |
| 10:7 | 法老的人臣對伊講：「此人做咱的羅網欲到甚麼時啊？著准諸個人去服事耶和華──𪜶的上帝！埃及已經敗壞，你豈呣知嗎？」 |
| 10:8 | 對按呢摩西、亞倫受召倒轉來見法老；法老給𪜶講：「恁去服事耶和華──恁的上帝；獨獨許個欲去者是甚麼號人啊？」 |
| 10:9 | 摩西講：「阮欲及阮的少年人老人去，也欲帶阮的子查某子，及阮的羊群牛群做一下去，因為阮著守耶和華的節。」 |
| 10:10 | 法老對𪜶講：「好啦，我准恁及恁的囝仔去啦！願耶和華及恁佇啲，恁著謹慎；災禍佇恁目睭前啦！ |
| 10:11 | 按呢𣍐做得！恁諸個大人通去服事耶和華，因為這是恁所求的。」就對法老的面前趕𪜶出去。 |
| 10:12 | 耶和華給摩西講：「你伸手指埃及地，互草蜢上來埃及地，食地裡一切的菜蔬，就是雹拍無了的。」 |
| 10:13 | 摩西就伸伊的柺仔指埃及地，耶和華就互東風通日通暝吹佇地裡；到明仔早起，東風就將草蜢吹來。 |
| 10:14 | 草蜢上來埃及遍地，歇佇埃及的四境，利害到極；從前無有按呢的草蜢，以後也無欲按呢。 |
| 10:15 | 因為𪜶遮蓋全地，致到地攏黑暗，閣食地上一切的菜蔬及樹裡的果子，雹所拍無了的。埃及遍地，無論樹木，抑是田裡的菜蔬，無留一項青翠的物。 |
| 10:16 | 對按呢法老趕緊叫摩西、亞倫來，講：「我得罪恁的上帝──耶和華，也得罪恁。 |
| 10:17 | 今求你干單此一擺，赦免我的罪，求恁的上帝──耶和華互我脫離此一擺的死無。」 |
| 10:18 | 摩西就離開法老去求耶和華。 |
| 10:19 | 耶和華就轉真透的西風將草蜢吹起來，趕入紅海；佇埃及的四境無留一隻草蜢。 |
| 10:20 | 總是耶和華互法老的心硬，呣准以色列人去。 |
| 10:21 | 耶和華給摩西講：「你伸手向天，互埃及地黑暗；此個黑暗到會摸得。」 |
| 10:22 | 摩西就伸手向天，埃及遍地就三日久黑黑暗暗。 |
| 10:23 | 三日久，人𣍐看見人，也無起來離開伊的所在；獨獨以色列人的厝攏有光。 |
| 10:24 | 法老就叫摩西來，講：「恁去服事耶和華；獨獨是恁的羊群牛群著留啲；恁的囝仔就通及恁相及去。」 |
| 10:25 | 摩西講：「你也著將牲禮及燒祭的物交阮的手，互阮通祭祀耶和華──阮的上帝。 |
| 10:26 | 阮的精牲也著及阮去，連一隻也呣留啲；因為阮著對彼中間取伊，來服事耶和華──阮的上帝。閣阮猶未到遐，呣知著用甚麼服事耶和華。」 |
| 10:27 | 總是耶和華互法老的心硬，呣肯互𪜶去。 |
| 10:28 | 法老給摩西講：「你著離開我去，你著謹慎家己，呣通閣見我的面！因為你見我的面彼日你會死！」 |
| 10:29 | 摩西講：「你按呢講好！我無欲閣見你的面啦。」 |
